( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيّرات، ولكن أحياناً يجعل من يسمعه هو الذي يغشى عليه ).
حصاوي: قريت الخبر ده؟ ( كلف المشير السيسي إدارة الخدمات الطبية بالقوات المسلحة بتشكيل لجنة طبية تضم كبار أساتذة طب الكبد والجهاز الهضمي في مصر لإجراء دراسة بحثية علمية سليمة على جهاز علاج فيروس سي الكبدي والإيدز ولن يكون من بينهم اللواء إبراهيم عبد العاطي صاحب فكرة الجهاز
المثقف: أنا مش فاهم إيه حكاية الجهاز ده ؟
حصاوي: ولا أنا بس بعض الناس بتقول إنه كوسة.
المثقف: وإيه اللي دخل الكوسة في الموضوع ؟ هي الكوسة بتعالج الأمراض ؟.
حصاوي: تقريبا يعني يقصدوا بالكوسة الواسطة والمحسوبية.
المثقف: لكن فيه ناس شهدوا إن الجهاز ده شفاهم من أمراض الكبد وحتى الإيدز.
حصاوي: أيوة دولهم ردّوا على اللي شككوا في الجهاز وقالوا لهم فلفل شطة.
المثقف: ماله كمان الفلفل وما لها الشطة؟ وإيه دخلهم في الموضوع ؟
حصاوي: قصدهم يعني يقولوا للمشككين في الجهاز انتم متغاظين وغيرانين إن حد مصري وصل للعلاج ده قبل الأجانب وهيبقى تمنه رخيص جداّ.
المثقف: وانت رأيك إيه؟
حصاوي: أنا شايف انه بدنجان.
المثقف: تقصد إيه بكلمة بدنجان ؟
حصاوي: يعني اختلال العقل.
المثقف: ده رأيك ؟
حصاوي: لأ طبعا، أنا مش عالم ولا دكتور، أنا بقول لك اللي بيتقال من دولم ودوكهما، ودولم ما سكتوش قالوا لهم الجهاز بتاعنا ثبت انه عظيم وماشي حلاوة.
المثقف: ترجم لي يعني إيه؟
حصاوي: يعني ماشي زي السكينة في الزبدة، وعلشان كده أصحابه ماشيين متقمّعين.
المثقف: تقصد طالعين فيها ومتآلطين؟
حصاوي: طبعاً.. وشايفين الجهاز اللي عملوه قشطة وعسل.
المثقف: قولي يا حصاوي.. انت جعان ؟
حصاوي: أبداً.. أنا بشرح لك اللي حاصل.
المثقف: بس أنا مختلف معاك وشايف الدوا ده عظيم.. شايف مش كده بس، ده حتة مارون جلاسيه.
حصاوي: انت حر في رأيك، بس خلي بالك ان التانين بقى شايفين إنها فتّة محلولة.
المثقف: فتة محلولة؟ اشرح لي دي كمان.
حصاوي: يعني شهرة من غير تعب ومكسب سريع بدون ما يعملوا مجهود، يعني زي
ما تقول كده شغل طرشجية.
المثقف: وبعدين معاك، ما تتكلم عدل وتقول حاجة واضحة ومفهومة.
حصاوي: ما هو دولهمّا مش مقتنعين بالعلاج الجديد، ويقصدوا بشغل الطرشجية إن العلاج بيدل على افتقار الخبرة وعمل أي شيء ناجح.
المثقف: طيب وبعدين؟
حصاوي: ولا قبلين، اللجنة اللي اتشكلت بتدرس الموضوع عشان تقرر الحقيقة.
المثقف: طب وإذا شافوا إن العلاج سليم ونافع فعلا.
حصاوي : خلاص.. يبقي في الحالة دي صافي يا لبن حليب يا قشطة.. والمشككين يصالحوا أصحاب الاكتشاف ويبقي الاتنين سمن على عسل.
المثقف: بقول لك إنت جعان، فيه حد يناقش دوا جديد بالألفاظ دي؟
حصاوي: أصل المشككين قالوا على الطبيب اللي أشرف على اكتشاف الدوا إنه كفتجي.
المثقف: إنت هتجنني؟ اشمعنّى كفتجي؟
حصاوي: هو تعبير مقصود بيه - في الحالة دي - فساد الإدارة وسوء الخبرة والعشوائية.
المثقف: وإيه دليلهم على كده ؟
حصاوي: عشان قال إنه هيعالج المريض بإنه يديله حاجة تموت الفيروس عن طريق تحويله إلى أحماض أمينية، وبكده كأنه بيديها للعيان زي ما تكون صباع كفتة، يقوم يخف على طول، الظاهر هو اللي كان عايز ياكل.
المثقف: والله ما فيه حد جعان غيرك.
حصاوي: أنا طول عمري جعان فعلا.. بس هو خانه التعبير، كان أحسن من كده يقول إنه هيدّي المريض حتة كوارع، حتة من الموزة، كده يعني.
( المثقف يغشى عليه )
** هرش مخ
1 - تمثيل الشعب
في انتخابات الرئاسة، القانون لا يسمح إلا بعشرين مليوناً لنفقات الدعاية، وطبعاً الممثلين أكتر ناس يقدروا يدفعوا المبلغ ده، ويقدروا يمثلوا على الشعب!!.
2 - الناصح
المرشح حمدين صباحي سيطعن على قانون الترشّح من الآن، فإذا خسر الانتخابات هيقول مش قلت لك هيزورا الانتخابات!!.
3 - التزوير
طبعا اللي شايف الانتخابات هتتزوّر ضده يلمّ نفسه وينسحب من دلوقت... والا إيه؟!.
4 - يا خسارة
حزنت لأحمد عز، لأن القضية المرفوعة ضدّه من الممثلة زينة قد تمنعه من ترشيح نفسه لانتخابات الرئاسة.. لنقابة المهن التمثيلية!.
5 - كشف نفسي
لجنة من الأطباء ستكشف عن المرشحين للرئاسة لتتأكد من خلوهم من الأمراض، الأهم خلوهم من الأمراض النفسية، وخاصة مرض جنون العظمة!.
6 - الراية
قرر الأزهر منع فيلم "نوح"، ورفع بعض الطلاب علم "القاعدة" دون إذن الإدارة، لأنه لم
يصدر قرار بمنع العلم ؟!
7 - سرقة مشروعة
باسم يوسف لطش مقال صحفي إسرائيلي، واعتذر للصحفي وقبل اعتذاره، فهل هو من أعضاء فريق "البرنامج" وهل دفع له أجره، أم أن باسم ما حيلتوش حاجة ؟!.
