كشف الفنان وائل عبدالعزيز، شقيق الفنانة ياسمين عبدالعزيز، آخر تطورات حالتها الصحية بعد الوعكة الصحية الشديدة التي تعرضت لها مؤخرا.
وأكد خلال مداخلة هاتفية ببرنامج «الحكاية» الذي يقدمه الإعلامي عمرو أديب: «ياسمين عبدالعزيز حالتها مستقرة إلى حد ماء، والأطباء أكدوا أنه خلال أسبوع أو 10 أيام ستكون في بيتها، ولكنها تعبانة ومحتاجة وقت نطمئن عليها أكثر، ولكن الحمدلله بقت أحسن كثير برعاية الأطباء ودعاء الجمهور».
وأضاف عن حالتها: «هي قليلة الكلام لأن الموضوع متعب ومحدش بيزورها، لأن الزيارة ممنوعة عنها، وشكرًا لدعوات الناس واهتمامهم، وإن شاء الله ياسمين تطلع قريب وأنا عارف أنها قوية، واحنا مش بنحب نتكلم عن مرضنا وكنت مانع ظهوري أو كلامي في أي قناة ولكن دي الحالة اللي اتكلمت فيها».
وأوضح: «ياسمين مدخلتش في غيبوبة زي ما طلعت إشاعات بس عملت عمليتين في المعدة وده مش حاجة سهلة ودخلت بعدها العناية فضلت فترة، وبعدها انتقلت لغرفتها وكان ممنوع عنها الزيارة».
وتابع: «مقدرش أقول إن ياسمين ضحية خطأ طبي، في نقابات بتكلمنا ولازم النقابات تتدخل في الموضوع ده، والمهم عندي أن ياسمين تطلع، وده اللي يهمني فقط».
وفي وقت سابق طمأن الفنان وائل عبد العزيز الجمهور على حالة شقيقته الفنانة ياسمين عبد العزيز التي تتواجد حاليا في المستشفى.
وقال "وائل" عبر حسابه على موقع التواصل الاجتماعي "فيس بوك":"انا عايز اشكر كل الجمهور الكبير ده من مصر والوطن العربي علي اهتمامهم وحبهم لياسمين ودعاهم في أيام مفترجه وعايز اشكر كل نجوم وكبار رجال الدوله في مصر والوطن العربي الي اتصلت أو جت حقيقي حب كبير لبنتي واختي، ياسمين الحمد لله حالتها مستقره وان شاء الله خروجها عن قريب".
بينما قال الفنان أحمد العوضي زوج ياسمين في بداية فترة مرضها عبر "فيس بوك":"يمكن ببان قدامكم دايما قوي.. لكن الحقيقه انا دلوقتي اضعف انسان علي وجه الارض عشان انا روحي مش معايا، انا ضعيف جدا من غيرك انتي لازم تبقي كويسه ولازم تقومي بالسلامه".
وتابع "أحمد": " انا لاول مره اكتب من غير ما اكون مفكر انا بكتب ايه وهكتب ايه، بس انتي هتقومي ان شاء الله باذن الله عشان انتي وعداني وعد وهتتفذيه، انا عاوزك تبقي كويسه وتقومي عشان اقولك اني لو كنت ببينلك اني بحبك مره فالحقيقي واللي جوايا اني بحبك الف مره، وانا دلوقتي مش قوي زي ما انتي بتشوفيني انا دلوقتي ضعيف ضعيف جدا، لحد ما تقوميلي تاني عشان زي ما انتي بتاخدي قوتك مني انا كمان باخد قوتي منك".
واختتم "العوضي" حديثه قائلا:"قومي عشان انا بحبك، بحبك اكتر بكتيير من كل الكلام اللي انا كتبته.. اكتر بكتير من كل اللي عدينا بيه مع بعض من ايام حلوه ومواقف صعبه مرت علينا، اكتر بكتير حتي من الموقف اللي احنا فيه دلوقتي، انا بحبك، ادعولها تقوم بالسلامه زي ما انتو دايما بتدعولها بالنجاح والتوفيق هي دلوقتي محتاجه دعواتكم".
وكانت آخر الأعمال التي جمعت العوضي بياسمين مسلسل "اللي مالوش كبير" الذي عرض في رمضان الماضي.
