تمام يا عمي... يبقي نقرا الفاتحة... بسم الله الرح....
-استني استني بس مستعجل على ايه!!
=ايه تاني حررتك!! مش اتفقنا على كل حاجه
-لسه... المؤخر
=مؤخر!!
-مؤخر بنتي الوحيدة نص مليون جنيه... أنا عاوز أأمن وأضمن مستقبلها... وبعدين مش عشان حاجه أو عشان أنا مادي وحقير وكده...انا بختبر جديتك في الموضوع
=جديتي!!! ياعمي انت طلبت شبكة 30 ألف... وشقة 200 متر.. ومهر 80 ألف وعارف إني هتداين لطوب الأرض وداخل جمعيات كتير فحت... وبرده وافقت عشان بحب بنتك وتقولي أضمن مستقبلها... طب أنا كمان عاوز ضمان
-ضمان إيه يابني؟
=انا عاوزك تضمنلي أن بنتك متتخنش بعد الجواز.... وانت عارف أن بنتك زي أي بنت مصرية ممكن تضرب في أي لحظة بعد الجواز ومعرفش ألمها...
عاوزك تضمنلي أنها تحترمني وتديني وضعي كراجل بيت... متقلبش في جيوبي وأنا نايم... متدورش في أرقام والمسجات اللي على موبايلي وهو على الشاحن.
متجيش يوم إجازتي اللي برتاح فيه تقولي خرجني عشان أنا زهقانه طول الأسبوع... متتخانقش معايا عشان عاوز اتفرج على الماتش وهي عاوزة تتفرج على سنوات الضياع وزي الوان وسي بي سي سفرة.
متقوليش اشمعنى بوسي صاحبتي جوزها جابلها الكوليه اللي نفسها فيها وأنت داخل عليا بعلبه تونه صن شاين مفتتة يالا
متضربليش بوز شبرين لو نسيت أي مناسبه تافهه من نوعيه عيد ميلادي عيد جوازنا...عيد الام...عيد شم النسيم.. عيد الجلاء
تراعي اني بنزل من البيت الساعه 8 الصبح وبرجع 11 بليل عشان بشتغل عشان الجمعيات والاقساط... مش قاعد بلعب جولف في دريم لاند أو بطقطق السمانه في جيم ساميه علوبه.
عاوزكم يا عمي تحسوا بيا...انا هبقي واحد منكم...انا عندي 25 سنه... ده انا حتى بعد مانتجوز هقولك يا والدي وكده يعني واعتبرك اب من ابهاتي
** عينه بتدمع.. بيفتكر ذكريات زباله كتير مع حماتي... امسك يابني المفتاح ده**
=ايه ده ياعمي...للدرجه دي صعبت عليك وهتديني الشقه كمان
-امسك يابني...ده مفتاح الباب الحديد اللي تحت... اهرب يابني اهرب يا حبيبي
=اهرب !!
-ايوه اهرب...ليه تدخل نفسك الدوامه دي...لييييه...اهرب وانفد بجلدك..انت زي ابني اللي مخلفتوش... اهرب متقلبش على المواجع
=طب وسلوي !!!
-سلوى ليها رب كريم هي واللي زيها... ربنا معاك يا ابني
=انت بتتكلم جد يا عمي ؟!
-ايوه يابني جد الجد... انا كنت زيك كده لما اتجوزت أم سلوى... كان طموحي يبقي عندي مستشفى استثماري كبير وابقي زي مجدي يعقوب... واديك شايف... محلتيش غير البالطو... ومستوايا بقي زي مجدي مقشه...روح يابني انا راجل كبرت وبعمل لأخرتي..ليه ابليك بلوي تفضل تدعي عليا طول عمرك
= مش عارف أقولك إيه... ربنا يكرمك... ويكتر من أمثالك... وإن شاء الله سلوى هتبقي من حور الجنة.... لما تموت معنسة جمبك
الوداع يا عمي الوداااع يا والدي
** بيروح البيت... بيصلي ركعتين شكر...وبيقرر يعمل حاجة لله... بيدبح أرنب... وبيفكر يوزعه على الغلابة... بيفتكر المثل اللي بيقول اللي يحتاجه البيت يحرم على الجامع... بياكله وينام... نوووم عميييق.
