وصل منذ قليل، الي محكمةجنايات القاهرة المنعقدة بالتجمع الخامس، اليوم الثلاثاء، حنين حسام المعروفة إعلاميا بـ"فتاة التيك توك"، لحضورإعادة محاكمته بتهمة الإتجار فى البشر.
يذكر أن المحكمة كانت قضت بمعاقبة حنين حسام بالسجن المشدد 10 سنوات غيابياً.
وتم ترحيل حنين حسام المعروفة إعلاميا بـ"فتاة التيك توك" إلى سجن القناطر لتنفيذ الحكم عليها 10 سنوات بعد انتهاء الإجراءات القانونية اللازمة وإمضاء نموذج الحبس من محكمة شمال القاهرة المنعقدة بالعباسية.
تمكنت الأجهزة الأمنية من القبض على حنين حسام "فتاة التيك توك" تنفيذا للحكم الذي قضت به المحكمة بمعاقبتها بالسجن المشدد 10 سنوات وتغريمها 200 ألف جنيه، وذلك بعد ظهورها في فيديو جديد خلال الساعات الماضية.
وكانت "البوابة نيوز" قد انفردت بنشر نص التحقيقات مع كل من حنين حسام ومودة الأدهم في وقت سابق، حيث مثلت أمام النيابة، الطالبة، حنين حسام عبد القادر محمد عبد الجليل، 20 سنة، طالبة بكلية الآثار جامعة القاهرة، وتقيم في 4 أ ش المقسي، منطقة الساحل، بمحافظة القاهرة، ووجهت النيابة أسئلتها للمتهمة على النحو التالي:-
* ما قولك فيما هو منسوب إليكِ من إنك متهمة بالإعلان عن طريق حسابات على شبكة المعلومات دعوة تتضمن لفت الأنظار إلى الدعارة على النحو المبين بالتحقيقات؟
- الكلام دا محصلش.
* ما قولك فيما هو منسوب إليكِ من أنكِ متهمة بالاعتداء على المبادئ والقيم الأسرية في المجتمع المصري بأن قمتي بإنشاء حسابات على شبكة المعلومات تتضمن الدعوة لعقد لقاءات مخلة بالآداب بين مشتركي تلك الحسابات؟
- الكلام دا محصلش.
* ما قولك فيما هو منسوب إليكِ من أنكِ متهمة بإنشاء وإدارة واستخدام حساب خاص على شبكة المعلومات يهدف إلى ارتكاب الجريمة موضوع الاتهامات السابقة؟
- الكلام دا محصلش.
* ما الذي حدث إذا وما هي أوجه دفاعك ودفوعك؟
- بداية الموضوع إن شركة "لايكي" أنا بشتغل معاها بقالي سنتين وفي بينا عقد إلكتروني مضمونة إن الشركة تطلب مني فيه إن أنا أعمل عشرين فيديو في الشهر وأشيره على تطبيق لايكي والفيديوهات بتبقى عبارة عن إن أنا بغني على الأغنية عادي وبرفق الهاشتاج الخاص بلايكي في مقابل إني باخد 400 دولار وأنا فعلا ملتزمة معاهم بكده بقالي سنتين باخد المبلغ ده ممكن يقل ممكن يكتر على حسب اختيارهم للفيديوهات وبعد كده طلب مني كل من/ محمد علاء ومحمد زكي في 26/3/2020 وهما شغالين في شركة لايكي والقائمين على إدارة إني أعمل إعلان على الأستوري على الإنستجرام بتاعي أنزل فيه فيديو وأقول فيه اللي هما قالولي عليه بالظبط، إن هما كانوا عايزين مجموعة من البنات عشان يشتغلوا مذيعات في شركة لايكي وأنا في الفيديو ده كنت بتكلم على مضمونة في قمة الأدب والأستوري دا أصلا بتقعد على الحساب بتاعي لمدة 24 ساعة وبتختفي بس بتفضل في الأرشيف عندي وفي ناس كثيرة عندي عشان أنا عندي متابعين كتير اقتصوا أجزاء