بمناسبة الكآبة محتاجين نفرفش بعض الوقت.. نقدم لكم "خمسة فرفشة"، وضحكة من القلب مع نكت 2014:
* واحد مسطول اشتغل سواق تاكسي، شاورتله واحدة، وقف وسألها: "رايحة فين؟"، قالتله: "المهندسين"، قالها: "روحي بس ما تتأخريش".
* مواطن قطري اتصل على بيت صديق له لبناني، وردت زوجة اللبناني، سألها: "طوني موجود"، قالت له: "منوش هون"، فقال القطري: "اديني أحكي مع منوش لو سمحتي".
* صعيدي سأل زوجته: "بطنك كبيرة كده ليه؟"، قالت: "يا حبيبى دنا حامل بالشهر التاسع"، قال: "يا بنت اللذين دنا حاموتك.. دنا متجوزك من 4 شهور ونص بس"، قالته: "يا حبيبى مش انت متجوزني من 4 شهور ونص، وأنا كمان متجوزاك من 4 شهور ونص، يعني المجموع كله على بعضه 9 شهور"، قالها: "ياااااااااااااااه.. أنا فعلا غبي.. دنا كنت حاظلمك!!".
* مرة واحد بيموت فجمع عياله علشان يقول وصيته، وقال لهم انتوا لازم تبقوا إيد واحدة وطول ما انتوا إيد واحدة مفيش قوّة هاتقدر عليكم، وادّى الابن الكبير منهم عصاية فكسرها، فادّاله اتنين فكسرهم، فادّاله 50 عصاية راح كسرهم، قالهم: "شوفتوا.. طول ما انتوا معاكم البغل ده ما تخافوش على نفسكم أبدا".
* مرّة 2 صعايده بيلعبوا شطرنج، الأول: "موّت لك الحصان"، راح قام التاني ورجع بعد شوية وقاله: "سمّمت لك البهايم".
* مرّة واحد حِمش جدا لقي بنته راجعه الساعه 3 بالليل، قالها كنتى فين يا بت قولي أحسن هشرب من دمك وأقتلك، قالتله كنت سهرانة مع واحد صاحبي في شقته يا بابا، قالها خشي نامي.. تعجبني صراحتك.
* واحد بيتخانق مع مراته فبيقولها إنتى ليه ما بتحبيش قرايبي، قالتله لا والله أنا بحبهم بدليل إن أنا بحب حماتك أكتر من حماتي.
* أمير قطر راح زيارة للصين، رئيس الصين بيقولّه احنا عددنا مليار بني آدم إنتو عددكم كام؟، ردّ أمير قطر: "احنا عددنا 200 ألف"، راح رئيس الصين قاله: "يا راجل.. طب ما جبتهمش يتغدّوا معاك ليه؟".
* واحد غبي كل الناس بتقول له يا حمار، فقام في مرة قال لهم بلاش كلمة حمار دي سمّوني حاجة تانية، فسمّوه جحش، فراح لمراته فرحان بيقول لها مش الناس خلاص سمّوني جحش، قالت له وهي غضبانة: "اتنيل ما انت بكرة تكبر وتبقى حمار تاني".
* مرة واحد حشاش وقفته دورية المرور، قالوله انت مش رابط الحزام ليه، قالهم أنا مش لابس بنطلون أصلا.
* تلاتة أندال اتفقوا يشوفوا مين أكتر ندالة، الأول شاف راجل عجوز عايز يعدّي الشارع، مسك إيده وسابه في نص الشارع، والتاني عدّاه وضربه، التالت ضحك وقال أنا أكتر ندالة منكم، الراجل ده يبقى أبويا.
* سألوا واحد صعيدي: ليه قتلت أبوك؟، الصعيدي: "كانوا عاملين رحلة للأيتام وكنت عايز أروحها، المحققين: "طب ليه قتلت عمك؟"، الصعيدي: كنت عايز ابن عمي يسافر معايا، المحققين: "طب ليه كنت عايز تنتحر"، الصعيدي: "أصلهم لغوا الرحلة".
* محشش جابوه للقاضي، قاله لو قلتلي 10 حاجات بتعملها من ساعة ما تصحى لغاية ما تنام وتكون تبدأ بحرف الألف حسيبك؟، قاله المسطول: أجيبها وأحرقها وأفرطها وألفها وأولعها وأعمّرها وأمخمخ أنسطل أطفيها أنام.
* طرزان شاف مامته بتلف ورق عنب، قال لها: كام مرة قلت لك متلعبييييش في البوكسرات بتاعتي؟!.
* بيقولك مرة أبو العربي حسّ بخيانة مراته ليه، فقرر إنه يراقبها، فمشي وراها لحد لما لقيها ماشية مع راجل غيره، فقام مشي وراهم لحد ما وصلوا للكورنيش، فاستخبّى ورا الكورنيش فسمع الراجل بيقول لمراته: "إيه بقى يا أم العربي، أنا كل مرة لما أمشى معاكي أمسك إيدك اليمين، نفسى مرة أمسك إيدك الشمال"، قالتله أم العربي: "لا إيدي الشمال دي بتاعة أبو العربي"، فطلع أبو العربي وقال لمراته: "أصيلة يا أم العربي".
* واحد بخيل عنده أربع حيطان، دهن واحدة منهم باللون الأصفر والباقيين كتب عليهم "نفس اللون".
* دكتور مجانين أخد المجانين بتوعه وودّاهم البحر، قال يمكن حدّ مع جمال الطبيعة ربنا يشفيه المجانين وهما في البحر إلى بيلعب في الرملة بالجاروف، واللي بيلعب بالجردل لقي واحد منهم قاعد تحت شمسية وبيبص للبحر ومش بيلعب، سأله إنت مش بتلعب ليه معاهم، قاله دول مجانين، شوف بيعملوا إيه، قال الحمد لله ربنا شفى واحد منهم، قاله إنت بتبص للبحر ليه كده، قاله بتخيّل لو البحر ده كله ملوخية هيكفّوه عيش منين.
