المواطن الغلبان حسن حصاوي يغشي عليه من حين لأخر.وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشي عليه.
( حصاوى بالمقهى جالس قرب نخبة مثقفين يتناقشون بصوت مرتفع
واكتشف أنهم يكررون نفس الكلام الذي يقولونه في التليفزيون.لكنه وجد أخر يجلس وحدة في ركن وتذكر أنه رأي صورته علي الأقل في الصحف, فقام وتقدم منه.
حصاوى
أنا يعني ما بقتش أشوفك بتطلع في التليفزيون اليومين دول.إيه الحكاية؟
المثقف
اليومين دول؟ يعني كنت بتشوفني من خمس..سبع سنين ؟
حصاوى
لا. إيه ما حدش بيطلبك ولا ممنوع تطلع في الفضائيات ؟
المثقف
( يهم يرشف الشاي فيضحك ويشرق) لأ بيطلبوني زى غيري بس أنا نفسي مسدودة. ولما كل الناس تتكلم, المتفرجين مش هيفهموا حاجة,غير أن اللي بيتكلموا مهمين وبيحفظوا اساميهم لكن ما بيعرفوش ليه.
حصاوى
ودا من إيه؟
المثقف
القنوات كتيرة يبقي طبيعي اللي يقدموا برامج كويسه قليلين لكن مضطرين ضيوفهم يبقوا مهمين علي مش مهمين.
حصاوى
وإيه رأيك في اللي بيجري دلوقت؟.
المثقف
رأيي أن الشيخ مرسي راجع بعكس كل اللي بيتقال.
حصاوى
( بذعر ) مرسي راجع أزاي؟
المثقف
في بلدنا كل الحاجات اللي بتروح ,بترجع بعد شويه وبالذات الحاجات
القديمة زى العفاريت والأشباح والستات اللي بيلبسوا نقاب مش.والأٌقباط يرجعوا ينضربوا بالطوب وتتحرق كنايسهم زى أيام القرون الوسطي والمماليك يرجعوا بس أسمهم يتغير هكذا.
حصاوى
المماليك يرجعوا؟
المثقف
أيوه بس بلبس مختلف شويه بس بدقون طبعا.وأنت مستغرب أن الشيخ مرسي يرجع ؟
حصاوى
طب ما تطلع في التليفزيون وتقول الكلام دا ؟
المثقف
قلبك أبيض. بتوع السياسة مشغولين دلوقت بإيه ؟
حصاوى
قول أنت.
المثقف
حاجتين.الأول النظام أو عدم النظام حتى,والتاني يختاروا الرئيس.الأول مشغولين يعملوا دستور مع أن عندنا دستور من قرن تقريبا ويا ريت دستور واحد دا أحنا عملنا دساتير من قبل الثورة المجيدة وعملنا دساتير أكتر بعدها
يعني كل حاكم كان بيعمل دستورين بالميت.وغيرنا اسم بلدنا 4مرات لأ وبيقولوا من دلوقت أنهم هيعملوا دستور لعشر سنين وبعدها يشوفوا نفع ولا لأ.شغل حشاشين يعني.
حصاوى
لا مؤاخذة أنا مش مثقف زيكم لكن عندي سؤال ليه ما ياخدوش دستور من
دساتير البلاد الكويسةه واللي اتقدمت ويغشوا منه زى التلامذة في الامتحان؟
المثقف
مستحيل لأن بعضنا عايز دستور أوربي وبعضنا عايز دستور عثماني
و الناصريين عايزين دستور مماليكي. وكل مرة زى ما بتقول بيغشوا بس
بيلطشوا من كل دستور حتة. يعني سمك لين تمر هندي وعشان كده هما أول
ناس ما بتعجبهمش الطيخة ويرجعوا يتخانقوا سوا مع بعض.
حصاوى
يعني إيه ما فيش حل خالص؟ حل جذري.
المثقف
للاسف, ما فيش غير حل مؤقت واحد.
حصاوى
قولي أزاي ؟
المثقف
يرجع مرسي الأول...
حصاوى
) مقاطعا بذعر) لأ ما تكملش أرجوك.
المثقف
ونزعل الإخوان والسلفيين ويحاربنا الغرب والإرهابيين؟ دا كلام؟
حصاوي
قول نرشح الفريق السيسي اللي معظم الناس بتحبه وتثق فيه.
المثقف
ما هو مش عايز يترشح.والناس مش شايفه حد غيره فعلا.
حصاوى
يبقي الحلإيه؟
المثقف
مرسي يرجع بس باسم تاني ونجيب واحد زى عبد الناصر باسم تاني والاتنين يحكمونا لحد ما واحد يصفي التاني. ونصبر بقي لحد ما ربنا يحلها.
حصاوى
والنخبة المثقفة ما لهاش دور؟
المثق
أزاي؟ هيفضلوا يتكلموا في التليفزيون دول فاتحين بيوت!
( حصاوى يغشي عليه )