من الفيديو وغير مكتملة واتفسرت بمحتوى وحش خارج عن الآداب، ومش دا اللي أنا قولته لو اتسمع كل الفيديو وأنا فوجئت إنه تم نشر ذلك المقطع وبخصوص الموضوع أنا كنت بقول في الفيديو إني محتاجة بنات أكبر من 18 سنة عشان يكون معاها بطاقتها وتتوثق في الشغل في شركة لايكي وينزل لها الفلوس عن طريق حسابها في البنك لو ليها حساب أو البطاقة بتاعتها عن طريق البريد لو ملهاش حساب في البنك وأنا مجرد بس أعمل الإعلان بس هي اللي كلفتني بيه شركة لايكي وميخصنيش حاجة تانية خالص بس أنا فاهمة الإجراءات اللي بيعملوها بعد كده بس أنا دوري يقتصر على الإعلان بس والإجراءات إن البنت اللي عايزة تخش على لايكي تفتح لايف في ساعة إدارة لايكي هي اللي بتحددها عشان الإدارة هي اللي بتشوف وفي اللايف البنت بتقدم نفسها وبتعرفهم على موهبتها سواء بتغني أو بتطبخ أو بترسم أو متحاورة وفي آخر ساعة اللايف الإدارة بتقولها اتقبلتي أو اترفضتي ولو قبلت بتاخد البطاقة والاي دي بتاعها عشان تفعلها بعد كده بيدخلوها في جروب أنا مش فيه يقولولهم فيه إدارة لايكي البنات اللي قبلت المفروض تعمل إيه هو اللي نفس كنت بشرحه في الأستوري.
* ما هي طبيعة واختصاصات شركة لايكي وأين مقرها تحديدا؟
- هي مقرها في الصين وهي شركة مختصة في الفيديوهات القصيرة بتخلي المشاهير تعملها مقابل مادي.
* ما هي كيفية تحرير العقد الإلكتروني بينك وبين شركة لايكي؟
- هي مديرة شركة لايكي اسمها مارجن وهي صينية الجنسية تواصلت معايا على الإنستجرام ودخلتني في جروب اسمه لايكي وبعتت لي العقد الإلكتروني على إيميل الجروب مكتوب وناقص بس على الإمضاء.
* هل تستطيعين الحصول على صورة من ذلك العقد إذا تم الدخول على حسابك على تطبيق الإنستجرام؟
- هو إيميل على حساب الإنستجرام اللي كان موجود عليه صورة العقد الإلكتروني اتسرق من سنتين.
* وهل قمتِ بتحرير محضر؟
- أيوه بس مش فاكرة رقمه في مباحث الإنترنت وكنت متهمة فيه شادي أيمن صبري عبد النبي وده كان مجرد هاكر سرق الإيميل بتاعي على الحساب ومليش أي علاقة بيه.
* وما الذي آل إليه ذلك المحضر؟
- هو اتحفظ عشان اتصالحت فيه عشان هو لما سرق الإيميل بتاعي بعت لي تهديد عشان عاوز فلوس واديته 5 آلاف جنيه على حساب البنك بتاعه.
* وما الذي دعاك للتصالح؟
- هم جم أهله واتحايلوا عليا وأنا اتنازلت بعد ما أخدت منهم الفلوس.
* مطلوب منك تقديم صورة من العقد الإلكتروني بينك وبين شركة لايكي.
- أنا هتواصل معاهم وهحاول أجيبه.
* ومَن أطراف ذلك العقد؟
- شركة لايكي وكان بيمثلها مارجن وأنا.
* وما المنفعة التي تعود على الشركة جراء ذلك؟
- أنا لما أنزل فيديوهات على تطبيق لايكي ونسبة المشاهدة بتزيد يساعد على شهرتهم وبالتالي هم بيستفيدوا من شهرتهم دي بس هم أكيد بيستفيدوا فلوس.
* وما مضمون الفيديوهات التي تقومين بنشرها؟
- هي الفيديوهات إني بغني على أغنية أو فيديوهات كوميدية أو تمثيلية.
