بكلمات مؤثرة حرص الفنان آسر ياسين على نعي مساعده الخاص الذي رحل مؤخرا عن الحياة. ونشر آسر صورة تجمعه بساعده "مجدي"، وعلق عليها بتدوينة تحمل عنوان إهداء لمجدي، وقال فيها: "إهداء لمجدي! كان المساعد بتاعي لأكتر من ١٤ سنة، قصته فيها كمية عِبر حياتية غير طبيعية.. اشتغل كهربائي لمدة تلاتين سنة وبعد كده حصتله حادثة موت اتكتبله فيها عمر جديد.. ومن هنا ابتدا يشتغل مساعد ليا بناءً على نصيحة أبويا اللي رشحهولي عشان إخلاصه وأمانته.. عمره ما كان يتخيل إنه يشتغل في السيما ويقابل روبي ومنى زكي ومحمود حميدة!! ومش بس كده، ده كمان وقف قدام الكاميرا كذا مرة في أدوار شرفية.. كل الناس حبته لأنه يخش القلب على طول لطيبته وبساطته. ".
وأضاف قائلا:" كان يخاف عليا جدًا بالذات مشاهد الأكشن.. وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست. اللذيذ في الموضوع إنه كان ييجي يسألني عن نصيحتي في حاجات شخصية على رغم فرق السن..مفيش طفل يشوفه غير ولازم يبتسم لا إراديًا بسبب وشه البشوش والطفولي.".
واختتم أسر التدوينة قائلا:" مجدي رحل عن عالمنا من ٣ أسابيع، ولحد النهاردة أنا ما اتكلمتش عنه. يمكن لأني بتجنب ده أو أني معتبره ماحصلش، مش عارف.. بس اللي عارفه كويس أوي أنه حقيقي واحشني. سلام يا ميجو الفاتحة ".
