المواطن الغلبان حسن حصاوي يغشي عليه من حين لآخر.وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشى عليه.
( حصاوي ذهب يزور أحد أقاربه فوجده مهموما )
حصاوي
مالك يا ابن خالي .شايفك قلقان.قولي يكونش ابنك سقط في الثانوية؟
قريبه
لا أبدا. نجح.
حصاوي
فهمت يبقي ما جابش مجموع كويس. معلش يعيدها والسنة الجاية ..
قريبه
( مقاطعا) لا يا أخي جاب مجموع عالي.
حصاوي
طب بوزك شبرين ليه ؟ دا بدل ما تحمد ربنا.
قريبه
( وهو يتنهد ) نحمده على كل حال.
حصاوي
ليه هو جاب كام بالظبط ؟
قريبه
تمانية وتسعين في المية.
حصاوي
بس؟. لأ لك حق تتقهر!. يا راجل دا عمر ما حد جاب المجموع دا في عيلتنا.
قريبه
ما أنا عارف.لكن ...( ثم يسكت ويتنهد )
حصاوي
لكن إيه ؟
قريبه
أستغفر الله العلى العظيم . أصله عايز يخش كلية الطب.
حصاوي
حقه. ما دام متفوق.
قريبه
أيوه ما قلناش حاجة. بس أصله بيفكر يخش كلية الطب اللي في جامعة الأزهر. تصور ؟.
حصاوي
وماله ؟ يجمع بين العلم والدين. دا شيء جميل.
قريبه
أنا ما قولتش حاجة بس زمايله يعني .. أستغفر الله العلى العظيم .
حصاوي
ما لهم زمايله ؟
قريبه
مش موافقين.
حصاوي
وزمايله مالهم ؟ هما جايبين مجموع زيه؟
قريبه
أبدا. دا هو أشطر واحد فيهم .بس هما قالوا له يخش كلية الطب بس بلاش
طب الأزهر بالذات.
حصاوي
عشان يركز في الطب يعني؟
قريبه
لا مش الفكرة. دول بالعكس عايزينه يطلع متبحر في الدين أكتر من الطب.
حصاوي
لأ أنا كده ما بقتش فاهم حاجة.ما هو الأزهر هو اللي هيعلمه الدين ويعلمه الطب في نفس الوقت.
قريبه
دي وجهة نظر. لكن أصحابه لهم رأي تاني.
حصاوي
طظ فيهم. يسمع كلامهم ليه؟
قريبه
أصل الواد يا سيدي. عايز يتجوز من أخت واحد من زمايله, وأصل كل زمايله متربيين سوا مع بعض.وهو خايف أخو اللي عايز يتجوزها ما يرضاش يجوزها له إذا دخل الأزهر.
حصاوي
اشمعني بقي ؟ ماله الأزهر؟
قريبه
أصل وجهة نظرهم أن الأزهر زي ما تقول مش هو اللي بيدرس الدين الصحيح. على أصوله.
حصاوي
أمال مين اللي بيدرسه؟
قريبه
يعني ..أصل أخو البنت اللي عايز يتجوزها إخوان مسلمين.
حصاوي
قولي هو بيحب البنت قوي؟.
قريبه
لأ طبعا.دول ناس محافظين.هو في الحقيقة ما شفهاش خالص أصلها منقبة.
حصاوي
كمان؟ وأفرض طلعت مقلب.
قريبة
لا أخوها قاله وأكد له أنها متدينة و مؤمنة وما بتفوتش فرض.
حصاوي
ما البنات المتدينة والمؤمنة كتير . يشوف غيرها.
قريبه
هو فعلا له صاحب تاني وبرضه عند أخت كويسه.
حصاوي
منقبة برضه ؟
قريبه
آه بس دي بقي سلفية.
حصاوي
ودي تفرق ؟
قريبه
معرفش أصل أنا مش متبحر في الفروق دي. وحتى أنا مش متأكد إذا كانت
سلفية ولا جماعة إسلامية أصل أنا بتلخبط فيهم.
حصاوي
اسمع قول له يسيبه من الاتنين ويأجل الجواز شويه ويتجوز واحدة يكون
عرفها وأتأكد من أخلاقها.
قريبه
ما يقدرش أصل لو ما اتجوزش واحدة منهم, لا الإخوان ولا السلفيين ولا غيرهم هيرضوا يدخلوه التنظيم معاهم.
حصاوي
وهو لازم يخش التنظيمات دي؟ ما كفاية عليه يخش الأزهر.
قريبه
بيقولوا ما لوش مستقبل اليومين دول.
حصاوي
يا سلام؟ دا الأزهر الشريف بقاله أكتر من ألف سنة. دا أكبر صرح إسلامي
في العالم كله. دا خرج شخصيات وطنية عظيمة وعلي رأسه دلوقت الشيخ
الطيب.و..
قريبه
( مقاطعا ) أيوه يس ما عدش موضة.
حصاوي
هو الدين كمان بقى فيه موضة؟
قريبه
المفروض لأ.( ثم وهو يتلفت حوله ويهمس) بس الأمريكان بيقولونا لازم
تجددوا في الدين بتاعكم , عشان نقدر نديكم المعونة.
( حصاوي يغشي عليه )
