شيرين:
أهداني الزعيم 20 جنيها كتب فيها "من الجحيم إلى الإرهابي.. وتجمعني به صداقة طويلة.. جالنا التهاب فى الجيوب الأنفية بسبب السكر البودرة اللى شمناه فى بخيت وعديلة
الشغل مع عادل إمام مختلف عن أي حد تاني.. المناخ اللى بيوفره فى العمل مناخ مشوفتوش قبل كده
مشهد وجعنى فى «بخيت وعديلة» صورنا 5 أيام فى استديو مصر واتحرق فى المعمل
شهدت التسعينات زيادة نشاط الفنانة شيرين كنجمة سينمائية بعدما شاركت النجم عادل إمام في بطولة فيلم (الإرهابي) 1993 ثم سلسلة أفلام (بخيت وعديلة) في الأعوام 1995، 1996، 2000
وكشفت الفنانة شيرين فى حوارها لـ “لبوابة نيوز” عن أول تعاون مع الزعيم عادل امام كان فى فيلم الجحيم مع الفنانة الكبيرة مديحة كامل مشيرة إلى أن اللقاء الثانى كان فى فيلم الارهابى وتحدثت عن الـ ٢٠ جنيه تذكار من عادل امام لها فى هذا العمل المهم فى تاريخ السينما المصرية بالإضافة للعديد من التفاصيل مع الزعيم خلال مشوارها الفني معه.
فى البداية بماذا تصف الفنانة شيرين مسيرة النجم الكبير عادل إمام خلال مشواره الفنى؟ ومتى بدأت محطاتك الفنية مع الزعيم ؟
عادل إمام هو الإنسان هو الفنان القدير الذى ينطبق عليه لقب ووصف فنان قدير بمعنى الكلمة لانه اثرى الحياه الفنيه بشكل كبير اولا لانه بيحب شغله وفنه بشكل كبير ثانيا لما بنقول فنان قدير لأنه قدم مجموعة كبيرة من الأعمال الهامة على كافة المستويات سينما ومسرح وتليفزيون ناقش من خلالها قضايا المواطن والمجتمع وكان لي الشرف بفضل دعاء والدتي اني اشتغل مع الأستاذ عادل امام اول حاجه في فيلم الجحيم اخراج الاستاذ محمد راضي مع الفنانة الكبيرة الراحلة مديحة كامل وعدد من النجوم الكبار والحمد لله بعد الفيلم ده فاتت سنوات لم التقي فيها مع الاستاذ عادل إمام هو عايش مسيرته الفنيه وانا بشتغل عادي إلى أن التقينا في فيلم الإرهابي من إخراج نادر جلال من اهم الافلام فى السينما المصرية وأهم افلامى مع عادل وواجه العمل صعوبات كثيرة وتم تأجيله ٦ أشهر وكان المفروض هيخرجه الاستاذ سمير سيف وبعدين اخرجه الاستاذ نادر جلال.
وتابعت: فى فيلم الأرهابي تلقيت العديد من التهديدات وقبلنا كان الأستاذ عادل امام الذى يتمتع بالشجاعة والقوة والوعى والحمد لله تم تصويره وهو من علامات السينما المصرية.
وأضافت، مش ممكن انسى العمل دا فقد أهداني الزعيم 20 جنيه كتب فيها "من الجحيم الى الارهابي هناك صداقة طويلة” وما زلت طبعا محتفظة بالـ 20 جنيه.
واستكملت حديثها..خلصنا فيلم الارهابي وعمل الأستاذ عادل إمام حفلة كبيرة احتفلنا فيها بالفيلم وشكر الناس كلها وأنا ماشية مروحة ندى عليا وقال لي يا عديلة استغربت وقولت الاستاذ باصص لي وبيقول لي عديله يمكن في حد ورايا بينده عليه لكنه قال لي.. متفكريش كثير عديله ده اسمك الجديد في الفيلم الجديد.
طريقة عادل إمام خطفتك صح شوفى حتى فى طرحه للدور الجديد مختلف؟
خطفتني بس لا انا كنت ضايعه واتخضيت فعلا وبصراحه كنت مبسوطه جدا لما قريت دور عديلة وكنت خايفه اقول اه ومينفعش أقول لا.
