بصراحة قربت أتجنن من الفيس بوك وبلاويه واللي بيجرى فيه.. خلاص ما حدش بقي يسيب حد في حاله كده.. فيها إيه يعني لما الراجل الطيب المحترم طارق عامر، بتاع البنك المركزي، يتجوز الست داليا خورشيد، بتاعة الاستثمار السابقة، مادام الجواز شرعي وعلى سنة الله ورسوله.. وبعدين حتى لو كان "عرفي".. ما هو العرفي في الزمن ده هو اللي ماشي.. هي يعني جات عندهم و"حبكت".
لكن بما أننا شعب "ابن نكتة" وماتفوتهوش ولا حتة "ألشة" فكان حتمًا ولزمًا ولابد تقوم الدنيا ولا تقعدش.. وكل ده كان ليه.. قال علشان "كل شيء انكشفن وبان" وصور الفرح اتنشرت وكمان اتشيرت وكأنها فضيحة بجلاجيل.. يا خواننا اتوكسوا وروحوا شوفوا لكم تربة تتاويكم ما تسيبوا اللي يتجوز يتجوز واللي يتهبب برضه يتهبب.
التحفيلة دي فكرتني لما فضلوا يقروا وينبروا وينؤوا على الراجل الغلبان سعيد طرابيك لما اتجوز وفضلوا يألشوا عليه لحد ما الراجل يا ولداه "فيص" وساب الدنيا ومتاعها ومالحقش يتهنى بجوازته لحد ما بقت جنازته.
فحسب فهمي، نظمي رسمي، المحدود للغاية أن "جواز عتريس من فؤادة مش باطل ولا حاجة".. فالجواز لا هو عيب ولا حرام.. وحتى التكتيم عليه "حق رؤوة".. انا بس اللي مجنني وماخلانيش أنام هو بس حتة سؤال رفيع كده.. كلمة واحدة بس هارد بيها على كل اللي اتقال واللي اتعمل.. فسفوسة سؤال للسيد محافظ البنك المركزي: فايق ورايق أوي بسلامتك علشان تتجوز التانية ولا زي ما بيقولوا التالتة.. يعني سايب الدنيا تضرب تقلب والأسعار تولع والاستثمار ينام مش مهم.. كل ده وانت مكمل مسيرة حياتك.. وبعدين إيه الفأل الشؤم ده يعني محافظ البنك المركزي ووزيرة الاستثمار يتجوزوا فالمفروض الاقتصاد حالته تتحسن مش يجيب جاز كده..
ثم إن سيادة المسئول "الرفيع" كذا مرة يجيب سيرة الست حرمه في جملة مفيدة.. مرة يقول لنا كانت مبسوطة أووووي لما عوموا سعر صرف الجنيه الغلبان أمام المفتري الدولار وقال انها فرحت برضه أووووووي لأن الوديعة بتاعتها هترتفع.. فيا ترى هو كان بيتكلم عن أنهي ست فيهم.. ومعلش في السؤال الرخم ده هي الوديعة كانت بكام.. ويا خوفي يا بدران يكون خد القرار ده علشان تراضيها.
الله يسامحكم ياللي في بالي من زمان كنت بطلت اكتب بالطريقة العامية السوقية دي لكن أقول إيه.. أقول إيه.. يموت الزمار وصباعه بيلعب.
