تخيل كده معايا لو كان الكلام بفلوس كان هيحصل إيه:
- كنت تفكر ألف مرة قبل ما تحدف طوب وتزعل اللى قدامك!
- كانت الست بتاعت "الهاتف غير متاح" تركز شوية وتبحث كويس وتقرر غير متاح أم مغلق!
- كان اللى بيحط امتحانات الثانوية العامة اللى دايما يقول الامتحان في مستوى الطالب المتوسط يعتزل، أصل هيدفع كل اللى حيلته بسبب الجملة دى !
- كان المواطن المصرى يقول معرفش بدل ما يفتى ويضيع اخوه المواطن ويتوه في شوارع المحروسة !
- كان سواق التاكسى أو سواق الميكروباص يفكر مليون مرة قبل ما يقولك "الأجرة" وتتخانق معاه ويلعن اليوم اللى اشتغل فيه سواق ويلعن البلد باللى فيها !
- كان الشاب يمشى وهو باصص في الأرض ومش يعاكس فلانة ويقولها كلام سخيف!
– كان كل مسئول خاف يطلع تصريح قبل ما يتأكد منه !
- كنت تبطل تكتب أي كلام على الفيس بوك وتويتر "وكله بحسابه" !
- كان توقف أي أب عن مقولته الشهير "هو انا قاعدلكم على بنك" أيوه ياحاج قاعد طلع اللى في الخزنة !
- مكانش هيبقى في اوكا واورتيجا "ودول هيروحوا وهايجوا وهيدفعوا كتير اوى"!
- كانت طنط اللى كلنا نفسنا نفرح بيها ونشرب قهوتها تبطل تقولك هنفرح بك / بيك امتى ياروح طنط ( ودى بقى تدفع كل اللى في النيش عقابًا ليها)!
- كان خبير الأرصاد الجوية يركز شويه في الطقس ويبطل يقولك الجو لطيف على كل الأنحاء " ازاى ياجدع".
- كان مقدمو برامج التوك شو التزموا بالنص من غير تحابيش من عندهم "ودول بقى خصم مرتب شهر "! أو "حرمان من المرتب اساسًا" البيت راحة ليهم ولينا !
- كان أي مرشح لمجلس الشعب بطل وعود كدابة !
- كانت كل مستشفى تبطل تقولك "مش هانأخد الحالة" الا لما تدفع اقل حاجة 5000 جنيه ومش مهم الحالة تموت ولا تعيش !
- كان الشاب من دول يخاف يقول "بحبك" على الفاضى والمليان لأى واحدة في طريقه، ويفكر خمستلاف مرة قبل مايقولها "تتجوزينى"!
- كان كل كداب بطل كدب بدل مايروح النار يدفع دم قلبه !
- كانت المواعين نفسها تبطل تكتر.. والكهربا تبطل تقطع.. والميه تبطل تقطع.. وانت نفسك تحاسب نفسك وتدفعها فلوس وبكده الحياة هتبقى وردى وصافية ورايقة وآخر زقلطة !
