قال الرئيس عبدالفتاح السيسي، كتير من الناس بتتكلم عن مراحل زمنية يأرخ سنتين تلاتة عن واقع يعيشه ويتحدث عنه، حياة الأمم لا تتربط بيوم وليلة وإنما تاريخ ولازم نكون فاهمين كمواطنين ومسئولين في الدولة اللي بنعمله هيستمر آثاره الطيبة وغير الطيبة للسنين القادمة"، مؤكدًا: "أنا مش بعادي حد والناس بتستغرب دا لأن الكون مش مبنى على كده.. أنا بقصد العداوة بفكرة الاستعداء وهي فكرة بعيدة وحاطط 3 نقاط ولازم نعتبرهم العدو الحقيقي لنا الفقر والجهل والتخلف".
وأكد خلال كلمته في الندوة التثقفيفية الـ 36 للقوات المسلحة: "في2011 و2013 اتكلمت في الموضوع دا كتير وقلت آثار اللي حصل في البلد له تأثير علينا ولا ملهوش، الجيش قعد 8 سنين في اعقاب 2011 وتواجد في سيناء في المنطقة دي هو والشرطة في اقتتال مع قوى الشر والتطرف والفكر المتخلف من ساعتها حتى الآن وهو جيش مصر مبنى بالأسر وزوجات القادة، ومصر دفعت الثمن كبير أوي، وانتبهوا كلكم لكلامي واحنا بنحارب موقفتش الدولة 15 سنة زي ما حصل في 1967 لحد 1982 خليت الدولة تشتغل بأقصى طاقة ممكنة ، مكنش ينفع نخلي البلد تستنى 8 سنين، واللي زاد فيها السكان حوالي 25 مليون لهم مطالب في كل قطاع".
وأردف:"كان هيبقى مبرر وقتها اقول اننا في حرب وكل جهود الدولة وقدراتها هتجند لصالح الحرب، انتوا شايفين، وكنت اتمنى من الشئون المعنوية تجيب احد المواقف فيها استشهاد لكثير من ولادنا وجنود واننا بنقول خلي بالكم يا مصريين دي محاولة لكسركم"، مؤكدًا: "بقول كلامي دلوقتي لأننا دفعنا ثمن كتير أوي مش انا اللي دفعته ولا الحكومة بل كلنا في الدولة ومش مناسب ابدًا حد يقول انا ذنبي ايه دي بلدنا ولازم نخلي بالنا منها".
وأوضح: "أول مؤتمر عمله الرئيس مبارك في 1982 بعد ما اطمأن ومكنش فاضل غير مشكلة طابا وبعد ما رفع العلم في ابريل والارض رجعت وقال نخش نشوف مشاكل مصر بعد 15 سنة من الحرب احسبوا 1967 من اولها مش يوم الهزيمة، والدولة توقفت 15 سنة معملتش حاجه، كان ممكن نعمل كده ونحشد والاعلام يتكلم في المنطقة دي ونجيب الأحداث".
وأكمل: "لما كنت بسمع موسيقى القوات المسلحة الدولة كلها كانت عايشه كده وكل قرش كان يبقى اقتصاد حرب لصالح الكرامة والكبرياء والنصر اللي بنحتفل بيه وكان ممكن نعمل كده وكان مبرر بس قولنا اللي بيعمل الارهاب والاقتتال هدفه فقر البلد وتخلفها ولكننا قلنا مش هنمكنه من دا ولكن هنبني على قد ما نقدر"، موضحًا: "الحمدلله المعركة يعني بنحقق فيها نجاحات طيبة جدًا لكن بخير كبير الحمدلله وعايز اقول ياترى يا مصريين كلكم مستعدين زي ما استعديتوا قبل كده من 1967 ولحد 1982 تحملتوا الكلفة والتضحيات اللي قدمتها الدولة لتجاوز ازمتها في الوقت دا ولا هنيجي دلوقتي بشوية شائعات واكاذيب فهماها الناس وعارفاها".
