بتكتب شعر ليه؟
هو سؤال منطقي..
لكن لكل مقام.. قصيدة
وللقصيدة أعلى المقام
ممكن من هنا أبدأ
من كرهي للمنطق
وشغفي بالتأويلات الجديدة
علاقتي بالعالم أصلها الانتقام
ومحاربة الواقع مبدأ
أنا الكافر بالصراط المستقيم
رحالة بنبش فـ الطريق الأعوج
لأجل الحلم بكتب.. بديل للانتحار
بطلق دموع عوضًا ع الانفجار
أعيط أتحول عيون
وأحب أتحول لقلب
بفكر أتحول مجاز
إلخ..!
فبصحى الصبح..
أكون مخنوق من النور الغشيم
أجيب الشمس من سبت السما
أدوبها فـ كوب الشاي فيبقى غروب
وعز الصيف أحن بشوق إلى الأمطار
فأحدف إيد تزق سحابة م المخزن
أنشنها على حبيبة واقفة في طابور العيش
أخبي البول فعب سحابة تنزل في..،
زيارة الحاكم الظالم
أطلع ف السما أشجار/ أصب بحار
أخلي الأرض لونها أزرق
نجوم متنورة والقمر زي شعلة نار
أشوف ضلي بيسبقني
ويرقص لما أكون قاعد
بمثل دور لشاب وقور
وأدخل سينما أشوف حلمي الجديد
قبل أما أنام بليل
أسابق فالزمن وأسبق
وأطلق طير وأحبس ساجنه فقفصه
أقلع أي بنت بتمشي فـ الشارع
والبسهم كلهم فساتين
بدون ولا نظرة تجرحهم
أهرب ميكرفون مسجد عشان مجذوب
يعري الخلق من خوفها
أبدل قنبلة إرهابي كان رايح
يفجر نفسه فالمعبد.. بباقة ورد
وأسقط صخرة من عاملي السُخرة
أنام مرة فـ حضن حبيبتي للآخر
كأننا روح/ جسد شفاف
ماحدش ييجي ويرزل
أكبر حجمي اشوف نفسي
فـ حجم الكرة الأرضية.. أدوخها
أخلي شجاعة تغلب الكثرة
وأشوف الحق والخير والجمال
يحوز الانتصار مرة
أخالف نصي فالعرض المسرحي الأكبر
وأقابل ربنا ع البحر
أعاتبه ع الحياة القاسية
وأفضفض له وأشكي له
وأقوله إزاي مادام قادر
مايبقاش اسمك الشاعر؟!
صوتي المحايد ماقدرش يتلون غنا
بلين حدة النثر من خام الدهب
وأشكله سبايك موسيقى
غرقان فبحر التفعيلات
والموج بيحدف فيا تقاسيمه
إيدي اللي صابها الرعشة للتكسير
شغف النشاز ع القطيع
م الصعب اتصالح.. أبقى فرد كورال
أنا لا أقول ما يناسب مقتضى الحال
لكن بقول بالصمت..
ما يخلق الموال.
ماملكش تمن الماريونيت
ولا قادر أمسكهم بخيط شفاف
إزاي ماقدرتش أتحكم
فحياتي الصغرى وهتحكم
فحياة أشخاص غيري وأعمل حبكة
وسياقي تضاد عامل ربكة
مش لاقي المخرج من ذاتي
ولا لاقي المدخل ع الآخر
ماعرفتش اصيغ..
نظرية تدل على وجودي/
قيمي اللي بتسقط بالتدريج
لكن أقدر أخلقني مسيح
واصلب ذاتي بنشوة سادية
علشان أشعر بالقيمة بدون أتباع.
جوايا رقص بيتخنق فرتابة المشهد
وعايزة يخرج للبراح
وبسأل هل سامعني؟!
هو وحي أم وسوسة شيطان؟
أم هي التجربة؟!
الناس لساني ولا انا لسانهم؟!
خايف إني اتحبس إزدراء أديان
فبحتمي ف الدرع "أعذب الشعر أكذبه"
لكن براهن.. على الصدق اللي بين السطر.
من غير إدراج جوا رواية
وتحايل ع القصد الأصلي برمز
بسرد عني وعن أزمة بتشبه ليا
ونزيف الجيل اللي بيتنظر على دمه
لحد الآن.. أو جايز منسي!
مين اللي اتعاطف مع وجعي؟!
وانا بولد نص من الأحشاء
دلوقتي أحق الأكبر سن
هو اللي يقوم فالقطر لشاب بيسند ع العكاز
مازالت روحه بتحفظ حمل صديق
فزحام اختلط القاتل بالمقتول
فبقى المظلوم مش أمله يجيب حقه
ولا متأكد من كونه صحيح مظلوم
ازاي هحلم بحياة أفضل
وأنا شوفت الإنسان العصري..
مجرد تعريف!
ينصر خنجر ع الروح
أنا شوفت الحلم اللي بينجو من الأنقاض
بيموت مكسوف من أمله فجاي؟!
الخوف م الشمس وبكرا جديد
كل دي تفاصيل واجبة الذكر
فبلاش الطور اللي تقبل وضع الساقية
يستهون بمعاني وجود غير اللقمة
وسيبوني أعرف مأساتي وألمي الخاص
قبل أما تقوم.. الحرب العالمية التالتة.
عارف هموت..
عاجز بدور ع البطولة
فالسباحة عكس تيار الحقيقة
شهيد بيتشك فشهادته
لأنه اتقتل م الشك
يلاقوا فجيبي مركب/ عصفور ورق
لسه بتتنفس وتحلم بالحياة
وياخدها بائس تحرضه ع الكتابة
و جني من وادي عبقر يقول:
قد كان شعرًا..
يمشي على الأرض الكتاب.
