وجه الفنان تامر حسنى رسالة إلى جمهوره عبر صفحته على موقع التواصل الاجتماعى "فيس بوك".
قال تامر حسني في رسالته: "صباح الورد على أغلى ناس ، ياريت كلامي توصلوه لكل حد مُحبط و يائس والله دي علامه لكل حد فيكم محتاجها انه ينشف و يتفائل بالخير، من كتر ما قرأت تعليقات منكم فيها حزن و يأس من محاولات كتير منجحتش في حياتكم احب اطمنكم بحاجه مهمه اوي، تقييم ربنا لينا غير تقييم الناس لينا يعني الناس بتقيمنا بإنجازاتنا بس ربنا بيقيمنا بسعينا".
وأضاف: "النجاح لقطه بس سعيك مشوار كبير اتأكد ان سعيك مش هيروح هدر حتى لو سعيت غلط و مشيت سكك متوديش لحلمك ، او حتى لسه تايه بين احلامك او حلمت و احبط و ناس ظلمتك عادي كل اللي نجحوا والله والله مروا بكل ده بس انت كمل مجهود سعيك عشان له كرم كبير اوي عند ربنا و في يوم من الايام ربنا هيجمعلك كرم كل مجهودك و يفتحلك بيه باب النجاح بشكل اكبر و اهم من ما انت متخيل .. عشان مجهود سعيك، فإوعى تفتكر ان مجهودك راح، مفيش حاجه بتروح عند العادل، تعبك و سهرك ليالي و حرقة دمك و قلبك و اصرارك و محاولتك تاني و عاشر كلهم هيكونوا هما في حد ذاتهم سبب عظيم في كرمك و نجاحك في شيء نفسك فيه بس هييجي في وقته او شيء اجمل مش هتتخيله، بس لازم تستمر في سعيك.. اسعى كتير عشان تنجح كتير".
وعلى مدار الفترة الماضية حرص الفنان تامر حسنى على مشاركة جماهيره من خلال مواقع التواصل الإجتماعى نصائح هامة لرسم ملامح طريقهم، ومواجهة التحديات والظروف والإحباطات، إما من خلال كلمات ونصائح ومواقف، أو من خلال مشاركتهم لمقاطع فيديو تفيد الجمهور.
يذكر أن الفنان تامر حسنى يستعد للعودة للسينما بفيلم "تاج" يشاركه البطولة ساندى، بيومى فؤاد، والإخراج سارة وفيق.
