( المواطن الغلبان حسن حصاوى يغشي عليه من حين لأخر.وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه).
( المثقف جالس بالمقهى يشاهد الأخبار بالتليفزيون ثم يضرب كفا بكف)
حصاوي مالك إيه اللي مضايقك ؟
المثقف غريبة.الناس فرحانة كدا ليه وشمتانين أن السعودية والأمارات والبحرين سحبوا سفرائهم من قطر؟
جصاوي وإيه الغريب في كدا؟
المثقف الغريب أن الدول التلاته عربية.مش كده وبس، قطر هي كمان من الخليج.
حصاوي وبيقولوا الأردن بتفكر برضه تسحب سفيرهم.
المثقف كمان؟ اشمعني مصر ما خدتش الموقف دا.
المثقف يمكن مستنين المصريين اللي بيشتغلوا في قطر, يرجعوا الأول، ونفس الحكاية عن اللي بيشتغلوا في ليبيا وبالذات الأقباط.
المثقف أنت بتهزر؟
حصاوي لا بتكلم جد، إنما أنت إيه اللي مزعلك بالتحديد ؟.
المثقف مزعلني إن كل ده ضد مشروع القومية العربية.
حصاوي ( يضحك مقهقها) ياه أنت لسه فاكر يا راجل، قلبك أبيض، بقالي زمان
ما ضحكتش من قلبي زى النهار ده.
المثقف القومية العربية هي الدرع الأساسي ضد مؤامرات إسرائيل وأمريكا وتركيا والغرب الاستعماري.
حصاوي ونسيت قطر.
المثقف وأفرض قطر كمان، نحاول نلم شمل كل البلاد العربية، مش نعاديهم.
حصاوي ونسيت حماس و التكفيريين في اليمن وتونس والعراق وغيرهم، أعدهم لك ؟
المثقف لو كان عبد الناصر لسه حي كان دخلهم الشقوق.
حصاوي الله ؟ مش هو اللي كان بيدعو للقومية العربية؟ ولا أنا بقيت زهايمر والتواريخ
أتلخبطت في مخي.
المثقف أيوه بس كانوا بيسمعوا كلامه.
حصاوي إزاي دي سوريا خرجت من الوحدة معانا واليمن حصله.
المثقف اللي حكموا سوريا كانوا انقلابيين.
حصاوي وفضل الأسد يحكم شعبه هو وابنه من بعده لحد النهار دا.
المثقف بس عبد الناصر رغم كدا لما حس أن فيه نية للهجوم علي سوريا شحن الجيش
علي سيناء عشان يدافع عن السوريين.
حصاوي محدش كان طلب منه كدا، ومع ذلك هو ما كنش عامل أي حساب للحرب.
دا كان بيهوش، عشان الناس تسقف له، والنتيجة إسرائيل احتلت 4 دول عربية.
المثقف دا كلام الأعداء واللي ضد القومية العربية.
حصاوي وحد كان حايش القومية العربية غيره ؟ يتحدوا معاه إزاي وهو ما خلاش رئيس أوملك في المنطقة إلا وطول لسانه عليه وعلي أهله وحتى على أمهاتهم.
المثقف كلهم كانوا يستاهلوا، والوطن العربي مش هتقوم لها قومه إلا بالوحدة.
حصاوي يمكن تقصد الاتحاد.
المثقف لا أقصد الوحدة، لأن فيها النصر الأكيد.
حصاوي يا عم دا الأخوات بيتخانقوا وبيقطعوا هدوم بعض.
المثقف دا عشان بينا ناس أخلاقهم وحشة.
حصاوي طب نعمل إيه في روحنا؟ إذا كان الوحشين دول هما اللي بيحكمونا؟
المثقف أشمعني كل دول الغرب أتحدوا وأمريكا كل ولاياتها أتحدت؟
حصاوي قول إشمعني دول الغرب رغم أن كلها علي دين واحد لكن كل واحد بيتكلم لغته هو، حتى وهو بيصلي؟ وأشمعني بيستوعبوا المهاجرين اللي بيهاجروا لبلادهم من كل أنحاء العالم بكل لغاتهم وثقافتهم وأولهم العرب لأنهم بيعيشوا هناك في حرية.
المثقف بس الغرب ما عملش وحدة مع بعضه.
حصاوي عشان كده هو لسه أقوي من بلادنا!
المثقف على كده أنت مع الفرقة والانقسام والتشرذم بدلا من الوحدة.
حصاوي يا عم أنا راجل غلبان، ومش في أيدي حاجة.
المثقف لن نخرج من هذا المستنقع إلا بالوحدة بين كل الدول العربية حتى تواجه
مؤامرات الاستعمار، أنت عندك حل تاني؟
حصاوي عندي.
المثقف إيه هو من فضلك؟
حصاوي نعمل زيهم.
المثقف أعوذ بالله، في إيه؟ في الفحش والانحلال؟ في مص دماء شعوبنا والاعتداء علينا؟
حصاوي نتحد في العلم.. نشجع الأجيال الجديدة علي الابتكار والاختراع، نخليهم يعيشوا في حرية، وكل بلد تساعد نفسها الأول عشان تتقدم وتزدهر اقتصاديا وحضاريا، دا غلط؟
المثقف لازم نبدأ بالوحدة الأول لأجل ما نبقي قوة ضاربة ومؤثرة والعالم كله يعمل لنا ألف حساب.
حصاوي وهو أنا اللي حايشك؟ لكن نعمل وحدة إزاي وكل بلادنا جاهلة ومتخلفة والأذكياء .
اللي فيها ممنوع ياخد أي قرار مهم أو يستعين بخبراء أجانب عشان يطور بلاده.
إلا في الكورة، وأدي اللي إحنا فالحين فيه.
المثقف أنت ضد وطنك وأوطان بقية الدول العربية.
حصاوي طب ما تشنقني أنا واللي زيي وتخلصوا مننا.
المثقف الظاهر ما فيش غير الحل دا.
( حصاوي يغشي عليه )
623
لينين الرملي
هرش مخ
الأحد 9 مارس 14
1 ـ أغلبهم
أقترح أن يتولى رجال الإعلام حكم هذه البلاد فأغلبهم يجيدون الحديث في الفاضية
والمليانة !
15
2 ــ مجرد سهو
قال أحد الإعلاميين إن عبد الناصر أكمل ما بناه طلعت حرب في تأسيس مصانع المحلة الكبرى.
ولم يذكر أن حكمه بدأ بشنق اثنين من عماله لأنهم تظاهروا !
29
3ــ رشوة
عدد الموظفين في الحكومة يزداد كل سنة منذ ستة عقود وأصبح بالملايين، هل هذه سياسة رشيدة ؟ أم هي رشوة قليلة ؟!
20
4 ــ تطور
كانت مصر بلدا زراعيا وكادت تكون صناعية أيضا، الآن أصبحت تنتج الموظفين والفائض تصدرهم إلي بلاد العالم فيعملون هناك !.
19
5ـ استفتاء
طلبة يريدون الدراسة، وطلبة يريدون التظاهر لمنع الدراسة، الحل الديمقراطي إجراء استفتاء بين الطلبة والأخذ برأي الأغلبية !
18
6- عدالة هائلة
الحكومة تدرس رفع الدعم عن الكهرباء دون المساس بالفقراء، أي إفقار الطبقة المتوسطة لتصبح كالفقراء!.
14
7 ــ حماسة
حماس تجمع قوتها المسلحة علي الحدود مع مصر. تحيا القومية العربية .. تحيا الخلافة الإسلامية.
بس خلاص!.
16