والسبب إيه ؟
عديلة كانت شخصية غير الشخصيات اللي عملتها في حياتي والتحدي ازاي يعني ازاي اعملها وكان عندى تخوف كبير لأن هقف قدام أستاذ عادل إمام اه اشتغلت قدامه لكن شخصية عديلة رئيسية وأساسية لكن توكلت على الله وقولت هشتغل زي ما بشتغل وفعلا في الجزء الأول لما بنفتح بقى الشنطه وبنلاقي البودره سألته أنا عايزه أعرف حاجه يعني انا عارفه لما الناس بتشرب كحول وخمور بشوف لسانهم بيتقل بنشوفهم في الافلام كده لكن الشم ده يعني بنعمل ايه يعني الناس اللي هتشم كل السكر ده او البودره دي يعني المفروض هنعمل ايه فوضح لى لا هما بيكونوا مغيبين وعندهم حاله كده
فالشخص لسانه مش بيكون تقيل لكن بيحس أنه عايش كأنه في مكان ثاني وممكن يضحك فجأة..
فقلت تمام وبدأنا الفيلم ومع اول شمه سكر وبعدين بدأت ادهن مناخيري ببودرة السكر وقلت له ايه ده هات ثاني كده وضحكت واستنى لما ادوق وبقى شم ودوق واحنا الاثنين بعد مشاهد السكر دي جالنا التهاب في الجيوب الأنفية بسبب السكر اللي شمناه لأنه دخل في المناخير وكان شيء قاسي جدا بس الحمد لله الفيلم نجح ومن احب الافلام ليا لانه كان بيناقش مشاكل كثير البنت اللي بتحاول تجهز نفسها وعايشه في بيئه فقيره وتروح تشتري حاجات من اماكن بعيده بسعر رخيص فبتلاقي الشنطه بتحاول تدور على صاحبها وقد ايه هي امينه رغم حاجتها للفلوس يعني بيطرح قضية الأمانة مهما كان احتياجك للفلوس كم طرح ان الفلوس اللي بتيجي من الهوا بتروح في الهوا لأن الفلوس اللي بتتعب فيها اكيد بتحافظ عليها فبنلاقيهم فى الفيلم هو اشترى مرسيدس هي اشترت مرسيدس
وفى هذا العمل اكتر سؤال اتسألته ايه كمية البوس اللى كانت فى الفيلم دا وكنت مندهشه يعني سيبتوا الفيلم وتفرغتم لعد البوس والقبلات زي فيلم ابي فوق الشجره
وكان إيه ردك ع السؤال دا ؟
كنا عايزين نقول انت لو عندك بنت مثلا وهي مخطوبه وخطيبها موجود بيزوركم والاب قام يعمل شاي او قام لاي سبب فأكيد خطيبها هينتش بوسه احنا كنا بنقول للناس ان ده الواقع أما الجزء التانى الجردل والكنكة ناقش الانتخابات والناس الغلابة اللى ملهومش صوت
اشتغلتِ مع نجوم كبار ما الذي يميز عادل إمام عن غيره من النجوم ؟
الشغل مع عادل إمام مختلف ولازم لما اشتغل مع أي تانى لازم أنسى اني اشتغلت مع عادل إمام لو ما نسيتش مش هعرف اشتغل لأنه بينتقى الورق والقضايا اللى ليها بعد اجتماعى فبخيت وعديلة الجزء الأول والجردل والكنكة وهلو أمريكا الجزء الثالث من أهم الأجزاء وللأسف لم ينال شهرة واسعة لأنه اتعرض فى وقت سقوط طائرة أمريكا والعمل كان بيناقش فكرة مهمه جدًا وبنسمعها دلوقتي على لسان ناس كتير عايز أسافر هتسافر تعمل إيه مش تفكر الأول وعشان تعمل فلوس لازم يكون لك كيان في بلدك الأول.
