( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكنه أحيانا يجعل من يسمعه هو الذي يغشى عليه).
( يدخل حصاوي إلى المقهى فيجد المسقف - كما يسميه - جالسا على طاولة
منهمكا في الكتابة وحوله مجموعة من الصحف والكتب)
حصاوي: صباح الخير..
المثقف: هش.. أنا بكتب كتابي.
حصاوي: إنت هتتجوز لتالت مرة ؟ طبعا يا عم ما إنت بيجيبوك في التليفزيون
كل يوم والتاني والثورة فتحت عليك وبقيت بتقبض كويس.
المثقف: لأ يا حمار.. أنا بكتب كتاب أأرّخ بيه لثورة الشعب المصري العظيم.
حصاوي: إنت حضرتها ؟
المثقف: طبعا.
حصاوي: بس أنا ما شفتكش في الميادين خالص.
المثقف: أنا شفتها تليفزيون عشان كنت بتابع كل الميادين في كل المحافظات على الشاشة في نفس اللحظة.
حصاوي: وإيه كل الجرايد والكتب اللي جنبك دي؟
المثقف: مش بقولك بكتب كتاب للتاريخ.. يبقى لازم أجمع كل اللي اتكتب.
حصاوي: ما هو عشان كده أغلب اللي اتكتب على تاريخنا هجص.
المثقف: بتقول هجص؟.. يعني اللي أنا كتبته قبل كده كان هجص؟.
حصاوي: معلوم.. هو إنت كان عندك كام سنة؟ كنت لسه عيل صغير ما تفهمش حاجة.
المثقف: أنا رجعت لكل المراجع وكل الجرايد اللي صدرت من آخر أيام الملك فاروق الفاسق.
حصاوي: براوه عليك.. ومين اللي جه بعده ؟
المثقف: جمال عبد الناصر طبعا.. أول رئيس لجمهورية مصر العربية، إنت باين عليك فاقد الذاكرة.
حصاوي: ما كانش اسمنا العربية.. ومتهيألي اللي جه قبله اسمه اللواء محمد نجيب والشعب كان بيحبه
المثقف: بس بس.. نقطني بسكاتك.
حصاوي: يبقى إنت جبت معلوماتك من كتاب المدرسة بتاع زمان.. لأنهم كانوا شالوا اسمه من كتب التاريخ.
المثقف: ( منفعلا ) ناصر هو اللي قام بالثورة.
حصاوي: كان اسمها الحركة المباركة وعلى رأسها نجيب وكان ممكن رقبته أول رقبة تطير.. بس الحمد لله إنه حبسه بس.
المثقف: إنت بتعدّل عليّا يا فسل ؟
حصاوي: ( ضاحكا) مش ناقص غير تقوم تعتقلني.
المثقف: إحنا في ثورة واللي زيك لازم يعتقل.
حصاوي: فيه حد يكتب التاريخ من جرايد الحكام؟ طب يا تري كتبتها من جرايد السادات وجرايد مبارك كمان ؟
المثقف: لأ طبعا.. كفاية إن السادات عمل معاهدة مع إسرائيل.
حصاوي: معاهدة سلام وإلا كنت عايزنا نحارب لآخر عسكري ؟.
المثقف: ليه لأ ؟.. لو كان عبد الناصر عاش كان حارب وانتصر عليهم.
حصاوي: ما هو مات وهو موقّف الحرب وقابل مبادرة الأمريكان.. والناس تعيش إزاي وإحنا كنا مش لاقيين ناكل غير الأناشيد اللي بتقول انتصرنا.. كفاية إن سينا رجعت تاني لينا.. ثم مبارك ما حاربش ليه؟
المثقف: لأنه هو راخر مش زي عبد الناصر.
حصاوي: وهو أنا اللي جبت السادات من أصله وإلا عبد الناصر؟.. وهو ناصر
بتاعك عمره حارب وكسب إلا بأغاني انتصرنا انتصرنا؟!.
المثقف: ما تجيبش سيرته على لسانك.
