أبوس إيدين الشقيانين
وأحبْ الضحكة م الغلبان
وأشيل الدعوة م المساكين
تراضي الرب لو زعلان
وأطاطي لكفْ محتاجلي
ومش لازم يكون شكلي
ما أنا أصلي ... بشر واحد
مابين العابد الجاحد
بعيش الحالة ميت مرّة
وسر الروح ... تكون حُرّة
بتسرح حتي في منامها
بتمسح وش أيامها
خطاوي طريق
تبلّ الريق
بحبة عطف م الأحلام
بتحلي الدنيا لو بغرام
وتغلي الثانية لو عاشقين
أبوس إيدين الشقيانين
وأفرد قلبي قُدامها
سواقي حنين
ترش القمح في أيامها
علي السائلين
ولا مخلوق يباتها جعان
ولا مخلوق يبات عيّان
ما أنا كُلي أنا الإنسان
ومتفرّق علي الظالمين
يزيد البرد ع المساكين
ويدفي غُناها بالأحزان
أبوس إيدين الشقيانين
وأحب الضحكة م الغلبان
