حصاوي مندهش

تابع أحدث الأخبار عبر تطبيق
( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، لكن أحيانا يجعل من يسمعه هو الذي يغشى عليه).

( الشاب السلفي يعاود زيارة المقهى الذي يرتاده حصاوي)

السلفي: بقي دا كلام؟! يهجروا أهل سينا من بيوتهم؟!
حصاوي: وإيه المشكلة؟ دول عدد بسيط.
السلفي: برضه دا غلط، هيروحوا فين؟.
حصاوي: الدولة هتوفر لهم أماكن بديلة وبعدين دا مؤقتا.
السلفي: ولو.
حصاوي: إحنا في حرب يا محترم، مش واخد بالك ولا إيه؟.
السلفي: ولو برضه.
حصاوي: إنت ناسي لما الناس هاجرت من السويس لما كنا بنحارب إسرائيل؟. وفيهم اللي قعد لكن عشان يحارب، وبعد الحرب رجعوا لبيوتهم؟.
السلفي: بس أهالي سينا يدفعوا التمن ليه؟.
حصاوي: أولا الدولة هتوفر لهم أماكن جديدة، وهتدفع لهم تعويضات.
السلفي: لكن دا تدخل في حياتهم وحريتهم.
حصاوي: لاحظ أنهم واخدين الأرض أساسا من غير تمن، يعني قانونا هما من الأصل مش
ملاك لها.
السلفي: بس الوضع دا مستمر من زمان.
حصاوي ما قلنا الوضع دا مؤقت، ثم تهجير السكان القليل دا، ييجي إيه في التلاتين اللي اتقتلوا والمصابين من جيشنا؟ وخلي بالك أن دا حصل أكتر من مرة، عايز جيشنا كل شويه يحصل له كده والسكان قاعدين يتفرجوا كأنهم مش مصريين؟.
السفلي: بس مالهمش ذنب.
حصاوي وذنب الجيش إيه؟. وبعدين ما تنساش أن تهجيرهم كام كيلو فيه حماية لهم من الحرب لما تدور حواليهم ويروح فيها ناس منهم، ودا اللي بيحصل فعلا من وقت
للتاني،لأن الإرهاب ما بيفرقش بين الجيش وبين المدنيين.
السلفي: تنكر أن فيه أهالي من سينا رافضين التهجير؟
حصاوي: ماقدرش أنكر. لكن تنكر أنت أن أغلبهم من اللي عاملين في بيوتهم أنفاق مفتوحة
على غزه وبقالهم سنين شغالين في التهريب، تهريب السلاح وتهريب البضائع
اللي مدعومة من الدولة؟ والغلابة بيلاقوها بالعافية، دا غير تهريب العربيات المسروقة، مع أن المكاسب دي بتروح لاخواتك الإخوان اللي بياخدوا عليها ضرايب وهما قاعدين فاضيين.
السلفي: وإيه يعني ما كل أنواع التهريب شغالة على ودنه في كل مصر، اشمعني هما؟,
حصاوي: هي دي فيها اشمعني؟ يعني الدولة تصرح للجميع بالتهريب ويبقي دا العدل؟.
السلفي: ويرضيك الناس في غزه يموتوا من الجوع؟.
حصاوي: أنت عبيط ولا بتستعبط؟. ما قلنا اللي بيكسبوا هما قادة حماس ومالهمش دعوة
بالشعب، وشعبهم هو اللي بيجوع ويتقتلوا رجالة وستات وأطفال والقادة بتوعهم مستخبيين طول الوقت.
السلفي: يعني قصدك نسيب شعبهم عشان يقتلهم الإسرائيليين؟.
حصاوي: إذا كان قادة حماس مش عاملين حساب شعبهم، وهما اللي أفشلوا مفاوضات إعمار
غزه، عشان يستبعدوا منها مصر ويدخلوا قطر وتركيا، مش كده وبس،دا هما اللي اتحرشوا بإسرائيل عشان يوقفوا الدنيا وما تحصلش الانتخابات ويفضلوا هما في السلطة لأن كانت منظمة فتح هي اللي هتكسبها.
السلفي: لأ.. لأن الانتخابات مش ممكن تتعمل والبلد منكوبة ومتحطمة.. ومصر كان مفروض تقف جنبها في معركتها.
حصاوي: كانت منظمة فتح أولى أنها تقف جنب أهاليهم في غزة، لكن قادة حماس ما كانوش
هيسمحوا بكده، وبعدين ما هي مصر بتدعمهم فعلا.
السلفي: بإيه بقي؟.
حصاوي: ما قلنا بتهريب كل حاجة من عندنا لعندهم من غير ولا مليم.
السلفي: ولو. لا بد مصر تقف في خندق واحد مع غزه لأنها عربية زينا.
حصاوي: يعني نحارب دفاعا عن غزه؟ طب مش لما يتحدوا مع فتح الأول؟.
السلفي: ما هو لو مصر كانت قامت بدورها في المصالحة بينهم....
حصاوي (مقاطعا): لا بقى أنت هتفقع لي مرارتي، دا مصر قعدت سنين تحاول تجمعهم مع
بعض، وما فيش فايدة. ومصر دخلت الحرب في سنة 48 دفاعا عنها وجيشنا اتحاصر من إسرائيل في الفالوجا برئاسة الصاغ جمال عبد الناصر, لولا الإنجليز اللي محتلينا والأمريكان اللي عايزين يحتلونا اتوسطوا لنا عشان قواتنا ما تموتش من العطش والجوع.
السلفي: خلينا في النهار دا.
حصاوي: وإسرائيل حاربتنا في 56 عشان كنا مع الفلسطينيين, وبعدين في 76، ولو حسبت
قتلى الجيش المصري هتلاقي عددهم كان أكتر من كل الفلسطينيين، ومع ذلك أنا
زعلان من دولتنا،لأنها لسه بتحسس على حماس وما بتقولش بصريح العبارة أنها
بتدبر المؤامرات ضدنا، عشان تاخد أرضنا في سينا لهم، وهي اللي ساعدت مرسي
العياط وكانت عايزه تفتت مصر، على فكرة، أنا متهيأ لي أنك واحد منهم.
( السلفي يسرع هاربا من أمام حصاوي )


