وجهت الإعلامية بسمة وهبة، رسالة شديدة اللهجة للداعية مبروك عطية، بسبب واقعة الزواج الثاني لبطل كمال الأجسام العالمي رامي السبيعي، المعروف بـ بيج رامي، حيث استنكرته، وقالت إن هذا ما كان يجب أن يحدث من البطل العالمي.
وقالت بسمة وهبة، خلال تقديم حلقة اليوم من برنامج "90 دقيقة" على قناة "المحور": "يا شيخ مبروك لما تقول إن السيدة تعترض على إن زوجها يتزوج عليها تبقى آثمة وتدخل نار جهنم، واللي عمله بيج رامي في مراته هيدخله فين؟!".
وتابعت: "الزوجة التي تدعم وتساند زوجها وتبدأ معه من الصفر وتتحمل وتضحي وبعدين تلاقي صورته في الجرائد مع عروسته وتدخل جهنم، أنهي دين اللي بتتكلم عنه؟! تدخل جهنم عشان هي رافضة إنها تاخد خنجر في قلبها وكرامتها ومشاعرها يا شيخ مبروك؟!".
وعاتبت الإعلامية بيج رامي قائلة: "هل من الآدمية إن الزوجة الأولى تعرف من الصحافة؟! أي منطق وإنسانية وعيش وملح وعشرة ممكن يهونوا على رجل إن زوجته تبقى جنبه واليوم اللي يوصل فيه يتجوز عليها وميقولهاش، أنا شفت الكلام ده في الأفلام مشفتهوش في الحقيقة".
وقالت الإعلامية بسمة وهبة إن الزواج الثاني لبطل كمال الأجسام العالمي رامي السبيعي، المعروف بـ بيج رامي، قد لا يكون حقيقيا لأنه لم يؤكد أو ينفِ وكذا الحال بالنسبة لزوجته الأولى التي لم تقل إلا "أنا معرفش" ثم اختفت بعدها.
وأضافت بسمة وهبة، أن هناك علامات استفهام كثيرة حول واقعة الزواج الثاني لبيج رامي: "لو مش قايل لمراته بينزل الصورة ليه، ده لو الموضوع حقيقي، يا إما هو عاوز يقهرها أو يعاقبها أو إنه يفاجئها وتتصدم أو يحسرها، مفتكرش إن في حد مش قايل لزوجته إنه هيتزوج ولما يتجوز ينزل صور".
وتابعت، أن ما يحدث قضية يجب أن يتم الحديث عنها فيها لأن هناك أذى نفسي تعرض له طرف أخر: "فرحنا ببيج رامي وشيلناك على أكتافنا، وبالتالي أنت أصبحت نموذجا وقدوة للشباب، لكن هل تعرف الأذى النفسي اللي ممكن تحس بيه مرأة او زوجة وتشوف صور فرح زوجها؟! اللي انت عملته ده من الشرع؟! الشرع بيقول اتجوز بس هل بيقول إنك تخبي ومتقولش وتفاجئها في العلن، هل ده طبيعي؟! اللي حصل محتاج تبرير منك لأنك ملك الناس مش ملك نفسك".
وواصلت: "مش مصدقة إن القصة دي حقيقية رغم أن بعض المقربين أكدوها ومنهم راعي بيج رامي"، مشيرةً إلى أنها تحترم زوجته الأولى لأنها شريكة في نجاحه، ومتابعةً: "ليه أول ما أوصل للنجاح أدي كتف للست اللي كانت معايا وعاشت معايا على الحلوة والمرة .. نفسي إن الموضوع ده يبقى مش حقيقي".
