(المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشى عليه).
(حصاوي جالس في المقهى عندما يظهر شاب من جيرانه آتيا وهو يجري وقميصه ممزق ثم يجلس بجواره وهو يلتقط أنفاسه بصعوبة)
حصاوى: خير فيه إيه؟
الشاب: هات لي طاولة بسرعة واقعد لاعبني
حصاوي: إيه دي؟ نكتة جديدة.
الشاب: اسمع اللي بقولك عليه.
حصاوي: يبقى عملت حاجة تغضب أبوك.
الشاب: وأبويا ماله؟ دي الشرطة اللي جاية ورايا.
حصاوي: ليه؟ انت سرقت حاجة؟
الشاب: أبدا.. كل الحكاية إني طلعت في مظاهرة.
حصاوي: طب وإيه يعني ما انت من حقك تقول رأيك.
الشاب: قولّهم.. قال إيه.. لازم آخد تصريح بالمظاهرة الأول وأقولهم المظاهرة تبدأ إيمتي وتخلص الساعة كام. تصور؟
حصاوي: وانت طبعا مش عارف هييجي لك مزاجك تتظاهر الساعة كام.
الشاب: طبعا لأني إنسان حر، وكل واحد في البلد دي من حقه يبقى حر.
حصاوي: عداك العيب.
الشاب: يبقى الشرطة تقيد حريتي بأي مبرر؟
حصاوي: ما هي الشرطة برضه حرة.
الشاب: لأ الشرطة مش حرة.
حصاوي: وتخسر إيه لو قلت لهم بميعاد المظاهرة اللي ناوي تعملها.
الشاب: أنا نفسي ما كنتش أعرف.. أنا ماشي لقيت المظاهرة شغالة وكان خلقي ضيق شوية وما فيش حاجة ورايا رحت داخل فيها.. صعب عليا أسيبها وأمشي.
حصاوي: لأ طبعا.. دا حتى حرام.
الشاب: أصل كان فيها بنت زي القمر.
حصاوي: وكنت بتتظاهر ليه؟
الشاب: معرفش بس أسيبها هي تتظاهر وأنا أقف أتفرج من بعيد؟، لا اضرب طوبة ولا حجر.. عايزها تقول عليا إيه؟، كان لازم أشتم الشرطة والجيش زي بقية الزملا.
حصاوي: برضه ليه؟
الشاب: عشان منعوا المظاهرات.
حصاوي: معقولة؟ دي المظاهرات كانت شغالة لحد امبارح
الشاب: ما هما يا سيدي طلعوا قانون عشان ناخد إذن وتصريح من الأول
حصاوي: طب وانتم يخسّ عليكم إيه؟ ما تاخدوا تصريح.
الشاب: احنا عايزين حريتنا زي البلاد المتقدمة.
حصاوي: وانتوا طلبتوا إيه؟
الشاب: طلبنا نعمل المظاهرات وقت ما نحب ومن غير ما نقولهم.
حصاوي: طب وليه ما طالبتوش يعملوا لكم قانون زي قوانين الدول المتقدمة
الشاب: أنا ما عنديش فكرة عن القوانين بتاعة برّه إزاي؟
حصاوي: أنا عندي فكرة شويّة عنها، يعني مثلا..
الشاب: (مقاطعا) مش عايز أعرف، واحنا مالنا ومال غيرنا من الأجانب؟
حصاوي: يعني إيه؟
الشاب: يعني احنا لينا خصوصية غير كل الدنيا.
حصاوي: إشمعني؟
الشاب: أنت هتخش لي قافية ؟
حصاوي: لا يا ابني.. خلاص ما فيش شرطة جايه عليك.. روح افتح لك كتاب
وذاكر إلهي تنجح السنة دي.
الشاب: وانت مالك أهلك؟، إحنا دلوقت في حرية.. يعني ما حدش له عند حدّ حاجة.
حصاوي: أنا متأسف.. فعلا انت حرّ، تنجح.. تسقط، ما حدش له دعوة.
الشاب: أسقط؟، اتكلم على قدك.. انت فاكر الحكومة تستجري تسقط السنة دي
طالب واحد، واحنا من أول السنة والتدريس واقف وما درسناش أي مادة.
حصاوي: طيب عن إذنك بقى.. أنا كمان قايم أروح المظاهرة التانية.
الشاب: مظاهرة إيه؟
حصاوي: مظاهرة ضد الإخوان.. تيجي معايا.
الشاب: لأ ماليش مزاج.
حصاوي: أقولك الحق.. دي مظاهرة ضد جماعة 6 أبريل.. تيجي؟
(الشاب يغشى عليه).