لينين الرملي
619



1ــ لا تفرحوا

لا تفرحوا بفوز الحزب العلماني في تونس على منافسه حزب حركة حزب النهضة
الإسلامي.النهضة سيصلح من نفسه ويعتمد على المولوتوف!.
20
2ــ نفي قاطع

نفت وزارة داخلية غزة، تورط أي فلسطيني في أحداث سيناء، الظاهر أنهم ما زلوا في
في سجون مصر ولم يهربوا منها حتى الآن!.
22
3ـــالرحمة

الصحف الأمريكية تتوقع احترام حقوق النازحين من سيناء، وأخرى (تراه خطير للغاية)
شوف رقة قلبهم وصلت لإيه؟!.
16
4ــ الحماية

أتوقع أن يشكو الباعة الجائلون عندنا لأمريكا لإزاحتهم من وسط البلد لمواقع أخرى
لأنها تراها أيضا خطيرة للغاية!.
17
5 ـــ قضية مستعجلة

كتاب مجهول لقاسم أمين يؤكد فيه، أنه لا يوجد نص في الشريعة يلزم بالحجاب.
وإنما هي عادة أصولها يونانية، مطلوب رفع قضيه ضد قاسم أمين فورا!.
27
6ـــ انشغال

يبدو أن حماس منشغلة جدا بالشأن المصري أكثر من إعمار غزه. لأنه يفضح
جواسيسها عندنا.وهذا حقها لأن كلنا عرب!.
19
7ـــ أنصر أخاك

صرح نائب أمريكي بأن إدارة أوباما تدعم الإخوان بملايين الدولارات. يبدو أن
أمريكا تبنت شعار القومية العربية وهو أنصر أخاك ولو فقع عينيك!.
23