مش عارف ايه سر التقليبة والنعكشة الغريبة اللي دايرة في البيوت المصرية اليومين دول.. هي نسب الطلاق قلت ولاحاجة وعايزين يعلوا الرانك.
كل شوية يجيبوا مفتية من هنا أو "خبيرة" من هناك، ومرة تقول لك "من حقها" مش عارف ايه، ومرة تانية "مش واجب عليها" ايه، وطبعا المنتظر في الناحية التانية يطلع مفتيون منحازون للراجل ويقولوا من حقه ومش واجب عليه.
لما الموضوع يوصل لدرجة "مش واجب عليها ترضع" يبقى ده تجاهل لأسمى معاني الأمومة وأقصى درجات السعادة بالنسبة لكل امرأة التي تشعر بقمة الفرح وهي ترضع صغيرها.
ولما يفضلوا برضه يقولو مش من حق الزوج انها تخدمه وانه فرض عليه يجيب لها خدامة فده برضه ينطوي على "اسفينين" قابلين للانفجار: فلما زوجة مرهفة الإحساس تسمع الكلام ده وترفض القيام بمهامها المنزلية، فمن المتوقع في المقابل حدوث مشكلات تهدد بالانفجار، أما الأسفين الثاني فان الخدامة دي برضه ليها حقوق مش هي بني أدمة برضه ومش واجب عليها تخدم جوزها المفروض عليه يجيب لها هي كمان خدامة ولا احنا هنرجع عصر الجواري والسبايا والشريفات والحريرات.
والله يا جماعة ده بجد اللي يتقال عليه "هري" و"نكت".. فالعلاقة بين الزوجين يجب ان تكون أرقى وأسمى من كل هذه الاهتراءات.. واوعوا تنزلقوا لمستنقع المعايرة وكل واحد يقول انه بيعمل ايه علشان التاني، صحيح في زوجات مظلومات تماما ضحايا ازواج لا يستحقون صفة الانسانية.. لكن في مثل هذه الحالة الواجب نصبرهن مش نألب عليهن المواجع.
فلا الزوج نعيم مطبق في كل الأحوال، ولا المرأة مظلومة وضحية على طول الخط.. فأرجوكم سيبوا الدنيا ماشية الناس فيها اللي مكفيها.
