العروسة الصينى الاصلى يتراوح سعرها بين 1200 جنيه و1500 جنيه، وطبقا للمواصفات العالمية فهى تتجنب كل مواصفات المرأة المصرية يعنى هادية مابتاكلش كتير مش بتناقش ما ببتخنش مش نكدية وبتخلف حسب الطلب يعنى مش على الفاضى والمليان، مريحة جدا لحماتها لانهم مش هيتكلموا ابدا مع بعض وبالتالى الست الوالدة هتوافق عليها فورا، أهم شيء تاخدها من المنبع علشان مايجيش تاجر تجزئة يضحك عليك ويبعهالك بضعف التمن!، أما العروسة الصينى السيلكون "المصنعة" بيوصل تمنها إلى 21 ألف جنيه ودى بقى بتكون ديما "سايلنت" يعنى هترتاح ديما من الاصوات ولا بتاكل ولا بتشرب ولا بتدخن ولا هتطلب منك فرح وتتحكم فيها بالريموت كنترول وتغير لونها زى ماتحب ولا بتعمل أي شئ في الحياة كل وظيفتها أن معتوة يروح يشتريها ويحطها في اوضته يتفرج عليها، طب يابنى دا انت بتمنها كنت خطبت واحدة بنت حلال على الأقل من دم ولحم ولما ماتسمعش كلامك هددها تتجوز عليها دمية صينى!
بس السؤال اللى بجد بقى: هل الزواج من الدمية الصينى حلال شرعا؟!.......وهل برضه لو عملوا عريس صينى هيكون الجواز منه حلال؟!.بس اعتقد أن العريس الصينى دا بقى هيبقى اسطورة يعنى بمجرد مايقعد قدام والد العروسة هتدب فيه الروح ويقوم يجرى من الطلبات والمهر والشبكة والمؤخر!
