أثار الفنان حمادة هلال جدلا عبر مواقع التواصل الاجتماعي بعد تصريحاته الأخيرة في برنامج "حبر سري" المذاع على فضائية القاهرة والناس التي قال خلالها أن أغنية "عيش بشوقك" كانت أغنيته في الأساس قبل أن يقدمها الفنان تامر حسني.
وقال حمادة :"أغنية "عيش بشوقك" كانت لي وبالفعل قمت بالعمل عليها لمدة 6 شهور ولكن بسبب مرض والدتي انشغلت لمدة اسبوعين أو ثلاثة أسابيع، وشعرت بتعويض من الله بعد زيارتي لمي كساب وتم الاتفاق على أغنية "اشرب شاي" مع اوكا واورتيجا".
وتابع هلال: "تواصلت مع فريق عمل الأغنية والزميل الذي قام بغنائها وأخبرتهم بأن هذه الأغنية هي أغنيتي ولكني انشغلت لفترة بسبب مرض والدتي، وفكرت في طرح الأغنية على منصات التواصل الاجتماعي ولكني لم أرغب في ذلك، ولم أحزن على فقدان الأغنية ولكني انصدمت في بعض الأشخاص".
تصريحات حمادة هلال دفعت بلال سرور ملحن أغنية "عيش بشوقك" للتعليق وكتب عبر "فيس بوك": "مرة فنان كلمناه أنا والشاعر مصطفى حسن، يجيلنا يجرب غنوة بصوته، الفنان ده جيه وغنى واتبسط، ثم اختفى 6 شهور مبيردش حتى على تليفون، فالأغنية راحت لصاحب نصيبها، يقوم الفنان الأولاني يبدأ يطالب بأحقيته في الغنوة دي ويدعي إنها أغنيته وإنه تعب فيها!! الكداب بيروح النار".
عاتب الجمهور بلال بسبب طريقته في الرد الغير مباشرة، فعاد واعتذر في منشور جديد وأوضح حقيقة ما حدث وقال:"بمناسبه وصول عيش بشوقك ١٣٠ مليون، وعشان جالي كذا تعليق متضايقين من طريقه تعليقي علي اللي قالوا الفنان حماده هلال فانا بعتذر أولا، ثانيا إسمحولي أرد صديقي الفنان مصطفي حسن كلم حماده هلال وطلب منه يجيلنا يجرب صوته علي غنوه مهمه الفنان حماده جالنا وجرب الاغنيه وعجبته وكان يوم جميل وكله تمام".
وتابع "بلال":"لفتره كبيره انا مش فاكر هيا قد إيه كنا بنحاول نكلم حماده ونبعتله رسايل ومفيش اي نوع رد منه لا بالسلب ولا بالايجاب بيروح افراحه وشغله عادي وحفلاته وبيسافر ويرجع وبرده مبيردش بيقابل فنانين وبيسمع اغاني تانيه عندهم وبرده مبيرجعلناش يقولنا ناوي يعمل ايه، بعد ما صلينا استخاره. سمعنا اغنيه لصديقنا المنتج هاني محروس اللي كان بيحضر انه ينتج اغنيه للفنان تامر حسني فالتوقيت ده واتفقنا ان الاغنيه يغنيها تامر حسني وبرده حماده مش ظاهر فالصورة".
وأضاف :"الغنوه سجلناها وبدا تامر تصويرها، هنا ظهر الفنان حماده وبدا يكلم مصطفي حسن يللا انا جبت منتج للاغنيه تعالو ننفذها وهو هيحاسبكوا ((( الفكره بالنسبه للفنان حماده انه مكنش عايز يشتري الاغنيه هو كان راكنها وبيدور علي حد يشتريها))) احنا طبعا اتصدمنا وفهمناه ان الاغنيه اتباعت طبعا هو كان متضايق جدا بس ده فشغلنا شئ طول الوقت وارد لان انت ملتزمتش معانا بحاجه !!!! ولا حتي بتقدير انك تتواصل معانا حماده اتضايق جدا وبقي بيطلب مننا باي شكل نرجع الغنوه وان المنتج هيديكو اللي انتو عايزينه
احنا طبعا كنا التزمنا مع هاني محروس والفنان تامر حسني
وأنا بقسم بالله ومش محتاج احلف اني من كتر ما صعب عليا حماده فكرت انا ومصطفي نستأذن تامر ونرجعله الاغنية".
واستطرد ملحن "عيش بشوقك":"فالتوقيت ده الفنان حماده هلال كلم الفنان تامر حسني وطلب منه الاغنية وافترا علينا وقاله انها معموله علي ايدي وشقيت فيها طبعا ده محصلش
ومش منطقي اصلا انه يحصل. بس هو قال كده عشان يأثر علي تامر وبالفعل الفنان تامر حسني كلمني وقاللي هو اللي بيقولو حماده ده صح انا طبعا ركبني عفريت وفهمته القصة، وخلص الموضوع واعتذرنا لحماده وكل الدنيا غلطته ولما الغنوة نزلت ونجحت بقيت كل ما اقابل حد لمده شهووور يقوللي ليه عملتو كده مع حماده، اروح مفهمه القصه كأني متهم وكل الناس اللي فالوسط عارفين الموضوع ده، وعارفين ان حماده مش صاحب حق دلوقتي بعد ما عدي سنين الموضوع اتفتح، وناس عماله تبعتلي كلام غريب وانتو ازاي تعملوا معرفش ايه ! الجمهور والفانز انتو فوق راسنا كلنا واحد واحد بس مش معني انك باحب فنان انك تصدق وخلاص، وتتهم فنان تاني بحجات مش حقيقيه، الفنان الكبير تامر حسني بره القصه دي تماما، وهو مش ناقص اغاني عشان ياخد حاجه مش بتاعته الغنوه دي غنوه تامر حسني وانا فخور انها فتاريخه وفمشواري".
واختتم بلال حديثه وقال":" ولو كنا جينا عليك يا حماده مكنش ربنا كرمنا فيها وانت لو صاحب حق مش هتطلع تقول مده علي فنان ونجم كبير إنت عارف انه بره القصه، أنا اسف اني طولت وأسف إني باكلم فمشكله اصلا المفروض ليكو عندي فن وبس بس كان لازم أرد عشان ميتقالش انهم ساكتين".
أغنية "عيش بشوقك" للفنان تامر حسني تم طرحها عام ٢٠١٨ وهي من كلمات مصطفى حسن، ألحان بلال سرور، توزيع بلال سرور وهاني محروس، والفيديو كليب من إخراج هادي الباجوري.
