مشكلات الرجل والمرأة لا تنتهى، قصة اليوم لامرأة ذعرت عندما تعدت الثلاثين من عمرها، فوقعت بمشكلة لا تستطيع حلها وهي حبها لشخص يريد محو كرامتها وشخصيتها من الحياة.
عرضت «ع.غ» قصتها من خلال وسائل التواصل الاجتماعي في محاولة منها لإيجاد حل قائلة: "أنا دكتورة وتخطيت التلاتين عام من عمري وتمت خطبتي لشاب يصغرنى بثلاثة أعوام، وهو مؤهل متوسط لكن الحقيقة له مميزات جميلة منها أنه شاب ورياضي ووسيم وفيه كل المواصفات اللي اي بنت تتمناها.
وتابعت المشكلة أني اتعلقت بيه اكتر من اللازم وبقيت مش متخيلة حياتي من غيره حرفيا وخصوصا بعد لما حصلت بيننا مشكلة وسابني وانا بصراحة ماقدرتش وروحت اترجيته وبوست إيده برغم أنه هو الغلطان عشان يرجع لي واترجيت والدته.. والمشكلة إنه من بعد الموضوع ده بيتعامل معايا بتعالي وبقي يتحكم فيا في كل تصرفاتي.. وكان آخرها إنه قال لي اعملي حسابك إني ما بمضيش علي مؤخر ولا قوايم وانك هاتديني مرتبك كله من بعد كتب الكتاب".
واستطردت: "مش كده وبس ده قالي إن بعد ما أبقي في بيته لازم أسيب بره الباب حاجتين شهادتي وكرامتي ومعاملته اتغيرت جدا كلها بقت أوامر وشتيمة وتهديد بالضرب وعشان كده أنا بقيت باستئذنه في كل صغيرة وكبيرة عشان أحفظ كرامتي.. تنصحوني بإيه غير إني أسيبه لأني بحبه وما قدرش أسيبه تحت أي ظرف من الظروف".
من هنا بدأت التعليقات تنهال عليها بعدم الاتفاق معها فى إكمال هذه العلاقة من الرجال والنساء، فقالت إيمان خضر: "نصيحه لوجه الله بلاش الارتباط دا انتي بتوهمي نفسك إنه بيحبك الزواج ارتباط قوي شرطه المودة والرحمة وهو كدا علي حسب كلامك مش ناوي لا علي مودة ولا رحمة، الزوج في حياة الزوجة امان ودافع انها تكون احسن وسند ليها مكمل ليها في كل حاجه ناقصه فيها وحاجات تانية كثير، لكن بالشكل اللي انتي بتحكيه كدا حياتك هتبقي صعبه، ليه تنسي شهادتك وكرامتك!! امال مين اللي المفروض يحافظ عليهم لما جوزك مش هيحافظ عليهم ؟؟ الاسلام قال للمرأة ذمه ماليه مستقله وإذا اديتي او صرفتي حاجه فهذا باختيارك لكن مش فرض! انتي اللي مفروضه عليه
بتوهمي نفسك انك ماتقدريش تعيشي من غيره ! لا تقدري مافيش أعز علي الإنسان من أبوه وأمه ولما ربنا بيقدر وفاة حد منهم بنكمل ونعيش، ارحلي من العلاقة دي بكرامتك بدل ما ترحلي منها مطلقة أو معاكي طفل وربنا يهديكي للصح".
وفي نفس السياق، أضافت رانيا جمال، "دي رسالة ربانية ربنا بيكشفلك وانتي علي أول الطريق، لازم تسيبيه دلوقتي أسهل بكتير ومفيش خسائر بالعكس هتكسبي".
فيما قالت إسراء بهنسى: "أنا آسفه لكن انتي إنسانة احتياجاتها العاطفية هتوديها ورا الشمس انتي محتاجة دكتور نفسي محدش طبيعي هيقبل كدا ولو روحه فى الطرف التاني".
وترد "ايه جلال" بشىء من السخرية: "قال كلمتين حلوين أوي بينوا شخصيته وانتي لو ذكية شوية كنتي فهمتيهم قالك انسي شهادتك وكرامتك ده يعرفك انه إنسان نرجسي وللأسف مش عايز يحس أنك أعلي منه استغل حبك ليه وهو فرحان بنفسه وبيحاول يعمل شخصيه بقا وكمان خلاكي مريضه بيه إلي هو مبقتيش عايزه تسيبيه، ربنا يهديكي سيبيه بس قبل متسيبه يا ريت تلمي كرامتك اللي اتبعترت".
وقال "أحمد زكريا": "موضوع التعليم دا مش مشكلةخالص لان ممكن واحد يكون مش متعلم ويكون محترم وممكن واحد تاني دكتور بس نصاب وحرامي لكن المشكله انك مش هينفع تكملي معاه لانه للاسف مش راجل عشان يقولك مرتبك بعد كتب الكتاب بتاعه ويشتمك ويهينك ف صدقيني اي عيشه هتعيشيها بعد ما تسيبيه هتكون اهون واحسن مليون مره من العيشه معاه".
