قال الفنان هشام ماجد إن نقطة البداية انى كنت بدرس هندسة بس ماكنتش بحبها خالص، وفي أخر دراستي بكلية الهندسة عرفت إني عاوز أمثل، وبدايتي في شارع الفن لما بدأنا نعمل أفلام ونألفها ونصورها بكاميرا فيديو.
جاء ذلك خلال لقائه ببرنامج ع اللوكيشن مع شريف الليثي علي راديو هيتس.
وأضاف ماجد عملنا أربع أفلام بالجهود الذاتية، وبعد فيلم " رجال لا تعرف المستحيل " حفظي كلمنا علشان نعمل برنامج " أفيش وتشبيه ".
وتابع سيبت الهندسة بعد فيلم "سمير وشهير وبهير"، ولما بلاقي الطريق قدامي مقفول بعافر وبحاول تاني، وفي أفلام بتقعد معانا سنين علشان نعملها زي فيلم "الحرب العالمية التالتة".
وقال ماجد: بنزيني طول الرحلة هما أصحابي "شيكو وفهمي" كنا دايما بنشجع بعض وبنكمل بعض،و الناس ابتدت تتصور معانا من أيام فيلم " رجال لا تعرف المستحيل ".
وعلق علي أهم المحطات في حياته قائلا: فيلم "ورقة شفرة"، أما فيلم "الحرب العالمية التالتة" فكان أكبر نجاح وأول محطة جابت إيرادات كتيرة، وعن فيلم "حملة فريزر" كانت محطة الانفصال للثلاثي، أول محطة لوحدي كان فيلم "حامل اللقب"، و"شيكو" هو اللي معايا من أول الطريق لحد دلوقتي.
واختتم قائلا: أمي ومراتي وبناتي أكتر ناس بتخاف عليا أكتر من نفسهم كمان، وهوقف الطريق وهقفل الشارع علشان أتصور مع دكتور " مجدي يعقوب ".
