كشف الدكتور أحمد عادل، والد ومدرب البطلة المصرية ملك أحمد عادل، صاحبة الـ 16 عامًا كواليس فوزها بذهبية البحر المتوسط "قبرص 2021" في رياضة الكاراتيه لوزن 59 كيلو، قائلًا: "بطولة مهمة جدًا لأن دول البحر المتوسط بها فرنسا وإيطاليا ودول أخرى مميزة في لعبة الكاراتيه".
وأضاف "عادل" في مداخلة هاتفية لبرنامج "صباح الورد" على فضائية "تن" اليوم الثلاثاء، أنه تم الاستعداد طوال العام لهذه البطولة، موضحًا أن البطلة ملك عادل تتدرب داخل منتخب مصر وخارجه، بمعدل مرتين يوميًا.
وتابع: "لعبنا تصفيات كتير في المنتخب عشان اللي يكسب هو اللي يلعب أي بطولة دولية، وعملنا 5 تصفيات وكل واحدة كانوا بيختاروا شخص يسافر ولظروف كورونا كان يتم تأجيل بعض البطولات أو الاعتذار عنها، ولكن الحمد لله ربنا أكرمنا ولم يتم الاعتذار عن بطولة البحر المتوسط واختاروا ملك ضمن المجموعة اللي هتلعب في قبرص".
وأردف، والد ومدرب اللاعبة ملك عادل مازحًا: "كوني مدرب ووالد ملك بيخليها تكرهني وتحبني بنسبة 50 % وبديها أوامر كتير وبعنفها لو سرحت أو غلطت وأوقات مش بتكلمني لو عنفتها في التمرين، وبهزر معاها وأقولها أنا هتخانق مع المدرب عشان عنفك".
وأكد: "ممارسة ملك للعبة كان في البداية اختيار مني نظرًا لأني مدرب للكاراتيه، وجعلتها تمارس عددا من الرياضات الكثيرة ولكنها في النهاية اختارت ممارسة لعبة الكاراتيه".
