يا حُب قديم وحلم جميل.. ما طولتش.
لُقانا كان حبيبي ساعات، وكنت اتمني ما تُمرش ..لكن مَرِّت.
وأنا اتعودت وصوت جوايا بيقولي: ده طبع الدنيا ما تُدقش.
ما طَوِلتش.
يا فرحة قلب داق الحب بعد سنين من الوحدة ما تِتعدش
يا لمعة عين كانت دِبلت.
وروح مجنونة كانت فارقتني ومعاك رجعت.
يا عز نهار في نُص الليل.
يا نجمة من السما نزلت وجوا في قلبي أنا سِكنت.
يا صوت يِسحر و ريق يِسكر
يا نور يكسر و يِمحي فيا عتمة روح.
يا نسمة صيف تُرد الروح.
في حضن عينيك بغيب وبروح.
انا غرقان ومِتشعلق في حبل هواك وعديتك سفينة نوح.
يا أحلي بداية منهية.. لأروع قصة منسية.
ما طَولتش..
كأن القدر حالف ما نتجمع.
ورغم الشوق وتنهيدي وعشقه الجاري في وريدي.
ورغم قتلت كل الخوف.
وما عادش بينا أي كسوف.
لكني بِعدت!
و ماكانش في نيتي هبعد.
ولا كانش في حسبتي تعند.
أقول ماشية .. تقولي سلام!
بكلمة قفلت أي كلام.
وخليتني أنا التانية.. ما طولتش!
وعارفة ان الغياب مَحتوم.
هنتقابل ونتلاقي.
هنتعاتب ونتشاقي. وتشهدنا سما ونجوم.
لكن عارفة الغياب محتوم.
أجازة صيف .. طبيعي تُمر يوم ورا يوم.
لكن واثقة اللُقا مقسوم.
أقولك..
كفاية تجمعنا قصيدة شعر.
انا الكلمة ال مكتوبة علي ورقة
وصوتك بس يحييها.
و رُوحنا بالفنون تسمو ونجوي الله تعليها
"ما طولتش"
