أحالت النيابة العامة بجنوب الجيزة، 3 أشقاء متهمين بسحل وتقطيع جسد سيدة تدعى "نسمة"، والمعروفة بـ"سيدة بولاق الدكرور"، إلى محكمة الجنح للمحاكمة.
وحصلت "البوابة نيوز" على نص تحقيقات النيابة مع المتهمة الرئيسية.
- ما قولك فيما هو منسوب اليك من إنك متهمة وكلا من سعاده محمد عبد الفتاح و حسين محمد عبد الفتاح باستخدام القوة والتلويح بالعنف قبل المجنى عليها نسمة عبدالله محمد فرج بقصد ترويعها وتخويفها وإلحاق الاذي بها وفرض السطو والسيطرة عليها ونتج عن ذلك تعديكما عليها بالضرب مع سبق الإصرار محدثين اصابتها الواردة بالتقرير الطبي والتى أعجزتها عن أداء اشغالها مدة تزيد عن ٢٠ يوما مستخدين أسلحة بيضاء سكين كتر مطواة؟
- أنا غلطانة
- ما قولك فيما هو منسوب إليكى وآخرين بالتعدى على المجنى عليها نسمة عبدالله محمد فرج بالضرب مع سبق الاصرار والترصد محدثين اصابتها الواردة بالتقرير الطبي والتى اعجزتها عن أداء اشغالها مدة تزيد عن ٢٠ يوماً مستخدين اسلحة بيضاء سكين كتر مطواة؟
_محصلش
- ما قولك فيما هو منسوب اليك من انك متهمة باحراز اسلحة بيضاء "كتر" فى غير الاحوال المصرح بها قانونا؟
_محصلش
- ما هى ظروف ضبطك وعرضك علينا؟
_اللى حصل انى كنت فى شقتى والباب اتكسر عليا لقيت ناس داخلة وبيقولوا ان هم مباحث وقالولى انتى وفاء قولتلهم اها قاموا قايلنلى هناخدك معانا عشان المحضر اللى عليكى وسالونى على مكان سعادة وحسين وقولتلهم على مكانهم فخدونى انا وركبونى عربية ملاكى وخدونى على قسم بولاق الدكرور
- متى واين حدث ذلك؟
_الكلام ده حصل يوم ٢٧/١٢/٢٠٢١ الساعة ٤ مساءا فى بولاق الدكرور ومعرفش اسم الشارع عشان الشقة مأجراها جديد
- من كان برفقتك انذاك؟
_كان معايا اولادى
- ما صلتك بباقى اطراف الواقعة؟
_سعادة وحسين اخواتى ونسمة جارتنا قاعدة فى البيت اللى قصادنا وكانت بتنضف البيت عندى
- هل من ثمة خلافات فيما بينهم؟
_ايوا
- وما هى طبيعة تلك الخلافات؟
اللى حصل من حوالى سنتين كانت نسمة بتيجى تنضفلى البيت وبديها فلوس مقابل كده لحد فى مرة عرفت ان هى طلعت البيت بتاعى من ورايا ولما رجعت البيت ولقيتوا مقلوب وسالت اولادى ايه اللى حصل قالولى نسمة هى اللى عملت كده ومن ساعتها مبقتش اجيبها عندى لما سالتها وقالتلى انا مطلعتش ومن بعدها ابتدت المشاكل ولقيت ابنها عبده بيقف فى البلكونة بتاعة بيتهم وبيقعد يشتم عيالى الصغيرين واتكلمنا معاها اكتر من مرة تلم عيالها وكانت مبتعملش حاجة لحد لقيت ابنى محمد جاى من المدرسة وبوقه متعور فبقوله مين اللى عمل فيك كده قالى عبده ابن نسمة هو اللى عمل فيا كده وهو ده سبب الخناقة
- وما هى كيفية ارتكابكم لتلك الواقعة؟
_اللى حصل لما شوفت ابنى متعور طلعت انادى من البلكونة على نسمة فمردتش عليا فببص فى الشارع لقيتها واقفة وكان معايا فى الشقة اختى سعادة فانزلنا انا واختى تحت البيت ولقيناها واقفة قدام محل جمب العمارة فروحنا عليها فاختى سعادة بتقولها انتى ازاى تسيبي ابنك يضرب الواد كده فقالتلها هو كده قاموا ماسكين فى بعض وبيضربوا بعض فابشد ما بينهم فقامت ماسكه فيا فضربتها بايدى وقمت زقاها على الباب الحديد بتاع المحل وساعتها اخويا حسين جه وحاشنا من بعض والناس فى الشارع اتدخلت وفصلونا عن بعض وهو ده كل اللى حصل.