حصاوي: المهم وريني كتبت إيه؟
المثقف: كتبت جملة مبارك المعروفة لما هدّدنا وقال لنا "إمّا أنا أو الفوضى".
حصاوي: ومين اللي جاب الإخوان ؟
المثقف: حكم العسكر.
حصاوي: يعني الإخوان ما زيّفوش الانتخابات ؟
المثقف: ما فيش دليل.
حصاوي: يعني إنت بقى مش مع الشعب؟.. طبعا ما إنت أول مرة إدّيت صوتك لحمدين وتاني مرة ما رضيتش تنتخب.. وأهو راح لمرسي.. هتكتب تقول إيه ؟.. الشعب هو اللي نجحه ؟
المثقف: ما أعرفش بقى.
حصاوي: ولم إنت ما تعرفش بتحشر نفسك في التاريخ ليه؟ وبتكتب التاريخ اللي بتنقله من الجرائد اللي كان مسيطر عليها الإخوان وقتها.
المثقف: تسمح تقوم من جنبي ؟
حصاوي: يا ترى كتبت على خيانة الإخوان مع أمريكا وتركيا وقطر وإيران والبلاد الأوروبية ؟
المثقف: طبعا هكتب.
حصاوي: بعد إيه ؟.. بعد ما الشعب كشف المؤامرة وهبّ ضدها ؟
المثقف: أكيد أنت في صف حكم العسكر.
حصاوي: بس فهمت.. إنت تبع 6 أبريل أو الثوار الاشتراكيين يا إما من حزب التيار الشعبي اللي مالوش أي شعبية.. وغيرك مسقفين كتير.
المثقف: ما اسمهاش مسقف يا جاهل.. اسمها مثقف
حصاوي: بس إنت مش مثقف إنت مسقف.. يعني بتسقف لكل اللي بتقبض منه.
( المسقف يغشى عليه )
هرش مخ
1 - الانتهازية
إذا أردت أن تكون انتهازيا، اغتنم الفرصة الآن وبسرعة فربما تتغير الأوضاع!.
2 - الهرب
إذا نجحت في اقتناص الفرصة فحدّد مبكرا البلد الذي تهرب إليه!.
3 - قرش محيّرك
إذا كان معاك قرش محيّرك.. انضم لفريق حمدين أو أبو الفتوح أو عنان.. وأهو كله محصّل بعضه!.
4 - لو شاطر
إذا أردت أن تكون ذكيا حاول أن تعرف مصير مجلس إدارة الأهلي!.
5 - خاف تسلم
إذا أردت أن تعيش سالما فتجنب مهاجمة دولة قطر في عهد الببلاوي!.
6 - إلى النجوم
إذا فاتك قطار النجومية، ابدأ بتقديم برنامج سياسي في التليفزيون!.
7 - لطلاب الوزارة
استقال زياد أخيرا بعد البرادعي، فاضل عشر أنفار قبل التعيينات الجديدة وجارٍ
سؤال السابقين في أفضلهم!.
إذا أردت أن تكون انتهازيا، اغتنم الفرصة الآن وبسرعة فربما تتغير الأوضاع!.
2 - الهرب
إذا نجحت في اقتناص الفرصة فحدّد مبكرا البلد الذي تهرب إليه!.
3 - قرش محيّرك
إذا كان معاك قرش محيّرك.. انضم لفريق حمدين أو أبو الفتوح أو عنان.. وأهو كله محصّل بعضه!.
4 - لو شاطر
إذا أردت أن تكون ذكيا حاول أن تعرف مصير مجلس إدارة الأهلي!.
5 - خاف تسلم
إذا أردت أن تعيش سالما فتجنب مهاجمة دولة قطر في عهد الببلاوي!.
6 - إلى النجوم
إذا فاتك قطار النجومية، ابدأ بتقديم برنامج سياسي في التليفزيون!.
7 - لطلاب الوزارة
استقال زياد أخيرا بعد البرادعي، فاضل عشر أنفار قبل التعيينات الجديدة وجارٍ
سؤال السابقين في أفضلهم!.
