نعت الإعلامية رولا خرسا الإعلامي الكبير مفيد فوزي الذي وافته المنية اليوم بعد تعرضه لوعكة صحية عن عمر يناهز 89 عاما، وروت "خرسا" عن اللقاء الأول بينهما من خلال حسابها الشخصي على "الفيسبوك"، حيث كتبت قائلة: "استاذ مفيد فوزي مات.. انا حزينة جدا عليه..جدا.. اختلفوا معاه زي ما انتو عايزين بس محدش يقدر ينكر إنه مدرسة في الحوار الصحفي.. متهيألي كمان محدش عدى من تحت ايده.. أول لقاء بيننا كان في التلفزيون المصري في الأول مكنش حاببني اوي..وقرر يعمل حوارات مع كل المذيعين وانا وقتها كنت بقدم اخبار الناس..شدينا شوية في الكلام فقلت له.. ايه رايك نفكر ان عندنا حاجة بتجمعنا ..احنا الاتنين بنحب فيروز… فنزل الميكروفون وقال لي.. انتي تكسبي".
وأضافت رولا: "وكسبت صداقته من يوميها..واول حفلة كنا فيها سوا مع صديقتنا المشتركة غادة كريم كانت لماجدة الرومي.. واكتشفت شخص لطيف جدا متفهم جدا وفاهم اوي للنفس البشرية.. بعد كدة بقيت كل فترة اطمن عليه خاصة انه عايش لوحده واحتفلنا مع حنان بنته مرة بعيد ميلاده.. ومرة كتبت حاجة عملت علي هجوم فكلمته وكان رده.. ايه الي دخلك في الحاجات الشائكة دي..ما تعلقيش..الناس حتنسى".
واختتمت "خرسا" كلامها قائلة: "فعلا ..الناس بتنسى..بس انا متاكدة انه لو في يوم التاريخ كتب عن اهم ناس في الحوار الصحفي وطريقته وهو بيقول.. تسمح لي اسالك.. سبحان الله انا حاسة اني باسمع صوتك يا استاذ مفيد وانا بقولها… طيب مين بعد كدة حيرد علي رسايلي بكلمة اشكرك يا اصيلة ؟؟ سبحان الله ازاي بنعيش مطمئنين كدة ان كل الي حوالينا موجودين؟؟ وفجاة نصحى الصبح متفأجين انهم مشيوا؟؟ قلبي معاكي يا حنان..ربنا يصبرك علي بعد حبيب عمرك".
مفيد فوزي من أشهر الإعلاميين في العالم العربي حيث تخرج من كلية الآداب جامعه القاهرة وبعد تخرجه قرر الخوض في المجال الصحفي وبدأ حياته العملية في الصحافة المصرية من مؤسسة روزاليوسف ليقرر بعدها الانتقال إلى العمل التليفزيوني مع عدد من السياسيين والمشاهير والأدباء والمفكرين وكان أول حوار تليفزيوني له مع الأديب نجيب محفوظ.
مفيد فوزي من مواليد 19 يونيو عام 1933 لقب بـ"المحاور" كان والده فوزي سعد موظفا بوزارة الصحة، أما والدته السيدة مريم فرج فكانت ربة منزل وهي التي شجعته على نشوء موهبته الصحفية منذ الصغر، تخرج في كلية الآداب – جامعة القاهرة قسم اللغة الإنجليزية عام 1959م.
تزوج من الإذاعية الراحلة آمال العمدة في الأول من مايو عام 1968م والتي رحلت عن عالمنا في 11 مارس 2001م، وأنجب منها ابنته الكاتبة الصحفية حنان مفيد فوزي.
ثرى مفيد فوزي عالم الصحافة والتليفزيون بتحقيقاته المتنوعة، وحواراته الناجحة مع أهم الشخصيات السياسية والأدبية والفنية على مستوى العالم العربي خلال مسيرته المهنية، يعد أول من قدم فكرة «تلفزة الصحافة» أو «تصحيف التليفزيون» والذي سار على دربه فيما بعد العديد من برامج الصحافة التليفزيونية على شاشة التليفزيون المصري.
