تحدث مجدي عبد العاطي المدير الفني لنادي فاركو الصاعد حديثًا لبطولة الدوري الممتاز عن توجيه الشكر لـ 14 لاعباً بعد الصعود من الممتاز ب.
وقال مجدي في تصريحات عبر برنامج الماتش الذي يقدمه الإعلامي هاني حتحوت عبر شاشة صدى البلد "توجيه الشكر لعدد كبير من اللاعبين يعتبر ظلم بس مش ظلم سيء".
وتابع "كل واحد بيدور على مصلحته، في لعيبة بتشوف الخير في نادي ولما يجيلها عرض تاني بتسيبه وتمشي وده طبيعي، أنا كنادي اتنقلت لمرحلة تانية محتاجة قماشة تانية من اللعيبة علشان مهبطش في الموسم التالي".
وواصل "اللعيبة اللي مشيت اخدت كامل حقوقها مع الامتيازات والمكافأت الخاصة بالصعود والمباريات، العقد بالكامل حصل عليه جميع اللاعبين".
واضاف "مبعرفش أشتغل ماتشات في دوري الممتاز ب، كنت ببعت كاميرات لمباريات المنافسين بدون علمهم لتصوير مبارياتهم واقولهم إحنا تبع قناة أو حاجة علشان اصور ونتفرج على المباراة".
وأردف " اتعادلت مع بني عبيد نتيجة اني مش عارف قوام المنافس ايه، وأرضية الملعب كانت صعبة، كنت بعتمد أوقات كتير على معلومات من البعض عن المنافس التالي وحصلت قبل كدة إني حد قالي معلومات عن منافسين واكتشفت إن العكس هو اللي موجود في أرض الملعب".
واختتم مجدي عبد العاطي تصريحاته "أكره لقب إني متخصص صعود فرق من الممتاز ب للممتاز أ، حلمي وطموحي إني أكون مدربا في الممتاز أ دومًا".
