أعلن الدكتور محمد علام، نائب مدير مستشفى النجيلة بمطروح (مستشفى العزل)، اليوم الأربعاء، عن إصابته بفيروس كورونا المستجد كوفيد 19.
وكتب علام، تدوينه له عبر حسابه الشخصي على موقع التواصل الاجتماعي "فيس بوك"، تضمنت "صباح الخير عليكم وكل أيامكم بخير، ناس كتير انتقدت إن الفترة اللي فاتت وقت كتير بقضية على الفيس في بوستات توعية وردود على الناس وبتسأل أمال فين شغلك ومضيع وقتك، للأسف في حاجة مكنتش حابب اتكلم فيها دلوقتي عشان مبقاش سبب ذعر وقلق للناس اللي بطمنهم باستمرار ولأنها حاجة متوقعة لكل طبيب وكل لما الفتره تطول فرصة حدوثها بتزيد لكن فى ناس ظلمانى ولازم أاوضح لهم حاجة مهمة وأنا مش زعلان منهم على فكرة.
وأضاف علام، "بس الحمد لله اتشخصت كوفيد ١٩ إيجابي من يوم ٦ أبريل أنا كنت عارف من أول يوم إنى معرض لكده، وراضي لأن ده شغلى، وأنا مش زعلان ولا كنت خايف والحمد لله هتكمل على خير وحالتى اتحسنت كتير، وإن شاء الله قريب اتحول سلبى وأروح، ودي الحقيقة اللي كنت مخبيها باختيارى أنا اللى طلبت محدش يعرف عشان أهلي ميقلقوش اللي بيعدو الأيام وهما عارفين اللي أنا فيه وآسف إنى تأخرت كل ده، محبتش أعرفهم غير لما أكون بقيت كويس.
وأردف علام، آسف للناس اللي بطمنها باستمرار إنى مقلتلكمش، بس إن شاء الله هتعدي، التزموا باللى بننصح بيه اللى حصل ده وارد لأي طبيب ولا يلام عليه أحد نهائيا، ومش معرض ليه أى واحد ملتزم فى بيته أو فى الشارع ده بسبب إجراءات طبية معينة، وكلنا عارفين الخطر اللى إحنا فيه وراضيين وده حسابه عند ربنا مش عاوزين حساب من بشر فيه، لأن ده واجبنا أولا وأخيراً وشرف ما بعده شرف لكل طبيب.
واستكمل علام، بشكر كل زميل ليا دكتور أو تمريض أو عامل وقف جمبي في الظروف دى عمرى مهنسالكم اللى عملتوه، وبشكر كل واحد كتب كلمة حلوة فى حقى على البوستات أنا اسف كنت بستغلكم انى أخد منكم طاقة إيجابية أعدى بيها الفترة دي، والحمد لله كلامكم كان ليه مفعول سحر الدعم النفسي شيء رائع.
وأوضح علام قائلاً: "المرض حقيقى وأعراضه حقيقية والناس بتخف حقيقى رجاء ركزوا فى اللى تقدروا تعملوه وهتعدى والله العظيم، بس بتعدى لو التزمنا مرحلة الخطر عندى عدت، وأنا دلوقتي فى مرحلة الشفاء التام، وإن شاء الله أيام وأروح بيتى إجازة صغيرة وهتبدء الخناقة مع زوجتى وأهلى علشان ارجع تاني.
