المواطن الغلبان حسن حصاوى يغشى عليه من حين لآخر.وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشى عليه.
( وحدث أن التقى حصاوي هذا الأسبوع بالرئيس المخلوع في مخبأة وحضر جانبا من لقاء سيادته مع السيدة أشتون المفوضية الأوربية وعندما انتهى الاجتماع ومشت نظر مرسي إلى حصاوي بدهشة )
مرسي
و أنت تبقى مين بقى؟
حصاوي
أنا حصاوي.
مرسي
وأنا مرسي.
حصاوي
طيب.
مرسي
طيب إيه؟ أنا مرسي العياط. أنا رئيس جمهورية مصر العربية. فاهم؟؟
حصاوي
ما يمنعش. بس ما تعيطش.
مرسي
وأنا في نفس الوقت الفريق أول القائد العام للقوات المسلحة لجمهورية مصر الفلسطينية.
حصاوي
واضح على شكلك إنك داخل مصر عبر أنفاق غزة.
مرسي
لا أبدا أنا كنت في وادي النطرون.
حصاوي
مش فاهم. حضرتك جنسيتك إيه؟
مرسي
ما لكش عينين؟ جنسيتي راجل طبعا. مراتي هى اللي ست.
حصاوي
أصل حضرتك قلت إنك قائد عام القوات الفلسطينية.
مرسي
وماله؟ ذلة لسان. ومع ذلك القوات الفلسطينية هى نفسها المصرية ما فيش فرق. كلنا عرب.
حصاوي
طبعا كلنا عرب السعودية والكويت و الإمارات ..
مرسي
( مقاطعا ) لا طبعا دول مش عرب. القطري معلش وأنا كان قصدي أقول إنى القائد ( الأعلى ) للقوات المسلحة المصرية.
حصاوي
حضرتك اترقيت. ألف مبروك.
مرسي
لأ أنا قائدكم ( الأعلى ) من الأول .بس كنت ناسي.
حصاوي
وأنا كمان بقول مش معقول .حضرتك مش شكل الفريق السيسي خالص.
مرسى
طبعا, أنا بدقن وقورة وهو لأ. ولما الولية أشتون اللي كانت عندي من شوية اشتكيت لها إن فيه عصابة خطفتني من القصر الجمهوري وجابوني هنا. وقلت لها تبلغ العالم كله.
حصاوي
غريبة. دا العالم كله عارف أن مرسي هو الرئيس...
مرسي
( مقاطعا) قولهم والنبي.
حصاوي
..المعزول.
مرسي
أفندم؟ لأ انت بتلخبط .دكها اسمه مبارك.و دا اتعزل من زمان.
حصاوي
أنا سمعت إنه تنحى زى عبدالناصر .
مرسي
أبدا أكتر من 30 مليون تظاهروا ضده لأنه كان بيحبس الإخوان وعشان كده أجبروه يعتزل الحكم.
حصاوي
وبعدين؟
مرسي
حبسوه على ذمة كذا قضية مؤبد في واحدة ولسه بتتنظر لكن هيتسجن قريب جدا بإذن واحد أحد.
حصاوي
أه. بس أنا سمعت إنه جاب بلطجية وهربوه من السجن هو ورجالته ومش كده وبس وخلاهم يحرقوا الأقسام ومؤسسات الدولة وفيهم ناس كانوا بيطلعوا فوق العمارات العالية ويقتلوا المتظاهرين.
مرسي
( ضاحكا بسعادة ) دا صحيح. أصلهم عيال ناشنجية ما فيش زيهم متنقيين
ع الفرازة.
حصاوي
طب والموقف إيه دلوقت؟
مرسي
تمام. أمريكا والعالم الغربي كله معايا دا غير تركيا وقطر وإسرائيل. وأديك شايف وفد رايح ووفد جاي. (متلفتا حوله ثم هامسا) دا غير إن لينا ناس بتوعنا جوه الوزارة اللي شكلوها وبعض الإعلاميين معانا بس مضطرين يمسكوا العصاية من الوسط.
حصاوي
لا يا شيخ؟
مرسي
طبعا, ودول معطلين الدنيا بحجة حل الأزمة سلميا. لكن هم بيضيعوا وقت لحد ما ييجي المدد من غزة. ولحد ما أمريكا تنفذ خطة إنقاذي من هنا بطيارة هليكوبتر. قولي أنت بتشتغل إيه ؟
حصاوي
أنا خالي شغل.
مرسي
هتشتغل معايا. قلت لي اسمك إيه ؟
حصاوي
حصاوي.
مرسي
يعني إيه ؟
حصاوي
يعني حمار سعادتك.
مرسي
حلو مادام حمار هتبقى تقدر تشيل عني كتير ومن هنا ورايح هتبقي دراعي ورجلي.
حصاوي
قصدك تقول دراعك وحافرك.
مرسي
دمك خفيف. هفوت لك دي المرة دي, كأنك المرشد بتاعي وبيهزر معايا.
حصاوي
بس أنت عمرك ما وعدت بحاجة وعملتها.
حصاوي
تبقى أنت من الكفرة. ولازم أٌقيم عليك الحد.( ينادي) يا سياف!.
( حصاوى يغشي عليه ثم يفتح عينيه فيكتشف أنه كان يحلم )
