شارك المطرب رامى جمال فيديو على صفحته الخاصة بموقع "إنستجرام"، تحدث فيه عن مرض "البهاق" الذي أصابه منذ فترة، وذلك بعد تلقيه رسائل عديدة من جمهوره يطلبون منه توضيح بعض الاشياء عن هذا المرض وهل قام بعلاجه أم لا ؟
وقال رامي عبر الفيديو: "أنا مش بحب أتكلم في حاجة غير الفن، بس بتوصلني أسئلة كتير جدًا عن علاج البهاق، ودائمًا أرد عليهم في الرسائل الخاصة، أنا لم أعالج البهاق، ولكن أنا اتعالجت نفسيًا منه بدعمكم ليا".
وأضاف قائلًا: "كل الناس دعموني من أصدقائي في الوسط الفني، وأهلي، والبهاق طلع ميزة مش عيب، لأني شفت بسببه حب كبير، البهاق موجود في كل جزء في جسمي".
وأوضح رامي قائلًا: "زي ما أنتو شايفين البهاق مالي إيديا ووشي، وفي كل حتة في جسمي، وأنا زمان كان لو في نقطة في جسمي بقعد أراقبها، وكنت ببقى حزين جدا وزعلان، خصوصا إن كان في ناس في البداية فاكرينه معدي وكانت بتخاف تسلم، لكن الحقيقة البهاق مرض مناعي لم يجد في العلم حتى الآن علاج ليه".
وأنهى رامي الفيديو قائلًا:"أنا بوجه رسالة لأي أم ابنها عنده بهاق، حاولي تدعميه أنه يمتلك ميزة مش موجودة عند أي حد تاني، ووارد أن البهاق يكبر كمان في جسمه بس إيه المشكلة، أنا بشتغل مغني، وشكلي مهم جدا في عملي، وأنا مش شايف البهاق عيب، ومش بيهمني الناس اللي شايفه إن ده عيب، وربنا يعطي الناس كلها قدرة على تقبل الابتلاء".