ممكن توضحى أكتر ليه اللى بيشتغل مع عادل إمام ميعرفش يشتغل في حتة تانية وشكل الحالة داخل لوكيشن التصوير ؟
هقول مثال في البلاتوه أو اللوكيشن حتى لو في الشارع احنا صورنا في محطه مصر اللي في إسكندرية كانت الشرطة واقفه تحمينا وفيه كلاب بوليسية عشان ما حدش يبوظ الشوت فتخيلى إنك ممكن ترمي الإبره تعرفي هي فين من الهدوء.
ولما كنت أروح لمكان تصوير فى شغل جديد أقول لنفسى ايه اللوكيشن الغريب ده لإنى أنا جايه من حته ثانيه لما بروح اشوف اللوكيشن دلوقتي او التصوير دلوقتي بحس ان انا جايه فعلا من حته ثانيه وجايه من كوكب ثاني وفعلا الشغل مع عادل امام كوكب ثاني
فعادل إمام قيمة وفعلا منظم وطبعا انا وقفت قدام النجم الكبير الراحل سمير غانم واحمد بدير واحمد ادم وسعيد صالح ويونس شلبي وعبد المنعم مدبولي وفؤاد المهندس عمالقه وكل واحد مدرسه خاصه مفيش حد بيقلد حد ودول الاصل لكن المناخ اللي بيوفره عادل إمام في العمل ده مناخ انا ما شفتش زيه منظم في كل شيء مرتب واى حاجة عنده محسوبه بقدر
فمش ممكن حد هيجي متأخر على اللوكيشن وموعد التصوير ما حدش هيزعق ومفيش حد له الحق انه يزعق ده مش اجبار لا ده عشان ما فيش مشكلة أصلا.
وماذا عن تجربتك مع الزعيم فى مسلسل العراف ؟
محطة العراف من المحطات المهمة واختيار عظيم من عادل امام لفكرة العمل وناقش قضية..ابن الطريق وإن في ناس كثير بتتولد ملهاش أسامى ولا شهادة ميلاد ومن هنا كان العراف ورغم الاسامى بتاعت العراف الكتيرة إلا أنه ما معملش حاجه غلط ومن ضمن الحاجات الجميله اللي طرحها المسلسل إن العراف حب ناس في حياته ولم يستطع نسيانهم وده مش موجود
هل هناك مشاهد مش ممكن تنسيها ؟
مشهد فى فيلم بخيت وعديلة صورنا خمس ايام في استوديو مصر الديكور الخاص بشقتي وشقه الأستاذ عادل امام واتحرق في المعمل خمس ايام مجهود وتعب كبير وتكلفة كبيرة ع المنتج وطبعا دي كانت حاجه موجعة جدا وجعتني اوى وقتها لان انا من الناس اللي مبعرفش ومش بحب اعيد المشاهد بتطلع منى اول مرة بشكل تلقائي لكن تقبلنا الموقف ومفيش مفر لازم نعيد وفعلا تم التصوير من جديد وساعدني جدا استاذ عادل امام وقدر اني ابقى عديله ما هو عديلة لازم تبقى عديل عشان المشهد والفيلم يكمل
فى مسلسل مأمون وشركاه كنتِ زوجة مصطفى فهمي مش عادل إمام ماذا عن تجربتك التى تعد مختلفة عما سبق فى هذا العمل؟
مأمون وشركاه من المحطات الجميلة في حياتي رغم أنني لم أكن زوجة أو حبيبة عادل إمام وجسدت دور زوجة الفنان مصطفى فهمي وصديقه زوجته والعمل كان موضوعه حلو ومهم فكما نعلم أن عادل إمام يحرص على انتقاء ومناقشة قضايا ليست سهلة منذ بداياته الفنية يبحث عن الاختلاف واشتغل كتير وتعب كتير وقدم أدوارًا كبيرة ومهما كان دوره صغير أو كبير بياخد الدور ويطلع بيه فهو فنان كبير وقدير هو الزعيم وهو الزعيم ليه لانه استطاع أنه يعيش كل هذا الوقت على القمه ممكن واحد يعمل 20 عمل او 30 عمل لكن انه يظل كل هذه الأعوام على القمة صعب والوحيد اللى قدر يعمل المعادلة الصعبة دى واحد بس هو الزعيم.
