علشان "الهبد".. اللي حجزوا في "مراسي" هايتحذفوا من بطاقات الدعم وتكافل وكرامة

منذ أيام والدنيا في مصر المحروسة قايمة و"مابتقعدش" على سيرة الناس اللي حجزوا الفيلات ام 115 مليون جنيه.. وتلاقي الخلق مالهمش كلام غير عن الفلوس المستخبية تحت البلاطة، بلاطة ايه بس اللي تشيل الملايين دي كلها، لدرجة ان الواحد خايف على العالم اللي حجزت دي تجرى لهم حاجة نتيجة الـ 100 مليون "عين حسود" اللي يندب فيها عود ويبقى ذنبهم في رقابي الناس "القرارة" اللي مش سايبة حد في حاله.

لأ والأكادة.. واللي "يفقع المرارة"، ويفقع الكرشة والفشة والله، الزحمة الرهيبة اللي الخلق عاملاها علشان خايفين ما يلحقوش.. والأنكت من كده الشركة اللي مش عارفة تجيب لهم كراسي ولا تعمل لهم "تاندة" ترحمهم من الشمس "الحراقة"، طيب يعني اذا كنتوا مش خايفين على البشر، خافوا عالفلوس احسن تسيح.. هي مش بقت بلاستيك برضه ولا انا غلطان.

واحنا من جهتنا كصحفيين "أد الدنيا وما فيها" بنطالب هؤلاء "الحسوديين"انهم "يسيبوا الناس في حالهم" و"يحلوا عن سماهم"، وبنحب نطمن "كل شاب اتخلق بيعمل قلق" انه حتما ولا بد ان الحكومة والسادة نواب البرلمان مش هيسيبوا الدنيا تمشي كده "سداح مداح"، يعني بكل تأكيد هايتقدم "نائب موقر" يطالب الحكومة بأنها تاخد قرار حاسم حازم صارم بحذفهم من بطاقات التموين، ولو ثبت ان حد منهم بيقبض معاش "تكافل وكرامة" هيتحرم منه وقتي.. أومال إيه "زمبأولكم" كده.. هو انتو فاكرينها سايبة ولا سايبة يعني.

وعموما وقبل ما ننسى: 115 مليون مبروك عالفيللات الجديدة بس ما تنسوش تزفروها، يعني تدبحوا اي حاجة باربع رجول وان مالاقيتوش ممكن تدبحوا فرختين برجلين.. بس المهم ربنا يرحمنا وما يطلعش اللي سرهم باتع عالتليفزيون ويقولوا للحكومة: شفتوا الناس مكوشة على قلبها فلوس ما تتعد.. ويجعله عامر.