كشف الفنان عماد رشاد، أنه زوج رومانسي و عاطفى، مشيرا إلى أن أى إنسان لو عامل الناس بالعاطفة سيعاملونه بالعاطفة.
وأضاف رشاد خلال لقائه ببرنامج " واحد من الناس" مع الإعلامي عمرو الليثي، على قناة "الحياة" أنه يقوم بتجهيز عشاء على ضوء الشموع لزوجته وتابع قائلا مستحيل هعمل كده و هي هتبقى وحشة معايا يعنى أنا بجبر بخاطر اللى أمامى وبيبقى كويس معايا، و أهم حاجة ريح مراتك و قول لها حاضر ، و اعمل اللى إنت عاوزه .
وتابع رشاد: "أنا تابعت حاجات على السوشيال ميديا صعبة أوى ، نصيحتى للزوج قول حاضر ، و متجيش فى الهيفة و تتصدر ، و الحاجات الكبيرة تنتهي بعشاء جميل وكلمتين حلوين ، و نصيحتى للشباب لما تعمل غلطة إوعى تعترف ، لأن الست الشرقية هتفضل فاكرها ليك".
وأشار إلى أن المرأة الشرقية صعب إنك تعترف لها ، و ده من المحبة و أنا مش هعترف و لا عمرى هعترف ، و انا بقالى ٤٠ أو ٤٥ سنة متزوج لأنى تزوجت و أنا صغير و زوجتى تركت التمثيل بعد سنتين من الزواج بعدما أنجبت ياسمين و كان قرارا خطأ و كنت اتمنى أنها ترجع تشتغل علشان كانت مركزة معايا أنا بس .
وتابع أنه كان يكتب لها على أكياس الرمل فى معهد فنون مسرحية بحبك و هى كمان كتبت له بحبك و دى كانت البداية .
