قالت هالة حفيدة الفنانة زوزو نبيل، إن زوزو نبيل ما كانتش حما خالص وكانت فرحانة أوى إنى أول حفيدة وما قالتش لأبويا يسميني على اسمها، وكانت بتحب اللى حواليها أوى، وكانت عايشة مع الزوجة الأولى الحاجة فاطمة، ولما كان حد يكلم ماما زوزو في أي أوردر، الحاجة فاطمة كانت تقولهم أنا أختها الكبيرة.
وأضافت حفيدة الفنانة زوزو نبيل، خلال حوارها لبرنامج "عيلتي وأفتخر" الذي يذاع علي برنامج “شعبي اف ام” من تقديم حازم قابيل: “أبويا لم يُستشهد فى حرب أكتوبر زى ما بيتقال أبويا توفى بعد الحرب بسنتين، ولقب شهيد ده كبير أوى وكان يشرفنى إن ابويا يبقى شهيد بس أنا مقدرش آخد لقب مش بتاعنا”.
وتابعت: “ماما زوزو كانت بتحب جوزى جدا و كان بالنسبة لها بدل أبويا، ومن كتر ما جوزى طيب حست انه ابنها، و عيلة ماما زوزو مشهورة بالبيت الكبير، بيت العيلة”.
وقالت: “أنا اخدت من ماما زوزو إحساس الحب اللى الواحد بيحس بيه والانبساط لما واحد بيبسط حد لان هى ديه كانت حياتها”.
واختتمت قائلة: “أقول للعيلة إنتوا اسعدتونى طول عمركوا ودلعتوني، وعلى طول كنتوا معايا وجنبى ودي السمة اللى عندنا الحمد لله، و لو ماما زوزو سمعانى دلوقتى اقولها وحشتينى اوى اوى يا ماما زوزو”.
