تسببت تصريحات الفنانة المعتزلة شريفة ماهر على الفنان إسماعيل ياسين غضب محبى الفنان الراحل حيث قالت إن زوجته كانت تحركه بريموت كنترول وكانت تتحكم فيه، لذلك التقت «البوابة نيوز» مع حفيدة الفنان الراحل «سارة ياسين إسماعيل ياسين» لمعرفة منها أسرار عملاق الكوميديا إسماعيل ياسين وأقرب الفنانين له فى الوسط الفنى وعلاقته بزوجته ومدى تدخلها فى أعماله الفنية، وإلى نص الحوار.
- ما تعليقك على تصريحات الفنانة شريفة ماهر بأن زوجة الفنان إسماعيل ياسين كانت تتحكم فى اختياراته؟
جدتى لم تدخل فى أى عمل للفنان إسماعيل ياسين وقال لى والدى إن «شغل جدى كان من دماغه ومحدش بيدخل فى شغله»
والدليل على ذلك أن شغله فى المسرح لوقت طويل خسره فلوس كتير ولم يستمع لأحد بضرورة تركه العمل فى المسرح.
- ما علاقته بشريفة ماهر؟
واحدة من الناس اللى اشتغل معاها لكن مش مقربة ليه ومش من أصدقائه.
- ما علاقته بزوجته؟
جدتى كانت غيورة عليه بس مكنتش بتغير من صحابه زى درية أحمد وتحية كاريوكا، بس علقت على نجوى فؤاد وهو قالها ملكيش دعوة، وكان مسمى مراته وش السعد بسبب أدوار البطولة اللى خدها والفلوس اللى جتله بعد ما اتجوزها.
- هل لزوجة الفنان إسماعيل ياسين علاقة برفضه المشاهد الجريئة؟
من قبل ما يتجوزها ومكنش بيحب يعمل مشاهد جريئة
- ماذا كان دور زوجته فى حياته؟
لم يكن لها أى دور أو تدخل فى حياته الفنية بل فى حياتهم الشخصية كانت مهتمة بتربية أولاده بالإتيكيت وتعليمهم الفرنساوى وكانت تعشق الموضة.
- هل هناك خلاف بين شخصيته وشخصية زوجته؟
هما الاتنين شخصيتين مختلفتين هى كانت بتحب الخروج ولمة الناس، وهو كان شخص انطوائى وبيحب القاعدة لوحده.
- من هم أقرب أصدقائه فى الوسط الفني؟
اللى كانوا بيزوروه فى بيته كتير لأن جدتى كانت اجتماعية وكانت فاتحة بيتها لأى حد ولجلسات عمل لأفلام هيعملوها ولكن مش كل اللى دخل بيته صديقه، لكن هو كان بيحب الفنان شكوكو وأبوالسعود الإبياري، واللى كان بيحبه لدرجة مات من الحزن عليه بعده بعامين هو المخرج فطين عبدالوهاب اللى أخرج له أغلب أفلامه.
- ما أقرب الأعمال لقلب الفنان إسماعيل ياسين؟
سلسلة إسماعيل يس وجميع الأفلام التى عمل فيها مع المخرج فطين عبدالوهاب، وكان بيحب فيلم اسمه «صاحبة العصمة» لأنه دخل الفيلم تحديا لأن تصنيف الفيلم دراما وليس كوميديا.
- سبب رفضه للمشاهد الجريئة؟
كان شايف إنها مش مناسبة ليه ولا للى بيقدمه لأن هو مثل قبل ما يتجوز جدتى وبرده كان رافض للمشاهد الجريئة.
-أبرز المواقف فى حياته المهنية؟
قرر يترك المسرح مفتوحا للعمل بالرغم أنه مكنش بيجيب فلوس وكله نصحه بلاش يكمل ولكنه رفض وكان بيدفع للعمال فى المسرح فلوسهم من جيبه الخاص، وكان بيعتبر المسرح مسئوليته.
- رأيك فى تعليق هند رستم عن إسماعيل ياسين أنه عصبى وديكتاوري؟
كان عصبيا فى بيته مش فى عمله وعشان يصحح أخطاء ابنه لكن مكنش ديكتاتورى ولا عصبى فى عمله.
- ما أزمته مع الضرائب؟
الضرايب حصلت منه على مبلغ 200 ألف جنيه واتسببت فى إصابته بشلل وظل فترة أكثر من 6 أشهر يتعالج من الإصابة.
-ما حقيقة وفاته فقيرا؟
اتوفى وكان عليه جزء من فلوس الضرائب ولكن كان معاه اللى يغطى دفع فلوس الضرائب، وكان ناوى يعمل مصالحة معاها، لكنه مات قبل ما يعمل المصالحة وكان عنده أملاكه، ولما مات ابنه باع العمارة وسدد باقى فلوس الضرائب.
- ما أزمة مدفنه؟
دفن فى مدافن الفنانة فتحية شريف زوجة الفنان عماد حمدي، وهى اللى طلبت لأنه لم يكن له مدفن فى القاهرة.
