عبرت الفنانة رنا عتيق، عن استيائها الشديد من بعض التعليقات التي تتلقاها عبر وسائل التواصل الاجتماعي ووصفتها بالتنمر والإهانة.
وقالت "رنا" خلال "لايف" عبر صفحتها على موقع التواصل الاجتماعي "فيس بوك":" كل سنة وأنتم طيبين وسنة سعيدة عليكم، وربنا يبعد عنكم الناس الوحشة اللي حتكلم عنها انهاردة المحبطين، اتعرضت الفترة الأخيرة لكمية تنمر فظيعة، ناس كتير سألتني بعد ما خرجتي من البرنامج ليه مكملتيش".
وتابعت "رنا عتيق":" عملت أغاني ولكن يمكن الدعاية كانت قليلة، جاتلي فترة مش عاوزة أغني من كتر التنمر والإهانة، التنمر وصل للإهانة، على شعري وشكلي، إنتوا مالكوا مع إن شكلي مش دميم اوى يعني، ليه دايما الإهانة، أصل إنتي مبتطلبيش عشان شكلك".
واستطردت رنا:" هل تعرفوا إن الوصول لحلقات اللايف في برنامج ذا فويس دة مش سهل، فليه الإسلوب الغير اللائق اللي بتتكلموا بيه، أخر كومنت جالي على فيديو نزلته على اليوتيوب كان إنتي شبه المتحولين جنسيا، أنت مالك بردو أنت مش حتتجوزني، شكلي وحش ولا شبه المتحولين دي حاجة بتاعة ربنا، والشكل ممكن أروح لأي دكتور ويظبطه بس أكيد مش ممكن يظبط لي صوتي".
وتابعت "رنا":" دكتور التجميل مش حيعمل لي صوت، اللي بيخلق الصوت ربنا سبحانه وتعالى، فإهانة بني آدم جريمة، في كتير محترمين ويدعمونني، حلقت جانب من شعري أنا حرة، بحبه كدا، طالما لا أؤذيك أنت شخصيا مينفعش تقول لي أنتي شبه الراجل، أنا اه ست تعاملي بميت راجل، والأخت الفاضلة اللي باعتة تقول أصلك مش مطلوبة عشان إنتي لا شكل ولا منظر، معرفش أعمل إيه عشان أبقى شكل ومنظر بنسبالك".
واختتمت رنا عتيق حديثها خلال اللايف وقالت":" عايزة أقول لهم أنا حستمر وحنزل شغلي اللي يفخر بيه الجمهور الحلو اللي بيسمع وواثقة فيه جدا أنه سيدعمني".
يشار إلى أن رنا عتيق انهت مؤخرا من تسجيل أغنية “الناس نوعين” ضمن ميني ألبوم جديد تقف على تحضيراته خلال الفترة الحالية، من كلمات الشاعر الغنائي مصطفى حسن، ألحان هاني جمال، توزيع ومكس وماستر بيشوي سمير.
