قالت دينا يوسف داوود رئيس قطاع المكتبات بمكتبة الإسكندرية وابنة الفنان الراحل يوسف داوود : “بابا إسكندراني وأهله كانوا من البحيرة هو ومامتي، وكان عنده 2 إخوات الله يرحمهم واحد كان دكتور أسنان مشهور في انجلترا و التاني كان دكتور امراض نفسية في أمريكا، و بابا كان نابغة في الهندسة بس كان بيحب الضحك والهزار واللعب وكان ليه أنشطة اخدته من الدراسه كتير” .
جاء ذلك خلال حوارها لبرنامج عيلتي وافتخر تقديم حازم قابيل علي اذاعة شعبي اف ام.
واضافت قائلة : “بابا كان آخر العنقود ودلوع جدا ووسيم جدا وكان ليه دلال، و جدتي من عيلة أبو الدهب وهي اللي كانت مسيطرة في البيت بس كانت مدلعاه، و كان بيعتبر التمثيل هواية أثناء عمله بالهندسة، بابا وماما كانوا قرايب وهم الاتنين كانوا روشين وسابقين عصرهم.” .
وتابعت دينا قائلة : “ماما كانت سعاد حسني العيلة، ماما وجدتي كانوا مسيطرين فكان لقاءهم لقاء الجبابرة.” .
وعن والدها قالت : “يوسف داوود اسمه الفني اما الحقيقي يوسف جرجس صليب، بابا وماما اختاروا اسم ماجد أخويا علي اسم واحد قريبهم بيحبوه، اما اسمي فجوز خالتي هو اللي اختاره لانه كان ترند وقتها.” .
واختتمت قائلة : “اقول لبابا زمان كان بيقولوا : ده مامتش، وأنا فعلا بحس إنه مامتش بعد ما توفى وده من خلال إني بعيش كل ريأكشاناته من خلال أعماله لأنه كان طبيعي جدا، و اقول للعيلة: إننا عيلة جميلة وهم ناس طيبة ولما بتعامل مع الناس بحس إننا اتربينا في حته تانية.” .
