عبرت الفنانة السورية سلاف فواخرجي عن رأيها في قضية القتل التي حدثت في منزل الفنانة نانسي عجرم، حيث قتل زوجها شابا سوريا بـ18 طلقة، دفاعا عن بيته وبناته حسب روايته، بينما اتهم أهل القتيل زوج نانسي بالقتل العمد، وانتشرت عدد من الأخبار التي تشكك في صحة رواية نانسي عجرم وزوجها.
وقالت سلاف فراخرجي عبر حسابها الشخصي على تطبيق "إنستجرام": "القانون هو الفيصل، وفي ظالم وفي مظلوم، وفي عدالة على الأرض ولو بنسب قليلة، وفي عدالة بالسماء أكبر من كل النسب، كل الناس بتطلب رأي أو موقف من الفنان، والفنان جزء من المجتمع لازم يقول ويحكي أكيد، بس لما بتكون الأمور لسه ما اكتملت صورتها، ولما بتكون بإيدين القضاء".
وتابعت "سلاف": "نحنا مافينا نبت أو نعطي أحكام وقرارات ولابيجوز نتدخل لأن الحقيقة بعدها ماوضحت والقضية شائكة جدا، ولكل الناس اللي عم تطالبني بإبداء الرأي بالقضية وكأنو قراري هو الحكم، أو لمجرد إثبات موقف أو اللحاق بسبق السوشيال ميديا (والقصة مو هيك وأكبر من هيك) أنا بوقف جنب الإنسان المظلوم بغض النظر عن جنسيته، ماحدا بيقبل بالظلم لا ألو ولا لغيره، وصحيح السوري انظلم من إخوته كتير، بس التعميم غلط، وبكل بلد في صالح وفي طالح".
وأضافت "فواخرجي": "الجنسية متل الاسم مالو علاقة فيها البني ادم بتخلق معه، والعنصريين وين ماكانوا هم ناس مريضة، وبوقف اكيد مع ابن بلدي بالحق ولو كان بآخر ماعمر الله، وكل نقطة دم منه هي من دمي، ولو نانسي ود. فادي مذنبين اكيد رح ياخدوا جزاءهم، بس الموضوع أكبر مننا ومن تقييمنا، وماحدا قدر يعرفه، لحد هلأ عالقليلة، والاكيد كمان انو هنن مو مجرمين بالاصل ولا ساديين، بس في شي صار غلط وغير مقبول، واكيد هنن عيلة منيحة ماسمعنا عنهم كلام سيئ بيوم من الأيام، وعندهم عيلة وبنات، والڤيديوهات اللي عم تنزل والأغاني والشماتة ما بتليق بإنسان تعرض لمصيبة بكل معنى الكلمة ولا بفنان بيوم من الأيام قدم سعادة للناس".
واستطردت الفنانة السورية: "مانو إله طبعا، وبيغلط وممكن يكون يتحول لمجرم بلحظة ما، بس مو باللحظة اللي وقع فيها نكون نحنا مجرمين، الله يرحم ابن بلدي ويصبر اهله وعيلته وولادو، وولادو متل ولادي وولادنا كلنا. وان شاءالله بيرجع حقه كإنسان وبيفك الظلم عنه، واللي صار معه حفر بقلوبنا ألم ووجع مابيخلصوا، والرب وحده اللي بيقتص من الظالم عاجلا أو اجلا، اتركوا مناصب المحامين والقضاة وبعدوا عن كونكم اوصياء عالمجتمع، وكل واحد فينا عندو مية مشكلة ومية عيب، وكلنا معرضين بلحظة مانكون مظلومين أو ظالمين".
واختتمت سلاف فراخرجي حديثها قائلة: "واكيد في شي ماحدا بيعرفه صار، واللي صار أكبر من فن وشهرة، في بيوت وفي اسرار وفي بشر، عنا ثقة بالقضاء اللبناني وعنا ثقة بالمحامين السوريين المهمين اللي استلموا القضية وبكل المحامين العرب اللي اتطوعوا لكشف الحقيقة وتضامنوا مع محمد الموسى والهم كل الاحترام والتقدير، وعنا ثقة قبل كل شي بالله العادل والرحمن والرحيم، وخلوا البشر بحالهم ولايكونوا سلعة نسوقلها".
يذكر أن التحقيقات مازالت مستمرة لمعرفة هوية القتيل، وسبب تواجده في الفيلا، وهل هو سرق بالفعل كما قال فادي، أم إنه كان يعمل لدى نانسي عجرم كما قال البعض.
