النهارده كلمتي بالعاميه عشان أخاطب وجدانكم وكلامي يوصل لكم من أسهل الأبواب
هسألكم سؤال هل ممكن الابن يكره أهله (أبوه وأمه)!!؟
الاجابه:أيوة ممكن مش كره صريح لكن تعالوا نشوف
بس الاول حاسبوا نفسكم كآباء وانا هبسطها لكم 👌
طبعا الموضوع شائك، وأى كلام فيه صعب لأنه أمر له أبعاد خاصة، وفي منتهي الحساسيه بس انا هوصلكم المعني ببساطة وانت كأب قيم نفسك
ببساطة زى ما الأب والأم لهم حق الولد كمان له حق وزى م قال رسول الله صلي الله عليه وسلم: " رحِم الله والدًا أعان ولده علي بِره " .
الاب او الام بوجه عام بيشوفوا الطفل دايما مهما كبر طفل مساحه الحريه مغلقه، وأنه لازم يلزمه بالمساحه دى، أو الأسلوب اللي مابيتغيرش بتغير العمر الزمنى للطفل.
فبيحصل أن يصدر تصرفات من الوالدين يقابلها ردود أفعال من الأولاد فماتزعلوش بس حاسبوا نفسكم
عندكم مثلًا...
- لما أولادكم يقفلوا علي نفسهم الاوضه بالساعات، ومايحبوش القاعده معاكم بسبب الانتقاد والكلام اللي زي السم اللي بتوجهوهو لهم ومبرركم خايفين علي مصلحته ✋
- لما يكبروا ويكرهوا كلمة " إن شاء الله "..لان كل طلب ردكم أن شاء الله، كنوع من التأجيل أو بمعني تاني لما يحلها الحلال أو توعدوا وتنسوا وتخلفوا وعدكم ومايحصلش ولا حتى تكون في مجرد محاوله منكم انكم توفوا بالوعد.
فيفقد الابن ثقتة في وعودكم.
- لما شخصياتهم تبقي ضعيفه وما يبقاش عندهم ثقه في نفسهم، لانكم ما بتدوهمش فرصه يعبروا عن اللي جواهم، ودايمًا بتستغبوهم، وبتقللوا منهم أو تقطعوا كلامهم وتتفهوا من أفكارهم.
- لما يكرهوا الصلاة والمذاكرة لأن من أقل غلطة يغلطوا تسألوهم صليتوا !!!
ذاكرتوا ولا لاء ؟ كأن الصلاة والمذاكره عقاب.
- لما اولادكم يدوروا علي الحنيه والطبطبة بره البيت، لانهم ما لقوهاش في حضنكم، ويدورا علي حد يسمعهم ويحتويهم.
- لما يكرهوا النقاش معاكم لانكم بتقللوا من آرائهم، سواء في السياسة او في الحياة عامةً، أو مابتسمعوش ليهم اصلا.
-لما كل بنت حبت تحس إنها بنوته بلبس أو ميكاب جوه بيتها، تتهموها أنها غير سويه، ومنحرفه وكل ولد سمع اغاني أو خرج مع أصحابه بقي تلفان.
- لما يفشلوا في الكليه اللي أجبرتوهم عليها، ورسمتلهم مستقبلهم علي ذوقكم وحرمتوهم من حلمهم اللي مؤمنين بيه !!
- لما يكرهوا السفر معاكم في رحله او غيروا، لأنكم بتتعصبوا عليهم وممكن تقلبو جو الرحله لي نكد وغَم !
- لما يحبو أكل المطاعم، لأنكم بترفضوا تعملوا طرق جديده، في نفس الاصناف الموجوده من اكل البيت، وتفرضو عليهم الحاجة فرض!
- لما اولادكم يكرهوا بعض لأنكم بتفرقوا في المعاملة بينهم وتميزوا واحد على التاني !!
_لما تصغروهم قدام الناس دايمًا وتقللو منهم، او تدخلوهم في موالاة ومقارنات مع غيرهم وتعملوهم مقياس لكل شي وتحسسوهم بالأقليه والدونية.
-لما تستخدمو العنف وتمارسوا سلطتكم رغم أن ممكن يكون حل المشكلة بسيط، بس علشان ترضوا الشيطان المتكبر اللي جواكم على حساب اولادكم.
لما تصرفو عليهم وتحسسوهم دايمًا انهم تقال عليكم، كأنكم بتحاسبوهم على كل مليم بيتصرف عليهم، وكأنهم هما اللي جايين باختيارهم.
- لما يطلعوا حاسين بالدونيه والنقص من جوا ودايمًا تفكيريهم محدود، بسبب كلمة " انا لما كنت قدرك كنت وكنت وكنت دون ادنى تقدير أو شكر لحجات هم بيعملوها ومتفوقين فيها!!!
- ما تزعلوش لما بناتكم يبقو تعيسات ف حياتهم الزوجيه، بسبب عريس فرضتوه عليها فرض، واجبرتوها عليه مع ان حقها الشرعي أنها تقبل أو ترفض
-لما أبنك أو بنتك قلبى يتكسر ونفسيته تتدمر لما يشوف صديقه وهو عايش بين أب وأم بيحتوه، وبيقدروا يسمعوا له ويحسسوه أنه له شخصية وكيان
- لما كل يوم قبل نومهم تكون في غُصه في قلوبهم منكم. ويعاتبوكم في غرفهم بالسر، متخيلين قدر الفجوه في بيوتكم بسبب قلة التفاهُم والاحتواء
- ماترجعوش تزعلوا بعد عمر طويل لما تموتوا وعيالكم مايحنوش لذكراكم لأنكم كنتم زي الطوق علي رقابهم، وبفراقكم اتنفسوا وبقوا أحرار، ما تزعلش لانك ما قدرتش تزرع حبك جواة وماعرفتش تعمل ورائك ولد صالح يدعوا لك.
سيدنا علي قال: لا تربوا أولادكم علي أخلاق زمنكم فانهم خلقوا لزمان غير زمنكم !!
توضيح هذا الكلام لمحاسبة أنفسنا وليس تبريرا لعقوق الآباء والعياذ بالله ولكن نفسيه الاطفال بيتم تشويهها بدون قصد من الآباء ويخرجوا رجال ونساء غير اسوياء يعيدون تربيه أطفالهم بنفس المنطق لإخراج مابهم من طاقه سوداء الا من رحم ربي.
