أمرت نيابة فاقوس، بإشراف المستشار وليد جمال المحامي العام لنيابات جنوب الشرقية، بحبس عاطلين 4 أيام على ذمة التحقيقات لاتهامهما بخطف حلاق وتعذيبه ومحاولة اغتصابه.
وكانت قرية عرب درويش التابعة لمركز فاقوس بالشرقية، قد شهدت خطف بلطجي وصديقه لشاب من القرية "حلاق" وتعذيبه، ظنًا منهما أنه يبلغ خفراء القرية بأعمالهما الإجرامية ما دفعهما لتعذيبه أشد العذاب.
وقال المجني عليه في محضر الشرطة: إن أحمد أبوسلمى المجرم وصاحبه سليمان انعدمت الرحمة في قلوبهما وعملا فيّا حاجات ما تتوصفش، قلعونى هدومى وحرقوا جسمى وحاولوا اغتصابى، لكن منعتهم وقلت لهم موتونى الأول وبعدين اعملوا فيّا اللى انتوا عايزينه، مليش فى البهدلة وربنا هيجيب حقى.
أضاف محمود صابر 29 سنة حلاق ومقيم فى قرية عرب درويش والمجني عليه من قبل البلطجيين، أنه يعمل يوميًّا فى محل حلاقة ملك له بالقرية وربنا بيبعت لى رزق عيالى يوم بيوم ودي حياتى اليومية، ومن 10 أيام كنت ماشى فى شوارع القرية، قابلنى أحمد أبوسلمى وقال لى خد يا أسطى محمود أنت بتبلّغ عنّى الشرطة عايز تحبسنى ونهرنى بلفظ خارج وضربنى على وشى، فجريت منه لأنى عارف إنه شخص سيئ وبعدها بيومين كانت بنتى الصغيرة بتعيط وعايزة عود قصب.
وروحت أشترى لها القصب وفى الطريق قابلنى سليمان صديق أحمد وقال لى رايح فين؟ قلت له رايح أشترى قصب لبنتى من أرض القصب بعدها بـ5 دقائق حضر ومعه أحمد راكبين "موتوسيكل" وأجبروني على الركوب معهما، فركبت وخدونى فى جنينة مهجورة وقلعونى هدومى كاملة، وربطونى بحبل وجابوا شيكارة بلاستيك وحرقوها على جسمى وأنا صراخى مالى الدنيا، لكن محدش سمعنى لأن المكان مهجور وبعيد عن الأهالى.
وبدأ أحمد وصاحبه يشربوا مخدرات وبعدها رجعوا يضربونى تانى وحاولوا اغتصابى، لكن توسلت ليهم وقلت لهم على جثتى موتونى الأول وبعدين اعملوا فيا اللى انتوا عايزينه، وبعدها رمونى بالطريق وشافنى واحد من الأهالى فخدنى لمركز شرطة فاقوس لتحرير محضر، وفي المركز وعدوني إنهم هيجيبوا حقي وتم نقلي للمستشفى لتلقي العلاج.
كان اللواء رضا طبلية مدير أمن الشرقية قد تلقى إخطارًا من اللواء هشام خطاب مدير البحث الجنائى، يفيد بورود بلاغ من أحمد إبراهيم سليمان محامى محمود صابر 29 سنة حلاق ومقيم فى قرية عرب درويش بمركز فاقوس يتهم فيه "أحمد م. ع" وصديقه "سليمان ص" يقيمان فى القرية بخطف "محمود" وحجزه فى أحد الأماكن لمدة يومين بعد ترويعه بالسلاح النارى وإشعالهما النار فى جسده والشروع فى هتك عرضه وإجباره على توقيع إيصالات أمانة لتهديده بها حال إبلاغ الشرطة، فضلًا عن تجريده من ملابسه وحرق شكاير بلاستيك على جسده، وحرّر عن ذلك المحضر رقم 29006 جنح مركز فاقوس.
وأكدت التحريات أن المجني عليه شخص مسالم، وأن خفراء القرية يحلقون عنده والبلطجى "أحمد م. ع" وشهرته أحمد أبوسلمى 31 سنة عاطل له كارت تخصص إجرامى برقم (9/921 ج)، وسبق اتهامه فى 3 قضايا (سرقة - سلاح أبيض) آخرها القضية رقم 3823/ 2016 جنح المركز (سلاح أبيض) وصديقه "سليمان ص. س" 27 سنة عاطل.
كما أكدت التحريات اختطافهما للمجنى عليه واحتجازه فى إحدى المزارع بالمنطقة والتعدى عليه بالضرب وإصابته وإكراهه على التوقيع على إيصالات أمانة اعتقادًا منهما أنه أرشد عنهما الشرطة، بترديد أقاويل مفادها أنهما سرقا دراجة بخارية من أحد أهالى القرية، ونجح ضباط المباحث في ضبط المتهمين.
