الله أكبر يا مصر أصبح للوطن درع وسيف ورئيس يرفع راسك وراسنا أمام العالم، قرفونا بجمعة الغضب أكترمن مرَّة يجربوا بقى جمعة غضبنا وغضب الجيش المصري، عرفتم السيسى كان بيشترى سلاح ليه؟ عشان تناموا فى بيوتكم آمنين وبناتكم ونساؤكم لا يغتصبوهن أو يبيعوهن سبايا، السيسى قال لوزير الدفاع ورئيس الأركان: «أمامكما ١٦ يومًا فقط وأستلم سيناء نضيفة»، المهم (الخنزيرة) بتولول وتقول السيسى بينفذ عملية عسكرية فى سيناء أومال نجرب السلاح اللى اشتريناه فى مين غيركم؟ ده حلال الله أكبر، وكمان بيذيعوا فيديوهات ويقولوا الجيش بيضرب المدارس والأطفال بيهربوا مدارس إيه يوم الجمعة يا شوية بهايم، أيوه يعنى هو جيش الكحك والجمبرى ولازم يرجع للحدود ولا جيش القوة الغاشمة والبطش وكفاية وحرام، طب (السيسي) حنين والستات بتحبه ولا قمعى وظالم ومفتري، تؤتؤ وبعدين ما تجمدوا كدهون ده إحنا لسه بنقول بسم الله وأول أسبوع فى العملية، عارفين أنجاس بيت المقدس كانوا بيحضروا يطلعوا بيان، وهما بيظبطوا الكاميرا يا روح أمهم ملحقوشى طلعوا ديلفرى للحور العين فورا ادعوا لهم فهم الآن (مفروم مشوى سياخ)، عارفين فى الوقت اللى كله كان بيهرى فى (الفراخ المجمدة) و(شورت الرقاصة) وصلتنى معلومة إن المستشفيات أخدت أوامر برفع درجة الاستعداد القصوى والاستعداد لاستقبال الحالات الحرجة، وبالطبع كنت على يقين إنه أمر جلل يتم تجهيزه ولم أتكلم حفاظًا للسرية المطلوبة، العملية اللى انتو شايفينها دى لو تعرفوا بتتجهز من امتى؟ لو تعرفوا إزاى تم تجهيزه واستعداد المستشفيات لاستقبال الحالات الحرجة والاستعداد دون أدنى شك من أجهزة مخابرات إسرائيل وأمريكا، فاكرين تلوث مستشفى قصر العينى، الكل (ظات وهرى فيه) والصحافة والمواقع والإعلام قاموا بالواجب الصراحة وهاجموا وزارة الصحة والحكومة وهو ده بالضبط اللى كان مطلوبًا، وكانت خطوة من خطوات التموية والاستعداد للعملية دون أن تشك أجهزة المخابرات إن مصر بتجهز لعملية كبيرة فعلًا نشكركم على حسن تعاونكم، دى استراتيجية خداع العدو، عندما تستعد تحت نظروسمع العدو و(تلبسه أكبر عِمَّة وتقلوظها كمان)، الريس رايح يفتتح صوب زراعية فى أكبر قاعدة عسكرية (محمدنجيب)وهوفى فجر اليوم الجديد عنده أكبر عملية عسكرية (سيناء٢٠١٨) وهيكون فى غرفة العمليات بعدها بساعات، ورجالتنا سهرانين بياكلوا ويضحكوا وكمان شويتين عندهم طلعة قرب الفجر، وفجأة النسر المصرى شق السماء والأسود انطلقت من عرينها والوحوش زلزلوا الجو والبحر والأرض، وقذفوا الرعب فى قلب العالم، ينصر وطنك يا سيسى إنت ورجالتك وربنا رجاله روح يا شيخ ربنا يحميك زى ما حميتنا وسترتنا، ولما تعرف إن الموساد فى حالة من التوتر والقلق وبيوصف اللى بيحصل إنه محير ومقلق وخطير تعرف إنت مين ورئيسك مين ومصر بتعمل إيه.
وكان أول رد من إسرائيل على العملية الشاملة سيناء ٢٠١٨ ذكرت صحيفة (يديعوت أحرونوت) الإسرائيلية، أن الجيش المصرى أعلن بدء العملية الأمنية الشاملة بسيناء ٢٠١٨ ضد عناصر تنظيم (داعش) الإرهابى فى جميع أنحاء البلاد، بما فى ذلك شبه جزيرة سيناء، وأن المتحدث باسم الجيش المصرى، قال: (بدأنا العملية الشاملة بأمر من القائد الأعلى للجيش الرئيس السيسى، وأن جميع مؤسسات الدولة تعمل لصالح العملية الشاملة بما فيها الجيش والشرطة)، والعملية ستشمل مناورات عملية تهدف إلى تعزيز سيطرة مصر على المعابر الحدودية مع الدول المجاورة، وأن مصادر أمنية فى مصر أكدت رفع مستوى التأهب لأعلى مستوى فى جميع المناطق بالبلاد، وأن العملية الشاملة ستركز على فرض الأمن فى شمال ووسط شبه جزيرة سيناء والدلتا والصحراء الغربية، وتطهير هذه المناطق من البؤر الإرهابية، وأكدت أنه ليس من الواضح ما العملية الحالية، ولماذا تأتى قبيل موعد الانتخابات الرئاسية إنه أمر محير إلى حد ما، وقد وردت تقارير عن تعزيزات عسكرية خطيرة للجيش المصرى فى سيناء وصفت بأنها (تعزيزات لم يسبق لها مثيل) إلى جانب استمرار داعش سيناء فى تنفيذ هجمات ضد أهداف من قوات الأمن المصرية كذلك حرصها على نشر التحديثات كل يوم بشأن إلقاء القبض على الإرهابيين وتدمير المعدات والأسلحة التى يستخدمونها فى عملياتهم ضد قوات الأمن وأهداف أخرى فى جميع أنحاء البلاد، واليوم التالى صدرت تعليمات مشددة من الحكومة (الإسرائيلية) لوسائل الإعلام بعدم الحديث عن العمليات المصرية فى سيناء خشية تفسير المصريين لها على أنها عدائية، خير طيب فين معاهدة السلام اللى بتمنع كل اللى بيعمله السيسى والجيش فى سيناء وفين التهديدات لقواتنا المصرية من أى اقتراب للحدود أقولكم أنا الرد: إن مصر عادت شمسها الذهب مصر رجعت ترعب الكل، مصر استعادت عافيتها من جديد.
