انتقدت الناقدة الفنية ماجدة خير الله أحد المشاهد بمسلسل لحم غزال، والذي عرض بالأمس أولى حلقاته، وهو مشهد حرق الفنان حمدي الميرغني.
وكتبت ماجدة على صفحتها الخاصة بموقع التواصل الاجتماعي فيسبوك: لما تكون بتحمر سمك أو لحمة والطاسة تتحرق، الريحة والدخان يملي المكان عدة ساعات، ولازم الشفاطات تشتغل وتفتح كل شبابيك البيت لتتخلص من الريحة، مش كده برضه؟ طيب لو بتحرق بني ادم بحاله في شقه ضيقه في حاره بيوتها مزنقة في بعض!! ممكن تختفي الريحة وأثار الجريمة بعد قد أيه؟.
وأضافت، المشهد كالتالي في مسلسل لحم غزال، غادة عبد الرازق تستدرج الديلر حمدي الميرغني، حيث تعتقد أن له يد في اختفاء ابنها، ثم تدلق عليه بنزين وتولع فيه!! وطبعا يقعد يتحرق عدة ساعات، بدون أن يصرخ أو يصدر عنه أي صوت، وعندما يتجمع الجيران، إثر تصاعد الرائحة تفتح غاده عبد الرازق الباب بمنتهي الثبات الانفعالي وتقولهم أن حله أتحرقت منها، وتقفل الباب وخلاص كده! وتفضل الشبابيك مقفولة، ومفيش أي أثار حريق في الشقة! حتى مساء نفس اليوم عندما تتعاون غاده ومي سليم على نقل بقايا الجثة في سيارة!!.
وتابعت، عادي جدا السيارة تدخل الحارة وغاده ومي في ملابس مختلفة ونظارات، وقال كده محدش حاياخد باله!! طبعا تفصيله زي دي ممكن تقفل المتفرج من المسلسل تماما! في الحلقات الأولي من أي مسلسل رمضاني مفروض أنه ينافس عدد صخم من الأعمال الكبيرة، لازم يلتزم كل صناع المسلسلات بما نطلق عليه براعه الاستهلال، عشان تسحب اهتمام وفضول المشاهد وتدفعه لمتابعتك ! ولكن هنتستهبل فيها من الأول يبقي يفتح الله فيه مسلسلات كتير غيرك تستحق الاهتمام!".
