تحدث سامي قمصان المدرب العام للفريق الأول لكرة القدم بالنادي الأهلي عن الفوز برباعية نظيفة على نادي الإسماعيلي في الجولة الأولى من بطولة الدوري المصري.
وقال قمصان في تصريحات لبرنامج الماتش الذي يقدمه الإعلامي هاني حتحوت عبر شاشة صدى البلد :"بداية مهمة جدا أداء ونتيجة، عندنا هدف واحد بنشتغل عليه في بطولة مهمة عاوزينها ترجعلنا واستعادة الدوري ".
وتابع "ازاي الناس تنتقد التشكيل من قبل ما تشوف المباراة، الناس اللي بتحلل لعيبة سابقة كبار، كل مدير فني عنده رؤية ووجهة نظر وتصور في المباراة".
وأضاف "لعبنا بطريقة اللعب دي قبل كده في دوري أبطال أفريقيا، تشيلسي من أفضل فرق العالم بتلعب بنفس الطريقة، دي مش طريقة دفاعية، انت بتلعب على حسب إمكانيات اللعيبة والقوام الموجود مينفعش تنتقد طريقة قبل ما تشوفها".
وواصل قمصان "نرى أن هناك تحفزا ضد الجهاز الفني وموسيماني تحديدًا رغم أن النتائج مقبولة جدًا، أتمنى الجماهير تبقى عندها ثقة في الجهاز الفني، في مدربين تانيين بتحقق بطولة واحدة في الموسم وبيكون في إشادة كبيرة بيها، مش عارف سبب الهجوم الكبير اللي بيحصل رغم تحقيق الألقاب، في حملة غريبة علينا ".
واختتم مدرب الأهلي تصريحاته "مليون في المية بيوصل لموسيماني الضغط والانتقادات والإشادة برضه، هو نشط على السوشيال ميديا وده ممكن ميكونش حاجة حلوة في مصر لكن عادية برة، الانتقاد بيكون مقبول لكن متوصلش لأبعد من كده".
