زقزقة فى الصباح تروق الكثير من الآذان التى يعشق أصحابها تربية العصافير ويعطونها قدرا كبيرا من اهتمامهم ووقتهم، وتربية أسماك الزينة من الهوايات المبهجة لكنها لا تكون كذلك بالنسبة للهواة الذين لا يمتلكون الخبرة ولا يعرفون الإرشادات الضرورية لتربية أسماك الزينة، وهو ما يؤدى فى الغالب لقتل الأسماك بعد فترة قصيرة من تعلقهم بها.
أحمد ٢١ عاما يعمل فى بيع الأسماك والعصافير والحمام، يمتلك من خبرة فى مهنته تزيد علي التسع سنوات يقول «أنا أتعلمت وخلصت دراستى لكن أنا بعشق شغلى مع العصافير والأسماك والحمام لأنى بحس أنهم كائنات لطيفة كلها حب ورقة غير البشر، بحس معاهم بالغدر والخيانة، وأصعب لحظه بتأثر فيها وأنا ببيعهم لزبون وخصوصا لو كانت موجودة معايا فى المحل من فترة»، وتابع: «حوض سمك الزينة بـ١٥٠ والعصفورة بـ ٩٠ جنيها والحمام ببيعه تجارى عادى وبنجيب السمك والعصافير من تجار كبار فى المعادى وحلوان».
وعن أسرار تربية العصافير وأنواعها وكيفية ممارسة مهنته يحكى أحمد بالتفصيل׃ «تعالوا نعرف أزاى نربى العصافير دى، لو أنته بتربى عصافير أسترالى مثلا ديمًا تخلى بالك من المنقار بتعهم لأن مجرد مالون المنقار يبقى غامق يبقى العصفور ده كبير، أنما لو أبيض يبقى لسه، أما تربية عصافير الكوكتيل والبركاديلو، ودول أغلى أنواع العصافير وأصعبهم فى التربية، والنوع لما ينتقل من مكان لمكان ممكن يفضل يوم أو اتنين ما يا كلش لغايت ما يتعود على المكان الجديد، أما عن نوع الأكل بياكلو «البلكم واللب السوداني» ويكون اللب من غير ملح وممنوع الملح خالص ولازم يكون حرارة الجو معتدلة، ونصيحة هامة جدا لما تبقى العصافير على وش زواج لازم يكون كل زوج وزوجة فى قفص لوحدهم وعدم مشاركة أى عصفور تانى معهم فى القفص، وفى أثناء وضع البيض لازم يكون فى بيت صغير من الخشب اسمه بياضة، أما البياضة بتاعت عصافير البركاديلو والكوكتيل لازم يكون جواها قش عشان البيض». وينصح أحمد، بائع أسماك الزينة، زبائنه دائما بمجموعة نصائح تختلف بحسب نوع السمك الذى يشترونه قائلا: «أهم حاجة فى تربية الأسماك الخبرة لأن فيه أسماك بتعيش فى مياه باردة وفى أسماك بتعيش فى مياه دافئة، وفى أسماك تحتاج لأحواض مياه فيها ملح حسب نوع السمك والنصيحة اللى بقولها لأى حد يشترى منى أسماك الزينة هى أن المياه لازم يكون فيها مزيل كلور».
