قال الدكتور عبد الرحيم علي، رئيس مجلس إدارة ورئيس تحرير "البوابة نيوز"، إنه يتوقع فتح القضية 250 أمن دولة عليا لسنة 2011، بعد الانتهاء من الانتخابات البرلمانية المقبلة، نظرًا لضخامة الملفات والمستندات.
وأضاف "علي"، خلال حواره مع الإعلامي توفيق عكاشة ببرنامج "مصر اليوم" على فضائية "الفراعين"، أن القضية متورط فيها عدد كبير من الشخصيات العامة والرموز السياسية والإعلاميين يتصدرون المشهد الحالي، وعلى رأسهم الدكتور محمد البرادعي.
وعرض البرنامج، مكالمة صوتية بين البرادعي، وضابط المخابرات الأمريكية دان برامن، والتي تؤكد تخابره ضد الدولة المصرية، وإفصاحه عن تفاصيل اجتماعه مع المجلس العسكري، بحضور رجل الأعمال نجيب ساويرس.
وكانت ترجمة نص المكالمة:
دان: هالو
علي: هالو
دان: أهلا محمد
علي: لا علي
دان: انا دان برامن
علي: انتظر من فضلك
دان: أوكي
البرادعي: أهلا
دان.. إزيك
دان: كويس أنا لسه راجع من مهمة في الشرق الأوسط
البرادعي: آه أنا عارف، وافتكر إن الموضوع عدى بشكل كويس، مش عارف إنت خدت بالك ولا لا، كان المجلس العسكري دعاني.. رئيس المجلس ورئيس الأركان يعني، دعوني من كام يوم أنا وساويرس اللي هو الملياردير المعروف، وعمرو موسى مشهور طبعا إنت عارفه، والكلام كان كويس، واليومين اللي فاتوا دول كنت على اتصال مع رئيس الوزراء، هما عايزين يرجعوا البلد مرة تانية لوضعها الطبيعي، وكلامهم كله إنهم عاوزين يوقفوا الاعتصامات والمظاهرات، ولما اتكلمنا مع المجلس العسكري قلت لعنان رئيس الأركان الوضع عشان يرجع طبيعي لازم رئيس الوزرا يمشي، والصراحة هما عملوا كده ومشوه الصبح، ودلوقتي أنا باحاول اتأكد إن الدنيا هتكون تمام بكره ومش هيكون فيه مظاهرات، علشان نبدأ نتحرك في الفترة اللي جاية في تشكيل جمعية تأسيسية ونحط دستور جديد وبعدين انتخابات الرئاسة، وهكذا.. يعني احنا شغالين عشان المرحلة اللي جاية، بس عالأقل دلوقتي بقي فيه جسر من التفاهم معاهم بنتحرك من خلاله.. والأمور ماشية كويس يعني.
دان: كويس، كويس جدا، أنا لما رجعت اتكلمت مع بيل بيرنز وهو قاللي إنك اتكلمت مع طنطاوي وواضح أن ده مستمر وإنه مش اتصال لمرة واحدة، وإنك دلوقتي فتحت قناة اتصال.
البرادعي: هو ده حقيقي.. دلوقتي أنا على اتصال جيد برئيس الأركان عنان وهو رقم ٢ بعد وزير الدفاع، وكان كلامي معاه في اليومين اللي فاتوا نحو التفاوض.. يعني كنت بقوله إيه اللي الشباب عاوزه عشان يوقف المظاهرات والاحتجاجات ويطمن للمسار الجاي، وبلغتهم أن السقف الأدنى للمطالب هو عزل أحمد شفيق، وده حصل بالفعل انهارده الصبح، ودلوقتي أنا على اتصال بكل الناس الشباب والإخوان وكل الناس، عشان اتأكد أن بكره هيعدي كويس ومش هيكون فيه احتجاجات تاني، وأنا قلت لعنان إننا هنكمل الحوار بعد كده، وافتكر أن الخطوة الجاية هتكون إننا نشتغل معاهم عشان نوصل لانتقال هادي للسلطة من خلال دستور جديد وانتخابات رئاسية، وبعدين نبقي نعمل برلمان، عشان الانتخابات البرلمانية دلوقتي، زي ما قلت لبيرنز برضه مش هتفيد غير الإخوان والحزب الوطني، واتمنى إننا نقدر ناخد الوضع في اتجاه كويس خلال الست شهور اللي جايين.
دان: كويس.. كويس تفتكر الانتخابات الرئاسية ممكن تتم إمتى.
البرادعي: افتكر إننا في الأول لازم نعمل لجنة تأسيسية عشان تكتب دستور جديد، لأن دستور ٧١ مليان مواد استبدادية من أيام النظام القديم، وده اللي أنا هقوله ليهم في اجتماعاتنا الجاية، افتكر في خلال ست شهور ممكن يكون عندنا دستور جديد ونستفتي عليه، وبعدها نبدأ إجراءات الانتخابات الرئاسية، ولازم يكون فيها ضمانات للتصويت الحر والرقابة والشفافية، وحقوق المصريين في الخارج، كل دي حاجات محتاجة تتظبط والجيش مش عايز يقعد أكتر من ست شهور، هما فعلا عاوزين كده، ومتنساش أن عندهم أزمة اقتصادية، وفيه حاجة مهم إنك تعرفها، هما مرعوبين من قلة الفلوس ومن فكرة إنهم محتاجين كل شهر ١٠ مليارات دولار لدفع الرواتب بس، وكمان مشكلة الأمن، الشرطة انسحبت والحالة الأمنية سيئة، الحاجتين دول هما اللي بيفكر فيهم طنطاوي، والقضية الأساسية هي إزاي يجيبوا فلوس، وهما بيحاولوا يتصرفوا من الخليج، لكن نتمني أنا وساويرس والناس العاقلين هنا، نتمنى إنهم يتجهوا ناحيتكم أو ناحية أوروبا، وبالنسبة للأمن فهما عاوزينه يرجع عشان البلد ترجع لوضعها الطبيعي، لكن ده مش هيكون.
مقبول من المحتجين طبعا، لو احنا قدرنا نرجع للبلد جزء من شكل الحياة الطبيعي، يعني الجيش يحمي القانون والنظام في الشارع والسينمات تتفتح والمدارس ترجع تشتغل، افتكر لو عملنا كده هنبقى ماشيين في الاتجاه الصحيح، هما عايزين يمشوا ويسيبوا كورة النار من إيديهم ويرموها لأي حد في خلال ست شهور، لكن طبعا الوضع معقد جدا، واحنا لسه هنشوف شكل الست شهور الجايين هيكون إيه، واتمنى إنهم يقبلوا اقتراحاتنا نحو نقل السلطة، وزي ما قلتلك قبل كده، احنا بدأنا الحوار.. وده في حد ذاته كويس.