- متى واين حدث ذلك؟
_يوم ٥/١٢/٢٠٢١ الساعة ١ مساءا فى شارع ربيع حسن من ترعة زنين ببولاق الدكرور
- من كان برفقتك انذاك؟
_كان معايا اختى سعادة واخويا حسين
- كيف نما إلى علم شقيقك آنذاك من حدوث مشاجرة فيما بينكما والقدوم اليكم بمحل الواقعة انذاك؟
_معرفش حد اتصل بيه ويمكن حد كلمه فى الشارع
- وهل كنتى على علم بمكان وساعة تواجد المجنى عليها نسمة عبدالله محمد فرج آنذاك؟
_ايوا لما شوفتها من البلكونة بتاعتى ولقيتها واقفة فى الشارع تحت
- وهل ثمة اسلحة أو ادوات كانت بحوزتكما آنذاك حال تعديكم على المجنى عليها؟
_اختى سعادة كانت بتضربها بمفاتيح كانت مسكاها
- وما كيفية تعديكما على المجنى عليها؟
_نزلنا انا واختى تحت البيت ولقيناها واقفة قدام محل جمب العمارة فروحنا عليها فاختى سعادة بتقولها انتى ازاى تسيبي ابنك يضرب الواد كده فقالتلها هو كده قاموا ماسكين فى بعض وبيضربوا بعض فابشد ما بينهم فقامت ماسكه فيا فضربتها بايدى وقمت زقاها على الباب الحديد بتاع المحل وساعتها اخويا حسين جه وحاشنا من بعض والناس فى الشارع اتدخلت.
- كم عدد الضربات التى وجهتيها للمجنى عليها آنذاك؟
_معرفش بس ضرب كتير لانها كانت خناقة وانا واختى كنا بنضرب فيها وهى برضه ضربتها
- واين استقرت تلك الضربات؟
_معرفش
- ما التصرف الذي بدر منك عقب ذلك؟
_الناس اتدخلت وحاشونا وبعدها اخو جوزى "إبراهيم" خد نسمه ووداها المستشفي واتعالجت على حسابه وراضيناها
- وما قصدكم تحديدا من جراء تلك الأفعال؟
_انا مكنتش عايزة اضربها بس لما مسكت فيا وفى اختى اضطريت اضربها
- ما قولك فيما قررته المجنى عليها بمحضر جمع الاستدلالات؟
_ايوا فعلا احنا اتخانقنا معاها وضربناها بس مكانش معايا مطواة ولا سكاكين ولا حاجة
- ما قولك فيما جاء بالتقرير الطبي الخاص بالمجنى عليها؟
_انا معرفش مين اللى عورها كده
- وما قولك فيما جاء بمحضر معاينة استيفاء النيابة العامة؟
_محصلش احنا مكسرناش حاجة
- هل سبق ضبطك فى ثمة قضايا مماثلة من قبل؟
_لا
هل لديك ثمة سوابق اخري؟
_لا
وسألت النيابة العامة المجني عليها، عن تفاصيل حدوث إصابتها، فقالت:
_اللى حصل أن انا كنت قاعدة فى البيت ونزلت تحت البيت عشان اشتري حاجة من المحل اللى قصاد البيت يتاعى ولقيت وفاء محمد عبد الفتاح و سعادة محمد عبد الفتاح و حسين محمد عبد الفتاح نزلوا من توك توك وجم على المحل اللى كنت واقفة قدامة ولقيت اللى اسمها سعادة جت وحدفتنى بشطة فى عينى وبعدها وفاء و سعادة ومسكونى من شعرى وشدونى فى نص الشارع تحت البلكونة بتاعتى ولقيت وفاء ماسكة كتر وضربتنى بيه فى كتفي اليمين وفخذي اليمين وعورتنى، وسعادة كان معاها سكينة وضربتنى بيها في فخذنى وجمبي وظهرى وعورونى وحسين كان ماسك مطواة وضربنى بيها فى ظهرى وقعدوا يحدفوا زجاجات فارغة على البلكونة بتاعة بيتى وكسروا زجاج البلكونة واحدثوا بها تلفيات والناس حاشتهم عنى بالعافية ورحت على مستشفي القصر العينى وعملت تقرير طبي وبعدها روحت على قسم بولاق الدكرور وعملت المحضر وهو ده اللى حصل.
متى وأين حدث ذلك؟
_الكلام ده حصل ٥/١٢/٢٠٢١ حوالى الساعة ٤ ونص مساءا فى شارع ربيع حسن بولاق الدكرور
ما مناسبة تواجدك بالزمان و المكان سالف الذكر؟
_انا كنت تحت البيت بشترى حاجات من البقال اللى تحت بيتنا
من كان برفقتك آنذاك؟
_انا كنت لوحدى
من القائم بارتكاب تلك الواقعة؟
_هم وفاء محمد عبد الفتاح و سعادة محمد عبد الفتاح و حسين محمد عبد الفتاح
ما هى كيفية لقاءك بالمتهمين تحديدا؟
_انا لقيتهم كلهم راكبين توك توك وواقفين جمبي بمسافة وساعتها لقيت سعادة نزلت هى واختها وحدفتتى بشطة كانت ماسكها فى ايدها وحدفتها فى عينى وبعدها طلعوا سلاح وضربونى بيه هما التلاتة وعورونى
هل من ثمة اسلحة وادوات كانت بحوزة المتهمين سالف الذكر؟
_ايوا
ما الإصابات التى حدثت لك جراء ذلك؟
_انا عندى جروح فى كتفي اليمين وفى ظهرى وفى فخذي اليمين وكدمات فى جسمى كله.
