تحدث الفنان محمد محمود عن مسيرته الفنية وبداياته في عالم التمثيل، موضحًا أنه قدّم عروضاً مسرحية على مدار 30 عامًا، لكن لم يعرفه الجمهور إلا بداية من فيلم "أمير البحار" مع محمد هنيدي.
أضاف محمود خلال حواره ببرنامج "معكم منى الشاذلي" على قناة cbc، أن المسرح مهضوم حقه بسبب عدم تصوير العروض التي تقدم على خشبته، قائلا: "أنا قضيت عمري كله في المسرح، لكن المسرح مهضوم حقه، يعني 30 سنة بمثل في المسرح لكن اللي اتذاع لي 3 أو 4 مسرحيات مع سمير غانم الله يرحمه".
تابع: "كل أعمال مسرح الدولة اللي أنا قضيت عمري فيها من يوم ما اتخرجت من المعهد متصورش منها حاجة، حتى لما بقيت بعد كده مدير عام في المسرح بقيت أقول عشان اللي حصلي ميحصلش للولاد الجداد إنه نصوّر الأعمال.. لكن مفيش فايدة رغم مطالبتي أكتر من مرة".
وعن مشاركته مع هنيدي في "أمير البحار"، قال محمود: "ده كان عنق الزجاجة اللي خرجتني وعرفت الناس إن في ممثل اسمه محمد محمود، لأن اللي شافوني في الفيلم ده قد اللي شافوني في عمري كله على المسرح، ومن بعده ربنا كرمني وتوالت الأعمال لحد ما اشتغلت مع العظيم يحيى الفخراني السنة قبل اللي فاتت".
