رغم كل مساوئ ٢٠٢٢ لكن كان فيها إنجازات كتير، أهمها أننا بيوتنا مقفوله علينا، يومنا بيعدي صعب سهل مش مهم المهم أنه بيعدي.
اوعي تفتكر انك جاي الدنيا تتنعم وتعيش مرتاح!!
ربنا قال: "لقد خلقنا الانسان في كبد “ يعني تعب ومشقه،
في الكد والسعي والعبادة والطاعة وتقويم النفس وكبح جماحها والامتناع عن المحرمات.
لو طلعت من ٢٠٢٢ باب بيتك مقفول ومستور، ولادك حواليك بصحة ومعافين، يبقي انت طلعت منها كسبان.
لو قدرت تمنع نفسك عن المعاصي وماتدخلش بيتك قرش حرام فأنت كسبان.
لو قدرت تكفي نفسك وبيتك، ولو بالقدر اليسير ولو بأقل القليل، فأنت ممن أنعم الله عليهم وكسبان.
لو نمت وانت مطمئن علي أهل بيتك،وأهلك اللي بعيد،و حاسس أن بلدك في أمان فأنت كسبان.
تأكد أنك ماخسرتش شيء في ٢٠٢٢ طول ما أنت كسبان نفسك واحترامك ومحبة الناس ومن قبلهم رضا ربنا.
احذر أنك تقيم نعم ربنا عليك وفضله وتختزله في أكله سعرها زاد، او شيء نفسك فيه وما قدرتش تشتريه!!
اوعي تبيع كل نعم ربنا وتبص للي ناقصك !!
أتعلم تحمد ربنا على الموجود وتشكر فضله، علشان يبارك ويزيد (لإن شكرتم لأزيدنكم ) داوم علي الحمد في السراء والضراء 🙏
افتكر دايما أن حالك أفضل بكتير من غيرك، وأن كونك ماشي علي رجلك قادر تشتغل وتسعي دى نعمه، وأفتكر ان الحرمان من نعم الدنيا ربنا بيدخره لك عوض في الاخرة.
عود نفسك علي الاستغناء، وعيش عالقد اللي بياكل لقمه بملح بيشبع، واللي بياكل اصناف والوان بيشبع برضه، النتيجه واحده ولو أختلفت الحاله، بس تخيل ان ممكن لقمتك الحاف اللي اكلتها وسط ولادك، صاحب المال يتمني يدوقها مع أولاده اللي ربنا حرمه منهم. لكن انت بفضل الله لم تفقدهم.
ربنا وزع الاربعه وعشرين قيراط بالعدل، بس أحنا مش بنشوف الحسبه صح ودايما عنينا عاللي في إيد غيرنا
ربنا أدانا الحل قال: "فقلت استغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا".
استغفر وأصبر وأحتسب واشتغل،و أعمل اللي عليك بما يرضي الله، هتلاقي ربنا وسعها من حيث لا تدري.
واوعي تكون يوم سبب في ضيق الرزق !
فإذا غضب الله على قوم رزقهم الجدل ومنعهم العمل.
فما ضاقت الدنيا. الا بذنوب العباد وما اتسعت الا بالاستغفار.
(يا عبادي كلكم جائع إلا من أطعمته فاستطعموني أطعمكم، يا عبادي كلكم عار إلا من كسوته فاستكسوني أكسكم، يا عبادي إنكم تخطئون بالليل والنهار وأنا أغفر لكم ذنوبكم جميعا فاستغفروني أغفر لكم).
قبل أن ينتهي عام ويبدأ آخر قيم نفسك كونك لم لم تخسر شيء يذكر فأنت في نعيم ورضا من الله، ادع الله دوما ان يبقيك على حالك والا يغير عليك حالا إلا لأحسنه.
