(المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا ما يجعل من يسمعه هو الذي يغشى عليه).
(حصاوي يدخل المقهى وقد انتصف النهار، فيجد جاره المثقف جالساً وحوله بعض الزبائن يتحدث إليهم بغضب وهم يهزّون رؤوسهم ويوافقونه على ما يقول)
المثقف: مش ممكن.. مش معقول.. دا كلام فارغ.. انتوا معايا والا لأ؟
( الكل يهمهم ويهز رأسه )
( المعلم صاحب المقهى يراقب الموقف بعدم الارتياح ويرى حصاوي داخلا فيستوقفه)
المعلم: ما تشوف لنا حل مع صاحبك دا.. بالشكل دا هيطفّش الزباين كلهم.
حصاوي: دا جاري مش صاحبي
المعلم: برضه تقوله ما يصحش كده.. ده مش منتدى سياسي
حصاوي: ( يتحرك إلى حيث يجلس صاحبه المثقف) سلامو عليكم يا رجالة
المثقف: أهو حصاوي جه؟.. عاجبك الموقف الحالي اللي احنا فيه دا يا حصاوي؟
حصاوي: والله يعني..
المثقف: ( مقاطعا ) بذمتك الأوضاع اللي احنا فيها دي مش محتاجة ثورة تالتة؟
حصاوي: يعني والله ..
المثقف: ( مقاطعا ) مش كده بذمتك؟
حصاوي: لا بلاش خليها بذمتك أنت.. ( ويغمز خلسة للجالسين )
( الجالسون يفهمون غمزته فيتسللون واحدا وراء الآخر في هدوء)
المثقف: ( مصدوما) إيه دا؟.. تبقى أنت على كده مش ثوري يا حصاوي؟
حصاوي: أنا ثوري جدا.. بس تفهّمني الأول الموضوع إيه وانا أوافقك عليه دوغري من غير ما أناقشك!
المثقف: اللي حاصل في البلد
حصاوي: البلد حاصل فيها حاجات كتير
المثقف: وكله كوم والتعليم كوم
حصاوي: فعلا مستوى التعليم انحطّ وما عادش له فايدة
المثقف: مش المشكلة مستوى التعليم.. دا التعليم كله مهدد.. انت مش بتسمع ولا تشوف الطلبة والطالبات اللي بيتظاهروا في الجامعة، تقوم الداخلية تنزل فيهم قتل؟
حصاوي: يا ساتر.. للدرجة دي؟
المثقف: طبعا.. دا غير إن الشرطة بترش عليهم ميه وقنابل غاز مسيلة للدموع بيتعب صدور الطلبة.. وساعات يرموا عليهم طوب وحجارة
حصاوي: الشرطة بقت مسلّحة بالطوب والحجارة كمان؟
المثقف: أيوه.. لما الطلبة بيحدفوا عليهم الطوب والحجارة.. تقوم الشرطة ساعات تاخد الطوب وترجع ترميه على الطلبة المسالمين.. تصور؟
حصاوي: يمكن جماعة الإخوان وقعوا بينهم وبين الشرطة؟
المثقف: إطلاقا.. ما تسمعش كلام الجرائد ولا الإذاعة ولا التليفزيون
حصاوي: أمال أسمع كلام مين؟
المثقف: تسمع كلامي أنا وأنا بقولك.. الطلبة تظاهروا عشان خاطر زملاءهم اللي اعترضوا على بعض الأساتذة والعمداء، وطالبوا يرفدوا أغلبهم.. محدش سمع كلامهم.. تصور؟
حصاوي: دول أساتذة وعمداء من الإخوان؟
المثقف: إطلاقا.. ليه بتقول كده؟
حصاوي: عشان الإخوان هما كمان بيعملوا مظاهرات عمال على بطال.. عايزين يتخلصوا من العمداء والأساتذة كلهم تقريبا وبيوقفوا المحاضرات.. ويمكن الثوار والاشتراكين وشباب 6 أبريل بالشكل دا بيدعموا الإخوان وبيزودوا الفوضى
المثقف: إطلاقا.. دي مجرد صدفة.. الطلبة عاملين المظاهرات دي عشان زميلهم
اللي اتقتل جوه الجامعة.. مع إنه مالوش أي علاقة بالإخوان.. ومع ذلك قوات الشرطة قتلته عمدا مع سبق الإصرار
حصاوي: والحكم دا صدر إمتي؟.. أصلي ما بقراش جرايد
المثقف: الحكم ما صدرش لسه.. ويمكن الحكومة هتمنعه.. لكن أنا اللي بقولك
حصاوي: وإيه رأي الإخوان في الموضوع دا؟
المثقف: طبعا هما كمان مش هيسيبوا دم الشهيد دا.. ( ثم وقد لاحظ شرود حصاوى ) انت سرحت في إيه يا حصاوي؟
حصاوي: بفكر لو التحقيق في القضية دي وصل إن الشرطة مش مسؤولة.. والإخوان هما المسؤولين
المثقف: دي تبقى كارثة
حصاوي: فعلا.. يبقى لازم نغير كل قيادات الشرطة هما وزيرهم.. واللي كتبوا التقارير الطبية عن الحادث.. والنيابة اللي حققت في الحادث
المثقف: عليك نور
حصاوي: يبقى احنا محتاجين تلات ثورات بتلات حكومات.. مش ثورة واحدة
المثقف: مش كده والنبي؟
حصاوي: واحنا ورانا إيه؟ احنا بقالنا سبع تلاف سنة
( المثقف يغشى عليه )
